JoomlaLock.com All4Share.net

Background Video

வெள்ளிக்கிழமை, 16 ஆகஸ்ட் 2019 00:00

பங்குச் சந்தைகளில் முன்னேற்றம்

Written by

இந்தியப் பங்குச் சந்தைகளில் வெள்ளிக்கிழமை நடைபெற்ற வர்த்தகம் தொடக்கத்தில் இழப்பைச் சந்தித்த போதிலும் பிற்பகலில் சிறிய ஏற்றத்துடன் முடிவடைந்தது.

சர்வதேச பொருளாதார மந்த நிலை, அமெரிக்கா-சீனா இடையே ஏற்பட்டுள்ள வர்த்தகப் போர், நிறுவனங்களின் நிதி நிலை முடிவுகள் சந்தை எதிர்பார்ப்பிற்கு ஏற்ப இல்லாதது, அந்நிய முதலீட்டாளர்கள் லாப நோக்கம் கருதி பங்குகளை விற்பனை செய்தது போன்ற நிகழ்வுகளால் பங்குச் சந்தைகளில் சுணக்க நிலை ஏற்பட்டு தொடக்கத்தில் இழப்பை சந்தித்தது.

இருப்பினும், பொருளாதார வளர்ச்சியை ஊக்குவிக்கும் வகையில் மத்திய அரசு சலுகை அறிவிப்புகளை வெளியிடலாம் என்ற எதிர்பார்ப்பால் சந்தை இறுதியில் சிறிய ஏற்றத்தைக் கண்டது. மும்பை பங்குச் சந்தையில், மோட்டார் வாகனம், மின்சாரம், வங்கி, தொலைத்தொடர்பு, நிதி, கட்டுமான துறை குறியீட்டெண்கள் 1.50 சதவீதம் வரை ஏற்றம் கண்டன. அதேநேரம், தகவல் தொழில்நுட்பம், எரிசக்தி, உலோகம், மருந்து துறைகளின் குறியீட்டெண்கள் 0.78 சதவீதம் வரை குறைந்தன.

யெஸ் வங்கி பங்கின் விலை அதிகபட்சமாக 3.79 சதவீதம் உயர்ந்தது. அதைத் தொடர்ந்து, இன்டஸ்இண்ட் வங்கி, ஆக்ஸிஸ் வங்கி, கோட்டக் வங்கி, ஐசிஐசிஐ வங்கி மற்றும் எஸ்பிஐ பங்குகளின் விலையும் உயர்ந்தன.

ஆட்டோ நிறுவனங்களைப் பொருத்தவரையில், மாருதி சுஸுகி பங்கின் விலை அதிகபட்ச ஏற்றத்தைக் கண்டது. அதைத் தொடர்ந்து, ஹீரோ மோட்டோகார்ப், பஜாஜ் ஆட்டோ, மஹிந்திரா அண்டு மஹிந்திரா மற்றும் டாடா மோட்டார்ஸ் பங்குகளின் விலையும் உயர்ந்தன.

அதேசமயம், முதலீட்டாளர்களிடம் வரவேற்பு கிடைக்காத காரணத்தால், டிசிஎஸ், வேதாந்தா, ஹெச்சிஎல் டெக், ஹெச்டிஎஃப்சி, ரிலையன்ஸ் இண்டஸ்ட்ரீஸ் பங்குகளின் விலை சரிந்தன.

மும்பை பங்குச் சந்தையில் வெள்ளிக்கிழமை நடைபெற்ற வர்த்தகத்தில் சென்செக்ஸ் 38 புள்ளிகள் உயர்ந்து 37,350 புள்ளிகளாக நிலைத்தது. 

தேசிய பங்குச் சந்தையில் நடைபெற்ற வர்த்தகத்தில் நிஃப்டி 18 புள்ளிகள் ஏற்றம் கண்டு 11,047 புள்ளிகளாக இருந்தது.

