JoomlaLock.com All4Share.net

Background Video

தஞ்சை பெரியகோவிலில் ரூ.100 கோடி மதிப்பிலான 2 பஞ்சலோக சிலைகள் கொள்ளை போனது. மேலும் பல சிலைகளும் மாயமானது போலீஸ் விசாரணையில் அம்பலமாகி உள்ளது.

தஞ்சை பெரியகோவில்

தஞ்சை பெரியகோவில் உலக பிரசித்தி பெற்ற கோவிலாகும். இது கட்டிடக்கலைக்கு எடுத்துக்காட்டாக திகழ்வதோடு உலக பாரம்பரிய சின்னமாகவும் விளங்கி வருகிறது. மாமன்னன் ராஜராஜசோழன் கட்டிய இந்த கோவில் தற்போது இந்திய தொல்லியல்துறையின் கட்டுப்பாட்டில் உள்ளது. Image result for raja rajan bronze statue images photos

இந்த கோவில் கட்டப்பட்டு ஆயிரம் ஆண்டுகளுக்கு மேல் ஆகி விட்டது. இந்த கோவிலுக்கு தினமும் இந்தியா மட்டும் அல்லாது வெளிநாடுகளில் இருந்தும் ஏராளமான பக்தர்கள் வந்த வண்ணம் உள்ளனர்.

2 பஞ்சலோக சிலைகள் கொள்ளை

இந்த கோவிலுக்கு 13 பஞ்சலோக சிலைகளை பொய்கைநாட்டை சேர்ந்த தென்னவன் மூவேந்த வேளாண் வழங்கி உள்ளார். இந்த சிலைகள் அனைத்தும் கோவிலில் உள்ள சிலைகள் காப்பகத்தில் வைக்கப்பட்டு இருந்தன.

இதில் 75 செ.மீ. உயரம் உடைய ராஜராஜ சோழன் சிலையும், அவருடைய பட்டத்து இளவரசி லோகமாதேவியார் சிலையும் (55 செ.மீ. உயரம் உடையது) முக்கியமானது. இந்த 2 சிலைகளும் கொள்ளையடிக்கப்பட்டுள்ளதாக முன்னாள் அமைச்சர் வி.வி.சுவாமிநாதன் சிலை கடத்தல் தடுப்பு பிரிவு போலீசாருக்கு தகவல் தெரிவித்தார்.

அதன்பேரில் சிலை கடத்தல் தடுப்பு பிரிவு துணை போலீஸ் சூப்பிரண்டு வெங்கட்ராமன் விசாரித்ததில் அது உண்மை என தெரிய வந்தது. இது குறித்து தஞ்சை மேற்கு போலீஸ் நிலையத்தில் அவர் புகார் செய்தார்.

இந்த புகாரின் பேரில் தஞ்சை மேற்கு போலீஸ் இன்ஸ்பெக்டர் ஜோதிராமலிங்கம் மற்றும் போலீசார் வழக்குப்பதிவு செய்தனர். இந்த 2 பஞ்சலோக சிலைகளும் ரூ.100 கோடி மதிப்புடையவை.

வழக்கு மாற்றம்

இந்த வழக்கு சிலை கடத்தல் தடுப்பு பிரிவு போலீசுக்கு மாற்றப்பட்டுள்ளது. அதன் பேரில் சிலை கடத்தல் தடுப்பு பிரிவு போலீஸ் ஐ.ஜி.பொன் மாணிக்கவேல், கூடுதல் போலீஸ் சூப்பிரண்டுகள் ராஜாராமன், அசோக்குமார், துணை போலீஸ் சூப்பிரண்டு வெங்கட்ராமன் ஆகியோர் நேற்று தஞ்சை வந்தனர்.

பின்னர் தஞ்சை மேற்கு போலீஸ் நிலையத்துக்கு சென்று இது குறித்து விசாரணை நடத்தினர். இது தொடர்பாக தஞ்சை மாவட்ட போலீஸ் சூப்பிரண்டு செந்தில்குமார், நகர துணை போலீஸ் சூப்பிரண்டு தமிழ்ச்செல்வன் ஆகியோரிடமும் சிலை கொள்ளை போனது தொடர்பான விவரங்களை கேட்டறிந்தனர்.

போலீஸ் சூப்பிரண்டு பேட்டி

இது குறித்து தஞ்சை மாவட்ட போலீஸ் சூப்பிரண்டு செந்தில்குமார் நேற்று மாலை நிருபர்களுக்கு பேட்டி அளித்தார். அப்போது அவர் கூறியதாவது:-

கொள்ளை போன சிலைகள் குறித்த ஆதாரங்கள் உள்ளன. அந்த சிலைகள் தற்போது குஜராத்தில் உள்ள கவுதம்சாராபாய் அருங்காட்சியகத்தில் உள்ளதாக தகவல் கிடைத்துள்ளது. இதையடுத்து சிலை கடத்தல் தடுப்பு பிரிவு போலீசார் விசாரணை நடத்தி அதனை மீட்டுக்கொண்டுவர நடவடிக்கை எடுப்பார்கள்.

இந்த சிலை கொள்ளை சம்பவத்தில் ஈடுபட்டவர்கள் யார்? என்பது குறித்து விசாரணை நடைபெற்று வருகிறது. பெரியகோவிலில் ருத்ராட்ச மாலை காணாமல் போனது தொடர்பாக எந்த புகார்களும் இல்லை. இதேபோல் சரசுவதி மகால் நூலகத்தில் பழமைவாய்ந்த நூல் மாயமானது குறித்தும் எந்த புகாரும் இல்லை. அது தொடர்பாக புகார் வந்தால் உரிய நடவடிக்கை எடுக்கப்படும்.

இவ்வாறு அவர் கூறினார்.

மேலும் பல சிலைகள் மாயம்

மேலும் இது குறித்து சிலை கடத்தல் தடுப்பு பிரிவு போலீசார் விசாரணை செய்தபோது, பெரியகோவிலில் உள்ள சிலைகள் காப்பகத்தில் இருந்த மேலும் பல சிலைகள் மாயமானது தெரிய வந்துள்ளது. இது குறித்தும் போலீசார் விசாரணை நடத்தி வருகிறார்கள். 

Published in தமிழகம்
Top
We use cookies to improve our website. By continuing to use this website, you are giving consent to cookies being used. More details…