JoomlaLock.com All4Share.net

Background Video

Super User

Super User

Email: இம்மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.

ஆர்.டி.ஐ., எனப்படும், தகவல் அறியும் உரிமை சட்டத்தை ஒழிப்பதற்காகவே, மத்திய அரசு, அது தொடர்பான சட்ட திருத்த மசோதாவை, லோக்சபாவில் நிறைவேற்றிஉள்ளது' என, காங்கிரஸ் மூத்த தலைவர் சோனியாதெரிவித்துள்ளார்.

தகவல் அறியும் உரிமை சட்டத்தில், சில திருத்தங்கள் செய்து, அது தொடர்பான மசோதாவை, சமீபத்தில் லோக்சபாவில் மத்திய அரசு நிறைவேற்றியது. தகவல் அறியும் உரிமை சட்ட ஆணையத்தை, தன் கட்டுப்பாட்டிற்குள் கொண்டுவருவதற்காகவே, மத்திய அரசு, இந்த மசோதாவை நிறைவேற்றியதாக, எதிர்க்கட்சிகள் குற்றம் சாட்டியுள்ளன.

இந்நிலையில், காங்கிரஸ் மூத்த தலைவர் சோனியா வெளியிட்டுள்ள அறிக்கை:தகவல் அறியும் உரிமை சட்டத்தை, தங்களுக்கு மிகவும் தொந்தரவுஅளிக்கும் விஷயமாக மத்திய அரசு கருதுகிறது. இதனால், தகவல் உரிமை சட்ட ஆணையத்தின் அதிகாரத்தை, தங்கள் கட்டுப்பாட்டில் கொண்டுவர, ஆட்சியாளர்கள் முடிவு செய்துள்ளனர்.தற்போது நிறைவேற்றப்பட்டுள்ள சட்ட திருத்த மசோதாவால், தகவல் அறியும் உரிமை சட்டம், அழிவின் விளிம்பிற்கு சென்றுள்ளது.

அரசுத்துறை தொடர்பான தகவல்களை அறிந்து கொள்வதற்காக, 10 ஆண்டுகளாக, நாட்டு மக்கள், இந்த சட்டத்தை பயன்படுத்தி வந்தனர்.இதன் மூலம், ஆட்சியாளர்கள், அதிகாரிகள் செய்யும் தவறுகள் வெளிச்சத்துக்கு வந்தன. இப்போது, இந்த ஆணையத்தை முற்றிலும் அழிக்க, மத்திய அரசு முயற்சிக்கிறது.இவ்வாறு, சோனியா கூறியுள்ளார்.

காஞ்சிபுரம் வரதராஜப் பெருமாள் கோயிலில் தற்போது சயனக் கோலத்தில் அருள்பாலித்து வரும் அத்திவரதர் வரும் ஆகஸ்ட் 1ஆம் தேதி முதல் நின்ற கோலத்தில் பக்தர்களுக்கு அருள்பாலிப்பார் என தமிழக முதல்வர் எடப்பாடி கே.பழனிசாமி செவ்வாய்க்கிழமை தெரிவித்தார்.

காஞ்சிபுரத்தில் நடந்து வரும் அத்திவரதர் பெருவிழாவின் பாதுகாப்பு ஏற்பாடுகள் குறித்து அவர் பல்வேறு துறை அதிகாரிகளுடன் நேரில் ஆய்வு செய்தார். இதையடுத்து கோயிலில் சுவாமி தரிசனம் செய்தார். 

பின்னர் வரதர் கோயிலில் பாதுகாப்பு ஏற்பாடுகள் தொடர்பான ஆலோசனைக் கூட்டம் தமிழக முதல்வர் தலைமையில் காஞ்சிபுரம் மாவட்ட ஆட்சியர் அலுவலகத்தில் நடைபெற்றது. கூட்டத்துக்கு பின்னர் முதல்வர் செய்தியாளர்களிடம் கூறியது: 

கோயில் வளாகம், தற்காலிகப் பேருந்து நிலையம் ஆகிய இடங்களில் பாதுகாப்பு வசதிகள் குறித்து நேரில் ஆய்வு செய்தேன். கோயில் வளாகத்தில் 2,600 மீட்டர் நீளத்துக்கு பக்தர்கள் வசதிக்காக தற்காலிக நிழற்பந்தலும், சுமார் 8 ஆயிரம் பேர் இளைப்பாறிச் செல்லும் வகையில் பந்தலும் அமைக்கப்பட்டுள்ளது.