செவ்வாய்க்கிழமை, 13 ஆகஸ்ட் 2019 00:00

ரூ.29 ஆயிரத்தை தாண்டியது தங்கம்

Written by

சென்னையில் ஆபரணத் தங்கத்தின் விலை செவ்வாய்க்கிழமை ரூ.29 ஆயிரத்தை தாண்டி, புதிய உச்சத்தை தொட்டது. பவுனுக்கு ரூ.192 உயர்ந்து, ரூ.29,016-க்கு விற்பனை செய்யப்பட்டது. கடந்த 13 நாள்களில் மட்டும் பவுனுக்கு ரூ.2,536 வரை உயர்ந்துள்ளது. பவுன் விலை, விரைவில் ரூ.30 ஆயிரத்தை தொடும் என்று தங்க நகை வியாபாரிகள் தெரிவித்தனர்.

சர்வதேச பொருளாதாரச் சூழல், உலகச் சந்தையில் தங்கத்தின் மதிப்பு, அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றின் அடிப்படையில் தங்கத்தின் விலை நிர்ணயிக்கப்படுகிறது. பல்வேறு காரணங்களால் தங்கம் விலை உயர்ந்து வந்த நிலையில், கடந்த 2-ஆம் தேதி ஆபரணத் தங்கம் ரூ.27 ஆயிரத்தைத் தாண்டியது.அதன்பிறகு, தங்கம் விலை நாள்தோறும் உயர்ந்து வந்த நிலையில், கடந்த புதன்கிழமை (ஆக.7) விலை ரூ.28 ஆயிரத்தைத் தாண்டியது. அதன்பிறகும் தொடர்ந்து தங்கம் விலை உயர்ந்து வந்தது.

இந்தநிலையில், தங்கம் விலை செவ்வாய்க்கிழமை ரூ.29 ஆயிரத்தைத் தாண்டி, புதிய உச்சத்தை தொட்டது. பவுனுக்கு ரூ.192 அதிகரித்து, ரூ.29,016-க்கு விற்பனை செய்யப்பட்டது. ஒரு கிராம் தங்கம் ரூ.24 உயர்ந்து, ரூ.3,627-க்கு விற்பனையானது. ஆகஸ்ட் 1-ஆம் தேதி முதல் ஆகஸ்ட் 13-ஆம் தேதி வரை மொத்தம் 13 நாள்களில் மட்டும் தங்கம் விலை பவுனுக்கு ரூ.2,536 வரை உயர்ந்துள்ளது. இதுபோல, வெள்ளி விலையும் கணிசமாக உயர்ந்துள்ளது. வெள்ளி கிராமுக்கு ரூ.1.40 உயர்ந்து ரூ.49 - ஆகவும், கட்டி வெள்ளி கிலோவுக்கு ரூ.1,400 உயர்ந்து ரூ.49,000 ஆகவும் இருந்தது.

டாலரை விற்று தங்கம் வாங்கி குவிப்பு: தங்கம் விலை உயர்வு குறித்து சென்னை தங்கம் மற்றும் வைர நகை வியாபாரிகள் சங்கத் தலைவர் ஜெயந்திலால் சல்லானி கூறியது: சீனப் பொருள்களுக்கு அமெரிக்காவில் அதிக வரி விதிப்பு, அமெரிக்காவில் ஃபெடரல் கூட்டமைப்பு வட்டி விகிதத்தை குறைத்தது, பொருளாதார மந்தம், உற்பத்தி குறியீடு, வேலைவாய்ப்பு குறியீடு சரிவு ஆகியவற்றால் முதலீட்டாளர்கள் தங்கத்தின் பக்கம் திரும்பி, முதலீடு செய்ததால் தங்கம் விலை உயர்ந்துவந்தது. இப்போது, ரஷியா, ஹாங்காங், ஐரோப்பிய மத்திய வங்கி ஆகியவை தங்களிடம் உள்ள டாலர்களை விற்று, தங்கத்தை வாங்கி குவித்து வருகின்றன.

