JoomlaLock.com All4Share.net

Background Video

‘கிராண்ட்ஸ்லாம்’ போட்டிகளில் ஒன்றான ஆஸ்திரேலிய ஓபன் டென்னிஸ் போட்டி மெல்போர்ன் நகரில் நடந்து வருகிறது. 7-வது நாளான நேற்று ஒற்றையர் பிரிவில் 4-வது சுற்று ஆட்டங்கள் அரங்கேறின.

இதில், 6-ம் நிலை வீரர் குரோஷியாவின் மரின் சிலிச் தன்னை எதிர்த்த பாப்லோ காரெனோ பஸ்தாவை (ஸ்பெயின்) 6-7 (2-7), 6-3, 7-6(7-0), 7-6 (7-3) என்ற செட் கணக்கில் தோற்கடித்து கால்இறுதிக்குள் நுழைந்தார். 20 ஏஸ் சர்வீஸ்கள் வீசி அசத்திய சிலிச், கிராண்ட்ஸ்லாம் போட்டிகளில் பெற்ற 100-வது வெற்றி இதுவாகும். அத்துடன் கிராண்ட்ஸ்லாமில் அதிக முறை கால்இறுதியை எட்டிய குரோஷிய வீரரான இவானிசெவிச்சின் (11 முறை) சாதனையையும் சமன் செய்தார்.

மற்றொரு ஆட்டத்தில் ‘நம்பர் ஒன்’ வீரர் ரபெல் நடால் (ஸ்பெயின்) 6-3, 6-7 (4-7), 6-3, 6-3 என்ற செட் கணக்கில் டியாகோ ஸ்வார்ட்ஸ்மானை (அர்ஜென்டினா) 3 மணி 51 நிமிடங்கள் போராடி விரட்டினார். இந்த வெற்றியின் மூலம் நடால் ‘நம்பர் ஒன்’ இடத்தை தக்கவைத்துக் கொண்டார். ஆஸ்திரேலிய ஓபனை வெல்ல முடியாமல் போனாலும் இப்போதைக்கு அவரது ‘நம்பர் ஒன்’ இடத்துக்கு ஆபத்து இல்லை.

ஆஸ்திரேலிய ஓபனில் 10-வது முறையாக கால்இறுதிக்கு வந்துள்ள நடால் அடுத்து மரின் சிலிச்சுடன் மல்லுகட்டுகிறார். இருவரும் இதுவரை 6 முறை நேருக்கு நேர் மோதியிருக்கிறார்கள். இதில் 5-ல் நடாலே வெற்றி கண்டிருப்பது குறிப்பிடத்தக்கது.

Top
We use cookies to improve our website. By continuing to use this website, you are giving consent to cookies being used. More details…