மூத்த குடிமக்கள், மாற்றுத் திறனாளிகள் செல்ல வசதியாக 750 சக்கர நாற்காலிகள் ஏற்கெனவே பயன்படுத்தப்பட்டு வந்த நிலையில் தற்போது மேலும் 500 சக்கர நாற்காலிகள் கொண்டு வரப்பட்டு பயன்பாட்டில் உள்ளன. போதுமான அளவில் மருத்துவ முகாம்கள் அமைக்கப்பட்டு 200 மருத்துவர்கள் பணியாற்றி வருகின்றனர். இதுவரை 32,673 பேருக்கு மருத்துவ சிகிச்சை அளிக்கப்பட்டுள்ளது. கோயில் வளாகத்திற்குள் 5 அவசரக் கால வழிகள் உருவாக்கப்பட்டுள்ளன.

ஜூலை 22 ஆம் தேதி வரை 30.5 லட்சம் பக்தர்கள் சுவாமி தரிசனம் செய்துள்ளனர். வெளிமாவட்டம் மற்றும் வெளி மாநிலங்களிலிருந்து 3,41,982 வாகனங்கள் காஞ்சிபுரம் வந்துள்ளன. டிஜிபி, ஏடிஜிபி, ஐஜி மற்றும் 7எஸ்பி-க்கள், 8 ஏடிஎஸ்பி-க்கள், 40 டிஎஸ்பி-க்கள், 98 ஆய்வாளர்கள் உட்பட 5,118 பேர் பாதுகாப்புப் பணியில் சுழற்சி முறையில் ஈடுபட்டுள்ளனர். 9 காவல்உதவி மையங்கள் அமைக்கப்பட்டு கண்காணிப்பு கேமராக்கள் பொருத்தப்பட்டு கண்காணிக்கப்படுகிறது.

தோட்டக் கலைத்துறை இயக்குநர் சுப்பையன், ஊரக வளர்ச்சித் துறை இயக்குநர் கே.பாஸ்கரன் ஆகிய இரு உயர் அதிகாரிகள் விழா முடியும் வரை இருந்து கண்காணிப்புப் பணியை மேற்கொள்ள அறிவுறுத்தப்பட்டுள்ளது. 5 தீயணைப்பு வாகனங்கள் நிறுத்தப்பட்டு தீயணைப்பு வீரர்கள் 250 பேர் பணியில் உள்ளனர். 3 தற்காலிக பேருந்து நிலையங்கள் அமைக்கப்பட்டு40 சிற்றுந்துகளில் பக்தர்கள் வசதியாக கோயிலுக்கு அழைத்துச் செல்லப்படுகின்றனர்.

ஆகம விதிப்படி தொன்று தொட்டு என்ன நடைமுறை பின்பற்றப்படுகிறதோ அவையனைத்தும் அப்படியே பின்பற்றப்படும். 

இணைய தளம் மூலம் நாள் ஒன்றுக்கு 2 ஆயிரம் நுழைவுச்சீட்டுகள் பதிவு செய்யப்படுகின்றன. அத்திவரதர் ஜூலை 1-ஆம் தேதி முதல் சயனக் கோலத்தில் பக்தர்களுக்கு காட்சியளித்தார். வரும் ஆகஸ்ட் 1-ஆம் தேதியிலிருந்து நின்ற கோலத்தில் பக்தர்களுக்கு காட்சியளிப்பார். 