இதன்காரணமாக, சர்வதேச சந்தையில் தங்கம் விலை உயர்ந்து வருகிறது. அதன் தாக்கம் உள்நாட்டில் எதிரொலிப்பதால் தங்கம் விலை தொடர்ந்து உயர்ந்து வருகிறது. தங்கம் விலை விரைவில் ரூ.30 ஆயிரத்தை தொடும் என்றார் அவர்.
செவ்வாய்க்கிழமை விலை 

ரூபாயில் (ஜி.எஸ்.டி. தனி):
1 கிராம் தங்கம் ................... 3,627
1 பவுன் தங்கம் .................. 29,016
1 கிராம் வெள்ளி ................. 49.00
1 கிலோ வெள்ளி ................. 49,000

இந்தியாவின் பருத்தி நூல் ஏற்றுமதி தொடர்ந்து சரிவடைந்து வருவதால் நூற்பாலைகளின் உரிமையாளர்கள் கவலையடைந்துள்ளனர்.
உலகில் அதிகம் பருத்தி உற்பத்தி செய்யும் நாடுகளில் முன்னணியில் இருப்பது இந்தியா. இந்திய ஜவுளித் துறையின் மிக முக்கியப் பிரிவுகளில் ஒன்று பருத்தி நூல் தயாரிப்பு. உலகின் மொத்த பருத்தி நூல் தேவையில் 26 சதவீதத்தை இந்தியா பூர்த்தி செய்கிறது. நாட்டின் மொத்த பருத்தி நூல் உற்பத்தியில் 32 சதவீதம் வெளிநாடுகளுக்கு ஏற்றுமதியாகி வருகிறது. ஆனால் கடந்த 3 ஆண்டுகளில் இது 27 சதவீதமாக குறைந்துள்ளது.
கடந்த 2013-14-ஆம் நிதி ஆண்டில் இந்தியாவில் உற்பத்தியான மொத்த பருத்தி நூலில் மூன்றில் ஒரு பங்கான 1,310 மில்லியன் கிலோ வெளிநாடுகளுக்கு ஏற்றுமதி செய்யப்பட்டது. ஆனால் கடந்த 2014-ஆம் ஆண்டு முதல் ஏற்றுமதியாளர்களுக்கு வழங்கப்பட்டு வந்த பல்வேறு சலுகைகள் திரும்பப் பெற்றுக் கொள்ளப்பட்டுவிட்டது. இதனால் 2017-18 -ஆம் ஆண்டில் பருத்தி நூல் ஏற்றுமதி 1,097 மில்லியன் கிலோவாக குறைந்தது.
உலக உற்பத்தியில் 47 சதவீத பருத்தி நூலை கொள்முதல் செய்யும் சீனாதான், இந்தியாவின் நூலை இறக்குமதி செய்வதில் முதலிடத்தில் உள்ளது. அடுத்த இடத்தில் ஐரோப்பிய ஒன்றியம் உள்ளது.
இந்திய நூலுக்கு சீனாவில் 3.5 சதவீதமும், ஐரோப்பிய ஒன்றியத்தில் 4 சதவீதமும் இறக்குமதி வரி விதிக்கப்படுகிறது. வியத்நாம், இந்தோனேஷியா போன்ற நாடுகளுக்கு வரி விலக்கு வழங்கப்பட்டுள்ளது.
இதனால் சீனாவும், ஐரோப்பிய ஒன்றியமும் இந்தியாவில் இருந்து இறக்குமதி செய்வதை குறைத்துக் கொண்டு வியத்நாம், இந்தோனேஷியா போன்ற நாடுகளில் இருந்து பருத்தி நூலை அதிகமாக இறக்குமதி செய்கின்றன. இது இந்தியாவின் உள்நாட்டுத் தேவையைக் காட்டிலும் கூடுதலாக நூலைத் தயாரித்து வரும் இந்திய நூற்பாலைகளுக்கு பாதிப்பை ஏற்படுத்தியுள்ளது.
கடந்த சில ஆண்டுகளாகவே நூல் ஏற்றுமதி குறைந்து வந்தாலும் நடப்பு நிதியாண்டின் முதல் காலாண்டில் (ஏப்ரல் - ஜூன்) கடந்த ஆண்டைக் காட்டிலும் 33 சதவீதம் அளவுக்கு சரிந்திருப்பது அதிர்ச்சி அளிக்கிறது என்கிறார் இந்திய பருத்தி ஜவுளி ஏற்றுமதி ஊக்குவிப்பு கவுன்சில் (டெக்ஸ்புரோசில்) தலைவரான கே.வி.ஸ்ரீனிவாசன்.
இதுகுறித்து அவர் மேலும் கூறியதாவது:
கடந்த 2018-ஆம் ஆண்டு ஏப்ரல் மாதத்தில் 10.70 கோடி கிலோ நூல் ஏற்றுமதியாகியிருந்த நிலையில் நடப்பு ஆண்டு அதே காலகட்டத்தில் 16 சதவீதம் குறைந்து 9 கோடி கிலோ நூல் மட்டுமே ஏற்றுமதியாகியுள்ளது. அதேபோல மே மாதத்தில் 30 சதவீதம் குறைவாக 7.7 கோடி கிலோ மட்டுமே பருத்தி நூல் ஏற்றுமதியானது.
ஜூன் மாதத்தில் கடந்த 5 ஆண்டுகளில் இல்லாத அளவுக்கு மிகவும் குறைவாக, அதாவது 5.9 கோடி கிலோ நூல் மட்டுமே ஏற்றுமதியானது. இது கடந்த ஆண்டு ஜூன் மாதத்துடன் ஒப்பிடும்போது சுமார் 50 சதவீதம் குறைவாகும். இந்த நிலைமைதான் நூற்பாலைகளை வெகுவாக கவலை அடையச் செய்துள்ளது.