நின்ற கோலத்தில் காட்சியளிக்கும்போதும் பக்தர்கள் கூடுதலாக வருவார்கள் என முன்கூட்டியே கணித்து, அதற்கேற்ப போதுமான அனைத்து வசதிகளும் பக்தர்களுக்கு செய்யப்பட்டுள்ளன என்றார் அவர்.

தரிசனத்துக்கு 2 மணி நேரம் 
அத்திவரதரை செவ்வாய்க்கிழமை பொது தரிசனப் பாதையில் சென்று தரிசனம் செய்ய அதிகபட்சம் 2 மணிநேரமானது. குறைந்தபட்சமாக பக்தர்கள் 20 நிமிடங்களில் தரிசனம் செய்து திரும்பினர். திங்கள்கிழமையை விட செவ்வாய்க்கிழமை பக்தர்களின் வருகை கணிசமாக குறைந்திருந்தது.

மூலவரை தரிசிக்க அனுமதிக்க வேண்டும் 
அத்திவரதர் பெருவிழா 23வது நாள்களாக நடைபெற்று வரும் நிலையில், குறிப்பிட்ட சில தினங்களைத் தவிர மற்ற நாள்களில் வரதர் கோயிலில் மூலவர், உற்சவர், தாயார் சந்நிதிகளுக்கு சென்று பக்தர்கள் தரிசிக்க மாவட்ட நிர்வாகம் அனுமதியளித்திருந்தது. இதனிடையே, பக்தர்களின் வருகை அதிகரித்து வந்ததால் பக்தர்கள் வெளியேறாமல் கோயில் வளாகத்துக்குள்ளேயே நீண்ட நேரம் இருந்தனர். 

அவர்களை வெளியேற்றுவது காவலர்களுக்கு சவாலாக இருந்தது. இதையடுத்து விழா முடியும் வரை, பக்தர்கள் தாயார், மூலவர் சந்நிதிகளுக்கு சென்று தரிசனம் செய்வதற்கு அனுமதி மறுக்கப்பட்டது. இதனால் நாள்தோறும் வழக்கமாக சுவாமியை தரிசனம் செய்யும் பட்டாச்சாரியார்கள் அதிருப்தியடைந்தனர். அந்த சந்நிதிகளைத் திறக்குமாறு அவர்கள் வலியுறுத்தி வந்தனர். 

போலீஸார் இதற்கு தொடர்ந்து அனுமதி மறுத்ததையடுத்து பட்டாச்சாரியார்களுக்கும், காவல்துறையினருக்கும் இடையே அவ்வப்போது வாக்குவாதமும் ஏற்படுகிறது. இதற்குத் தீர்வு காணக் கோரி மாவட்ட நிர்வாகத்திடம் பட்டாச்சாரியார்கள் கோரிக்கை விடுத்துள்ளனர்.

செவ்வாய்க்கிழமை, 23 ஜூலை 2019 00:00

சென்னை, புறநகர் பகுதிகளில் பலத்த மழை

தென்தமிழகத்தின் வளிமண்டலத்தில் நிலவி வந்த மேலடுக்கு சுழற்சி மற்றும் தென்மேற்கு பருவமழை காரணமாக தமிழகத்தின் பல்வேறு பகுதிகளில் கடந்த 2 நாட்களாக மழை பெய்து வருகிறது. மாநிலத்தின் ஒரு சில இடங்களில் நேற்றும் மழை கொட்டியது.
 
 
கடும் குடிநீர் பற்றாக்குறையால் தவித்து வரும் சென்னையில் கடந்த சில தினங்களாக ஓரளவு மழை பெய்து வருகிறது. சென்னை மற்றும் புறநகர் பகுதிகளின் பல இடங்களில் நேற்றும் மழை வெளுத்து வாங்கியது. எழும்பூர், வடபழனி, மடிப்பாக்கம், ராயப்பேட்டை, தேனாம்பேட்டை, தியாகராயநகர், வண்ணாரப்பேட்டை உள்பட பல பகுதிகளில் கன மழை கொட்டி தீர்த்தது.
 
போக்குவரத்து நெரிசல்
 
வியாசர்பாடி, அண்ணாநகர், மயிலாப்பூர், போரூர், சேப்பாக்கம், கோயம்பேடு, சைதாப்பேட்டை, அண்ணாசாலை, அடையாறு உள்பட ஏராளமான பகுதிகளிலும் பரவலாக மழை கொட்டியது. இதனால் பெரும்பாலான இடங்களில் சாலைகளில் மழைநீர் ஆறுபோல் பெருக்கெடுத்து ஓடியது.
 
தாழ்வான பகுதியில் தண்ணீர் தேங்கியதால் பொதுமக்கள் அவதிக்குள்ளாகினர். இந்த மழையினால் சென்னையின் பல இடங்களில் பல மணி நேரம் போக்குவரத்து நெரிசல் ஏற்பட்டது. இதனால் வாகன ஓட்டிகள் அவதியடைந்தனர். சில முக்கியமான பகுதிகளில் போக்குவரத்து போலீசார் மழையில் நனைந்தபடி போக்குவரத்தை சரிசெய்தனர்.
 
இதேபோல் சென்னை புறநகரின் பல்வேறு இடங்களிலும் பரவலாக மழை கொட்டியது.
 
சென்னைவாசிகளுக்கு ஆறுதல்
 
தண்ணீர் தட்டுப்பாட்டால் தவித்து வரும் சென்னைவாசிகளுக்கு கடந்த சில நாட்களாக பெய்து வரும் மழை சற்று ஆறுதலை தந்துள்ளது. தொடர்ந்து இதேபோல் மழை பெய்து தண்ணீர் பற்றாக்குறையை தீர்க்க வேண்டும் என்பதே சென்னை மக்களின் வேண்டுதலாக அமைந்துள்ளது.
 
புதிய காற்றழுத்த தாழ்வு பகுதி
 
இந்த நிலையில் வங்கக்கடலில் புதிய காற்றழுத்த தாழ்வு பகுதி ஒன்று உருவாகிறது என சென்னை வானிலை ஆய்வு மையம் தெரிவித்து இருக்கிறது. இதுதொடர்பாக அந்த மையத்தின் அதிகாரிகள் கூறியதாவது:-
 
தென் தமிழகத்தின் வளிமண்டலத்தில் நிலவி வந்த மேலடுக்கு சுழற்சி நகர்ந்து ஆந்திரா நோக்கி செல்கிறது. அடுத்த 24 மணி நேரத்தை பொறுத்தவரையில் (இன்று) தமிழகத்தில் ஓரிரு இடங்களிலும், அதற்கு அடுத்து வரும் 2 நாட்களுக்கு (நாளையும், நாளை மறுதினமும்) ஒரு சில இடங்களிலும் வெப்பச்சலனம் காரணமாக மழை பெய்யும்.
 
வருகிற 26-ந் தேதி (நாளை மறுதினம்) வங்கக்கடலில் காற்றழுத்த தாழ்வு பகுதி ஒன்று உருவாகிறது. இதனால் தமிழகத்தின் உள்மாவட்டங்களில் மழைக்கு வாய்ப்பு இருக்கிறது. 26-ந்தேதிக்கு பிறகு காற்றின் தன்மையை பொறுத்து, தாழ்வு பகுதியின் நிலையை அறியமுடியும். சென்னையை பொறுத்தவரையில் வானம் லேசான மேகமூட்டத்துடன் காணப்படும். நகரின் சில இடங்களில் மழைக்கான வாய்ப்புள்ளது.
 
இவ்வாறு அவர்கள் தெரிவித்தனர்.
 
வால்பாறையில் 4 செ.மீ
 
நேற்று காலை 8.30 மணியுடன் முடிவடைந்த 24 மணி நேரத்தில் தமிழகத்தில் சின்னக்கலாறு 7 செ.மீ., தேவாலா 6 செ.மீ., வால்பாறை 4 செ.மீ., ஜி பஜார் 3 செ.மீ. மழையும், தாமரைப்பாக்கம், பொன்னேரி, ஸ்ரீபெரும்புதூர், செங்கல்பட்டு, நடுவட்டம், மாமல்லபுரம், காஞ்சீபுரம், அரக்கோணம் ஆகிய பகுதிகளில் தலா ஒரு செ.மீ. மழையும் பெய்துள்ளது.