இந்த நிலையில் ஏப்ரல் முதல் பாகிஸ்தானுக்கும் இறக்குமதி வரி விலக்கு அளிக்கப்பட்டிருப்பதால், இனி பாகிஸ்தானில் இருந்தும் சீனா தனக்குத் தேவையான நூலைக் கொள்முதல் செய்து கொள்ளும்.
அமெரிக்காவுக்கும் சீனாவுக்கும் இடையே நடைபெற்று வரும் வர்த்தகப் போரின் தீவிரம் வரும் மாதங்களில் மேலும் தீவிரமடையும் என்று எதிர்பார்க்கப்படுகிறது. சீனாவில் இருந்து இறக்குமதியாகும் சுமார் 300 பில்லியன் டாலர் பொருள்களுக்கும் கூடுதலாக 10 சதவீதம் வரி விதிக்கப்படும் என அமெரிக்க அதிபர் கூறியுள்ளார்.
இந்தப் பொருள்களில் ஆடை வகைகளும் இருக்கும் என்பதால், ஏற்கெனவே ஜவுளி உற்பத்தியைக் குறைத்து வரும் சீனா, மேலும் கூடுதலான அளவில் குறைப்பதற்குத் திட்டமிட்டுள்ளது. இதனால் இந்தியாவில் இருந்து சீனாவுக்கான நூல் ஏற்றுமதி மேலும் குறையும். கடந்த மாதங்களில் ஏற்பட்டுள்ள சரிவால் நலிந்து வரும் நூற்பாலைகளுக்கு இது மேலும் ஒரு பேரிடியாகவே இருக்கும்.
எனவேதான் ஏற்றுமதிக்கான ஊக்கத் தொகை, வட்டி சலுகை, மத்திய, மாநில அரசுகளின் ஏற்றுமதிக்கான வரிகளை திரும்பப் பெறும் சலுகை, சர்வதேச விலைக்கு நிகராக இந்திய நூலின் விலையைக் கொண்டுவருவது போன்ற நடவடிக்கைகளை மத்திய அரசு அறிவிக்க வேண்டும் என வலியுறுத்தி வருகிறோம் என்றார்.
இது குறித்து தென்னிந்திய பஞ்சாலைகள் சங்கப் பொதுச் செயலர் கே.செல்வராஜு கூறியதாவது:
இந்திய அரசு பருத்தி நூலை மூலப் பொருள் என்று தொடர்ந்து தவறாகக் கருதி வருவதால்தான் இந்தச் சிக்கல் ஏற்பட்டிருக்கிறது. அதனால்தான் நூலுக்கு சலுகை வழங்க மறுக்கின்றனர். நூலுக்குச் சலுகை வழங்கினால் ஏற்றுமதி அதிகரித்து உள்நாட்டில் விலை உயர்ந்துவிடும் என தவறாகக் கருதுகின்றனர். இந்தியாவில் தமிழகம் உள்ளிட்ட பல மாநிலங்களில் மூலதனச் சலுகை, வட்டிச் சலுகைகள், புதிய ஜவுளிக் கொள்கைகள் கொண்டுவந்ததால் நாட்டின் ஒட்டுமொத்த நூல் உற்பத்தித் திறன் அதிகரித்துள்ளது.
உள்நாட்டுத் தேவைக்கு அதிகமாக சுமார் 1 கோடி நூற்புக் கதிர்கள் வரை இந்தியாவில் உள்ளன. இதன் மூலம் ஏற்றுமதி தொழில் நன்றாக நடைபெற்று வந்தது. பஞ்சு ஏற்றுமதி நலிவடைந்துள்ள நிலையில், தற்போது நூல் ஏற்றுமதியும் சரிந்ததால் நூற்பாலைகள் நெருக்கடியை சந்தித்துள்ளன. நூல் ஏற்றுமதிக்கு அரசு வழிவகை செய்தால் பருத்தி விவசாயிகளுக்கு நல்ல வருவாய் கிடைக்கும். இந்த ஆண்டு கூட குறைந்தபட்ச ஆதரவு விலை வழங்குவதற்கு ரூ.2 ஆயிரம் கோடி ஒதுக்கப்பட்டுள்ளது. நூல் ஏற்றுமதி நல்ல நிலையில் இருந்தால் விவசாயிகளுக்கும் நல்ல வருவாய் கிடைக்கும்.
அதேபோல ஒரு சதவீத மார்க்கெட் கமிட்டி வரி, தொழில் வரி, மின்சார வரி, எரிபொருள்களுக்கான வரிகள் எல்லாம் சேர்த்து 5 சதவீதம் வரை ஆகிறது. இந்த வரிகளையும் திரும்பக் கிடைக்கும்படி செய்ய வேண்டும். ஜவுளித் துறை அமைச்சகம் எங்களது நிலைமையை புரிந்து கொண்டிருந்தாலும், வர்த்தகம், நிதி அமைச்சகங்களும் இதைப் புரிந்துகொள்ள வேண்டும்.
நூற்பாலைகள் மிகப் பெரிய மூலதனத்தில் தொடங்கக் கூடிய தொழிலாக இருப்பதால் அவை நலிவடைந்தால் உடனடியாக மீட்க முடியாமல் போய்விடும். எனவே இந்த விஷயத்தில் மத்திய அரசு உடனடியாக கவனம் செலுத்தினால் நாட்டின் பல நூற்பாலைகள் காப்பாற்றப்படும் என்றார்.

வெள்ளிக்கிழமை, 02 ஆகஸ்ட் 2019 00:00

டாட்டா மோட்டார்ஸ் விற்பனையில் வீழ்ச்சி

Written by

உள்நாட்டைச் சேர்ந்த டாடா மோட்டார்ஸ் சென்ற ஜூலை மாதத்தில் 32,938 வாகனங்களை விற்பனை செய்துள்ளது. இது, கடந்த ஆண்டின் இதே கால அளவில் விற்பனையான 50,100 வாகனங்களுடன் ஒப்பிடுகையில் 34 சதவீதம் குறைவாகும். 
உள்நாட்டு சந்தையில் பயணிகள் வாகன விற்பனை 31 சதவீதம் சரிந்து 10,485-ஆனது. வணிக பயன்பாட்டுக்கான வாகன விற்பனை 34,817 என்ற எண்ணிக்கையிலிருந்து 36 சதவீதம் குறைந்து 22,453-ஆனது.

நிறுவனத்தின் வாகன ஏற்றுமதி (பயணிகள் மற்றும் வர்தத்தக வாகனம்) ஜூலை மாதத்தில் 32 சதவீதம் வீழ்ச்சியைடந்து 3,374-ஆக இருந்தது என டாடா மோட்டார்ஸ் வெள்ளிக்கிழமை வெளியிட்ட அறிக்கையில் தெரிவித்துள்ளது.

தமிழகத்தில், எப்போதும் இல்லாத வகையில், முதல் முறையாக, சவரன் ஆபரண தங்கம் விலை, 27 ஆயிரம் ரூபாயை தாண்டி, புதிய சாதனை படைத்துள்ளது.சர்வதேச நிலவரங்களுக்கு ஏற்ப, சென்னையில், தங்கம் விலை, தினமும் நிர்ணயம் செய்யப்படுகிறது. புகழ்பெற்ற தங்க நகை நிறுவனங்களின், தலைமை கிளைகள், சென்னையில் உள்ளன. இதனால், சென்னையில் நிர்ணயிக்கப்படும், தங்கம் விலையே, தமிழகம் முழுவதும் பின்பற்றப்படுகிறது.