பிரிட்டன் புதிய பிரதமராக, கன்சர்வேட்டிவ் கட்சியின் போரிஸ் ஜான்சன் தேர்வு செய்யப்பட்டுள்ளார். அவர் விரைவில் பதவியேற்க உள்ளார்.

ஐரோப்பிய யூனியன் கூட்டமைப்பிலிருந்து விலக, கடந்த இரண்டு ஆண்டுகளுக்கு முன், பிரிட்டன் முடிவு செய்தது. அதற்கு பிரெக்சிட் என்னும் மசோதா தாக்கல் செய்து, பார்லிமென்டில் ஒப்புதலை பெற வேண்டும். ஏற்கனவே ஒருமுறை, பிரெக்சிட் மசோதா, ஓட்டெடுப்பில் தோல்வியை தழுவியது.

இரண்டாவது முறையும், இந்த மசோதாவிற்கு பார்லியின் ஒப்புதலை பெற முடியாமல் போனதால், பதவியை ராஜினாமா செய்யப் போவதாக, பிரிட்டன் பிரதமர், தெரசா மே அறிவித்தார். இதன்படி, தன் பிரதமர் பதவியை, கடந்த மாதம் (ஜூன்) அவர் ராஜினாமா செய்தார். புதிய பிரதமர் தேர்ந்தெடுக்கப்படும் வரை, அவர் தற்காலிக பிரதமராக பதவியில் தொடர்வார் என, அறிவிக்கப்பட்டிருந்தது. 

இந்நிலையில், பிரிட்டனின் புதிய பிரதமராக கன்சர்வேட்டிவ் கட்சியின் போரிஸ் ஜான்சன் தேர்வு செய்யப்பட்டுள்ளார். புதிய பிரதமரை தேர்ந்தெடுப்பதற்கான, எம்.பி.,க்கள் ஓட்டெடுப்பு, நடந்தது. இதில் போரிஸ் ஜான்சனுக்கு ஆதரவாக, 92,153 ஓட்டுகளும், ஜெர்மி ஹன்ட்டிற்கு ஆதரவாக 46,656 ஓட்டுகளும் கிடைத்தன. 

கர்நாடகாவில், ம.ஜ.த., - காங்கிரஸ் கூட்டணி கட்சியின், 15 எம்.எல்.ஏ.,க்கள் ராஜினாமா செய்ததால், ஆட்சி நீடிப்பதில், அசாதாரண சூழல் நிலவி வந்தது. இந்நிலையில், சட்டசபையில், நம்பிக்கை ஓட்டெடுப்பு நடத்திய, முதல்வர், குமாரசாமி, பெரும்பான்மையை நிரூபிக்க முடியாததால், ஆட்சியை பறிகொடுத்தார். இதன் மூலம், 12 நாட்களாக நீடித்து வந்த, அரசியல் இழுபறி முடிவுக்கு வந்தது.

கர்நாடகாவில், முதல்வர், குமாரசாமி தலைமையிலான, ம.ஜ.த., - காங்கிரஸ் கூட்டணி ஆட்சி, 2018, மே 23ல் பொறுப்பேற்றது. ஆரம்பத்திலிருந்தே, அமைச்சர் பதவி கிடைக்காத கூட்டணி கட்சியினர் பலரும், கடும் அதிருப்தியில் இருந்தனர். எம்.எல்.ஏ.,க்கள் சிலர், தங்கள் தொகுதிகளுக்கு நிதி ஒதுக்குவதில், பாரபட்சம் காட்டுவதாக குற்றம் சாட்டி, ஆட்சி மீது வெறுப்பை காண்பித்தனர்.