அமெரிக்கா, சீனா இடையேயான வர்த்தக போர்; அமெரிக்கா, ஈரான் இடையில் நிலவும் போர் பதற்றம் உள்ளிட்ட காரணங்களால், சர்வதேச சந்தையில், தங்கம் விலை உயர்ந்துள்ளது. இதனால், சமீப காலமாக, உள்நாட்டிலும், தங்கம் விலை தொடர்ந்து உயர்ந்து வருகிறது.அதன்படி, சென்னையில், ஜூலை, 19ல், 22 காரட் ஆபரண தங்கம், கிராம், 3,363 ரூபாய்க்கும்; சவரன், 26 ஆயிரத்து, 904 ரூபாய்க்கும் விற்பனையானது. இதுவே, தங்கம் விலையில், உச்சபட்ச அளவாக இருந்தது. பின், அதன் விலை குறைந்தது. நேற்று முன்தினம், கிராம் தங்கம், 3,310 ரூபாய்க்கும்; சவரன், 26 ஆயிரத்து, 480 ரூபாய்க்கும் விற்பனை செய்யப்பட்டது. ஒரு கிராம் வெள்ளி, 43.70 ரூபாய்க்கு விற்பனையானது.இந்நிலையில், நேற்று ஒரே நாளில், தங்கம் விலை கிராமுக்கு, 73 ரூபாய் உயர்ந்து, 3,383 ரூபாய்க்கு விற்பனையானது. சவரனுக்கு, அதிரடியாக, 584 ரூபாய் அதிகரித்து, 27 ஆயிரத்து, 64 ரூபாய்க்கு விற்பனை செய்யப்பட்டது.

இதையடுத்து, தங்கம் வரலாற்றில், முதல் முறையாக, சவரன், 27 ஆயிரம் ரூபாயை தாண்டி, புதிய சாதனை படைத்துள்ளது.வெள்ளி விலை கிராமுக்கு, 60 காசு உயர்ந்து, 44.30 ரூபாய்க்கு விற்பனையானது.இதுகுறித்து, சென்னை தங்கம் மற்றும் வைர நகை வியாபாரிகள் சங்க தலைவர், ஜெயந்திலால் சலானி கூறியதாவது: அமெரிக்காவில் உள்ள, அனைத்து வங்கிகளின் கூட்டமைப்பான, 'பெடரல்' வங்கி, சில தினங்களுக்கு முன், வைப்பு நிதிக்கான வட்டியை, 0.25 சதவீதம் மட்டும், குறைக்க போவதாக தீர்மானம் நிறைவேற்றி உள்ளது.

சீனாவில் இருந்து, தங்கள் நாட்டிற்கு இறக்குமதி செய்யப்படும் பொருட்களுக்கு, அமெரிக்கா, கூடுதலாக, 10 சதவீதம் இறக்குமதி வரி விதித்துள்ளது. இந்த வரி விதிப்பால், உலக பொருளாதாரம் பாதிக்கும் சூழல் உருவாகியுள்ளது. மேலும், அமெரிக்க டாலர் மதிப்பும், சற்று குறைந்து வருகிறது. இதனால், டாலரில் முதலீடு செய்திருந்த முதலீட்டாளர்கள், அதை மாற்றி, தங்கத்தில் முதலீடு செய்து வருகின்றனர்.சர்வதேச சந்தையில், ஆக., 1ல், 1,402 அமெரிக்க டாலர், அதாவது, 98 ஆயிரத்து, 140 ரூபாய்க்கு விற்பனையான, 31 கிராம் எடை உடைய, ஒரு, 'அவுன்ஸ்' தங்கம், தற்போது, 1,437 டாலராக, அதாவது, 1 லட்சத்து, 590 ரூபாயாக அதிகரித்துள்ளது.

ஒரு நாளில் மட்டும், 35 டாலர், அதாவது, 2,450 ரூபாய் வரை உயர்ந்துள்ளது. இதன் விளைவாக, இந்தியாவில், தங்கம் விலை உயர்ந்துள்ளது. இந்த விலை உயர்வு நீடிக்கும். இவ்வாறு, அவர் கூறினார்.

உடுமலை சந்தையில் நாட்டு தக்காளி வரத்து அதிகரித்துள்ளதால், வெளியூர் வியாபாரிகள் அதிகளவில் வந்து வாங்கி செல்கின்றனர்.

உடுமலை, மடத்துக்குளம் பகுதிகளில் சுமார் 5 ஆயிரம் ஏக்கரில் விவசாயிகள் நாட்டு தக்காளி பயிரிட்டுள்ளனர். தற்போது தக்காளி விளைச்சல் அதிகரித்துள்ளதால், உடுமலை சந்தைக்கு வரத்து அதிகரித்துள்ளது.கடந்த மாதம் தலா 14 கிலோ கொண்ட 2 ஆயிரம் பெட்டிகள் வரத்து இருந்தது. தற்போது தினசரி 5 ஆயிரம் முதல் 6 ஆயிரம் பெட்டிகள் வரை வருகின்றன.

கடந்த மாதம் ஒரு பெட்டி தக்காளி ரூ.550-க்கும், சில்லரை விற்பனையில் கிலோ ₹40 முதல் ₹45க்கும் விற்றது. தற்போது வரத்து அதிகரிப்பால், ஒரு பெட்டி ₹250-க்கும், சில்லரை விலையில் கிலோ ₹12 முதல் ரூ.15 வரையும் விற்பனையாகிறது.இருப்பினும் விவசாயிகள் மகிழ்ச்சி அடைந்துள்ளனர். கடந்த 2 ஆண்டுகளுக்கு பின் தற்போது உடுமலை தக்காளி மார்க்கெட் களை கட்டி உள்ளது.

வெள்ளிக்கிழமை, 19 ஜூலை 2019 00:00

ரூ.27 ஆயிரத்தை நெருங்குகிறது தங்கம்

Written by

ஆபரணத் தங்கத்தின் விலை ரூ.27 ஆயிரத்தை நெருங்குகிறது. சென்னையில் வெள்ளிக்கிழமை பவுனுக்கு ரூ.248 உயர்ந்து, ரூ.26,904-க்கு விற்பனை செய்யப்பட்டது.

சர்வதேச பொருளாதாரச் சூழல், உலகச் சந்தையில் தங்கத்தின் மதிப்பு, அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றின் அடிப்படையில் தங்கத்தின் விலை நிர்ணயிக்கப்படுகிறது. பல்வேறு காரணங்களால் கடந்த மாதம் முதலே தங்கம் விலை உயர்ந்து வந்தநிலையில், கடந்த 11-ஆம் தேதி பவுன் ரூ.26,640-க்கு விற்பனை செய்யப்பட்டது. அதன்பிறகு, ஏற்ற, இறக்கங்களை சந்தித்து வந்தது.

இதற்கிடையில், கடந்த வியாழக்கிழமை ஆபரணத் தங்கத்தின் விலை மீண்டும் புதிய உச்சத்தைத் தொட்டது. பவுனுக்கு ரூ.304 உயர்ந்து, ரூ.26,656-க்கு விற்பனை செய்யப்பட்டது. தங்கம் விலை உயர்வுக்கு அமெரிக்காவில் ஃபெடரல் வங்கி கூட்டமைப்பு வைப்பு நிதியின் வட்டியை உயர்த்தாததால், முதலீட்டாளர்கள் தங்கத்தில் அதிக அளவு முதலீடு செய்து வருவது முக்கிய காரணம் என்று தங்க நகை வியாபாரிகள் தெரிவித்தனர்.