இந்நிலையில், காங்கிரஸ், எம்.எல்.ஏ., ஆனந்த் சிங், இம்மாதம், 1ம் தேதி, தன் பதவியை ராஜினாமா செய்தார். அன்று முதல், கர்நாடகா கூட்டணி ஆட்சிக்கு நெருக்கடி துவங்கியது.இதை தொடர்ந்து, 6ம் தேதி, காங்., சேர்ந்த, 10 பேர், ம.ஜ.த.,வைச் சேர்ந்த மூன்று பேர் என, ஒரே நாளில், 13, எம்.எல்.ஏ.,கள், தங்கள் பதவியை ராஜினாமா செய்தனர். இதையடுத்து அவர்கள், மஹாராஷ்டிரா மாநிலம், மும்பைக்கு சென்று, தனியார் நட்சத்திர ஓட்டலில் தங்கினர்.

இதையடுத்து, இரண்டு சுயேச்சை, எம்.எல்.ஏ.,க்கள், குமாரசாமி அரசுக்கு கொடுத்து வந்த ஆதரவை, வாபஸ் பெற்று, பா.ஜ.,வுக்கு ஆதரவளிப்பதாக, கவர்னர், வஜுபாய் வாலாவிடம் கடிதம் கொடுத்தனர். இதன் பின், காங்கிரசை சேர்ந்த, மேலும் மூன்று, எம்.எல்.ஏ.,க்கள் ராஜினாமா செய்தனர். இதனால், கர்நாடகாவில் அரசியல் நெருக்கடி ஏற்பட்டது. அரசுக்கு பெரும்பான்மை இல்லாததால், முதல்வர் குமாரசாமி, தன் பதவியை ராஜினாமா செய்ய, பா.ஜ.,வினர் வலியுறுத்தினர். காங்., - ம.ஜ.த., தலைவர்கள், எம்.எல்.ஏ., பதவியை ராஜினாமா செய்தவர்களின் மனதை மாற்ற, பெரும் முயற்சி மேற்கொண்டனர். ஆனால், முயற்சி பலனளிக்கவில்லை.

இதற்கிடையில், எட்டு பேரின், ராஜினாமா கடிதங்கள் முறைப்படி இல்லை என, சபாநாயகர், ரமேஷ்குமார் தெரிவித்தார். இதையடுத்து, தங்களின் ராஜினாமா கடிதங்களை ஏற்கும்படி, எம்.எல்.ஏ.,க்கள், 10 பேரும், உச்ச நீதிமன்றத்தில் வழக்கு தொடர்ந்தனர். நீதிமன்ற உத்தரவுப்படி, 10ம் தேதி மாலை, மும்பையில் இருந்து சிறப்பு விமானம் மூலம், பெங்களூரு வந்து, சபாநாயகரை சந்தித்து, முறைப்படி ராஜினாமா செய்தனர். இதற்கிடையில், தன் அரசுக்கான பெரும்பான்மையை நிரூபிப்பதாக, முதல்வர், குமாரசாமி, 12ல் அறிவித்தார்.

18ல், நம்பிக்கை கோரும் தீர்மானம் மீதான விவாதம் துவங்கியது. அதிருப்தியாளர்களை தங்கள் பக்கம் இழுக்கும் முயற்சியாக, நம்பிக்கை ஓட்டெடுப்பு நடத்தாமல், விவாதம் நடத்தப்பட்டு வந்தது.இதனால் ஆத்திரமடைந்த, பா.ஜ.,வினர், ஒருநாள் இரவு முழுவதும், சட்டசபையிலேயே படுத்து, தர்ணாவில் ஈடுபட்டனர். ஆட்சிக்கு பெரும்பான்மை நிலையில், உடனடியாக, நம்பிக்கை ஓட்டெடுப்பு நடத்தும்படி, பா.ஜ.,வினர் வலியுறுத்தினர். இதனால், கவர்னர், வஜுபாய் வாலா, முதல்வர், குமாரசாமிக்கு இரண்டு கடிதங்கள் அனுப்பி, 'ஓட்டெடுப்பு நடத்துங்கள்' என, உத்தரவிட்டார்.

ஆனால், முதல்வர் பொருட்படுத்தவில்லை. உடனடியாக ஓட்டெடுப்பு நடத்த கோரி, சுயேச்சை, எம்.எல்.ஏ.,க்கள் இருவர், நேற்று முன்தினம், உச்ச நீதிமன்றத்தில் மனு தாக்கல் செய்தனர். அம்மனு, நேற்று காலை, முதன்மை அமர்வில் விசாரணைக்கு வந்தது. அப்போது, சபாநாயகர் தரப்பு வழக்கறிஞர், 'நம்பிக்கை ஓட்டெடுப்பு நடத்தி முடிக்கப்படும்' என வாய்மொழியாக உறுதியளித்தார்.

இதையடுத்து, நேற்று காலை, 10:00 மணிக்கு, சட்டசபை துவங்கியது. காங்கிரஸ் தரப்பில் சித்தராமையா, அமைச்சர், டி.கே.சிவகுமார், ம.ஜ.த., அமைச்சர், எச்.டி.ரேவண்ணா மற்றும் எம்.எல்.ஏ.,க்கள் சிலர், நம்பிக்கை கோரும் தீர்மானத்தின் மீது பேசினர். இதன் பின், மாலை, 5:23 மணிக்கு, குமாரசாமி, தீர்மானத்தின் மீது பதிலளிக்க துவங்கி, இரவு, 7:18 மணி வரை, 1 மணி, 55 நிமிடங்கள் பேசினார்.இதன் பின், நம்பிக்கை ஓட்டெடுப்பு நடத்தப்பட்டது. முதலில், குரல் ஓட்டெடுப்பு நடத்தப்பட்டது. இதை தொடர்ந்து, தீர்மானத்தின் மீது ஆதரவாக இருப்பவர்கள், எதிராக இருப்பவர்கள் என, ஒவ்வொரு வரிசையாக நிற்க வைத்து, எம்.எல்.ஏ.,க்கள் எண்ணப்பட்டனர். இறுதியில், தீர்மானத்துக்கு ஆதரவாக, 99 பேரும், எதிராக, 105 பேரும் ஓட்டளித்தனர்.

இதையடுத்து, முதல்வர், குமாரசாமி கொண்டு வந்த நம்பிக்கை கோரும் தீர்மானம் தோல்வியடைந்ததாக, சபாநாயகர், ரமேஷ்குமார் அறிவித்தார். இத்துடன், 12 நாட்களாக நீடித்து வந்த, அரசியல் இழுபறி முடிவுக்கு வந்தது. காங்., தரப்பில், 14 எம்.எல்.ஏ.,க்கள்; ம.ஜ.த., மூன்று; பகுஜன் சமாஜ், ஒன்று; சுயேச்சை, இரண்டு பேர் என, மொத்தம, 20, எம்.எல்.ஏ.,க்கள், நேற்றைய சட்டசபை கூட்டத்துக்கு வரவில்லை. இதையடுத்து, முதல்வர், குமாரசாமி, தன் சகாக்களுடன் ராஜ்பவனுக்கு சென்று, கவர்னர், வஜுபாய் வாலாவிடம், ராஜினாமா கடிதம் வழங்கினார். இதை, கவர்னரும் ஏற்றுக்கொண்டார்.

அப்போது, 'அடுத்த முதல்வர், பதவி ஏற்கும் வரை, நீங்களே முதல்வராக தொடருங்கள்' என, கவர்னர் கேட்டுகொண்டார். ஆட்சியை தக்க வைக்க, குமாரசாமி இறுதி வரை போராடினார். ஆனாலும், அம்முயற்சி தோல்வியடைந்தது. அடுத்து, பா.ஜ., தரப்பில், மூன்று முறை முதல்வராயிருந்த எடியூரப்பா, மீண்டும் முதல்வராக தேர்ந்தெடுக்கும் வாய்ப்புள்ளது.

பக்கம் 1 / 2555
Top
We use cookies to improve our website. By continuing to use this website, you are giving consent to cookies being used. More details…