இந்நிலையில், சென்னையில் ஆபரணத் தங்கத்தின் விலை ரூ.27 ஆயிரத்தை நெருங்குகிறது. வெள்ளிக்கிழமை பவுனுக்கு ரூ.248 உயர்ந்து, ரூ.26,904-க்கு விற்பனை செய்யப்பட்டது. ஒரு கிராம் தங்கம் ரூ.31 உயர்ந்து, ரூ.3,363-க்கு விற்பனை செய்யப்பட்டது. வெள்ளி கிராமுக்கு 80 பைசா உயர்ந்து, ரூ.44.60 ஆகவும், கட்டி வெள்ளி கிலோவுக்கு ரூ.800 அதிகரித்து, ரூ.44,600 ஆகவும் இருந்தது.
வெள்ளிக்கிழமை விலை

ரூபாயில் (ஜி.எஸ்.டி. தனி):

1 கிராம் தங்கம் ............. 3,363
1 பவுன் தங்கம் ............. 26,904
1 கிராம் வெள்ளி .......... 44.60
1 கிலோ வெள்ளி ......... 44,600

வியாழக்கிழமை விலை ரூபாயில் (ஜி.எஸ்.டி. தனி):

1 கிராம் தங்கம் ............. 3,332
1 பவுன் தங்கம் ............. 26,656
1 கிராம் வெள்ளி .......... 43.80
1 கிலோ வெள்ளி .......... 43,800

வார வர்த்தகத்தின் முதல் நாளான இன்று, இந்தியப் பங்குச்சந்தை உயர்வுடன் தொடங்கின. தேர்தலுக்கு பிந்தைய கருத்துக்கணிப்புகள் நேற்று வெளியான நிலையில், 2014 ஆம் ஆண்டைப் போலவே பாஜக அதிக தொகுதிகளை கைப்பற்றி மீண்டும் ஆட்சி அமைக்கும் என்று தெரிவிக்கப்பட்டுள்ளது.

இதன் எதிரொலியாக இன்று காலை சென்செக்ஸ் 950 புள்ளிகள் வரை ஏற்றம் கண்டது. இன்றைய வர்த்தகத்தின் தொடக்கத்தில் சென்செக்ஸ் 962.12 புள்ளிகள் அதிகரித்து, 38,892.89 புள்ளிகளிலும், நிஃப்டி 286.95 புள்ளிகள் உயர்ந்து, 11,694.10 புள்ளிகளிலும் வர்த்தகமாகின.

 

அமெரிக்காவின் வரி உயர்வு நடவடிக்கையால், சீனாவில் இருந்து அதிக அளவில் மலிவு விலை பொருட்கள் குவியும் அபாயம் உள்ளது.

கடந்த வாரம், அமெரிக்கா, 20 ஆயிரம் கோடி டாலர் மதிப்பிலான சீனப் பொருட்களுக்கு, 10 - 25 சதவீதம் வரி உயர்வை அமல்படுத்தியது. அத்துடன், மேலும், 30 ஆயிரம் கோடி டாலர் மதிப்பிலான பொருட்களுக்கு, வரி உயர்த்தப்படும் எனவும் அறிவித்துள்ளது. இதற்கு பதிலடியாக, அமெரிக்காவின், 6,000 கோடி டாலர் மதிப்புள்ள பொருட்களின் வரியை, சீனா உயர்த்தியுள்ளது.

இந்த பரஸ்பர வர்த்தகப் போரால், சீனாவின் மலிவு விலை பொருட்கள், அதிக அளவில் இந்தியாவில் குவியும் அபாயம் உள்ளதாக, தர நிர்ணய நிறுவனமான, 'இந்த் - ரா' எச்சரித்துள்ளது. இது குறித்து, இந்நிறுவனம் வெளியிட்டுள்ள அறிக்கை: அமெரிக்காவின் வரி உயர்வை சமாளிக்க, இந்தியா உள்ளிட்ட வளரும் நாடுகளில், சீனா ஏற்றுமதியை அதிகரிக்கும். இதனால், இந்தியாவின் உற்பத்தி மற்றும் தேவைப்பாட்டிற்கான இடைவெளி குறையும். உள்நாட்டு வர்த்தகம், குறிப்பாக, மின்னணு சாதனங்கள், இரும்பு, உருக்கு மற்றும் இயற்கை ரசாயனப் பொருட்கள் அதிக அளவில் குவியும்.

 

கடந்த ஆண்டு, சீனாவில் இருந்து, 54 ஆயிரம் கோடி டாலர் மதிப்பிலான பொருட்களை, அமெரிக்கா இறக்குமதி செய்தது. இது, அமெரிக்காவின் மொத்த இறக்குமதியில், 18 சதவீதம்; மொத்த உள்நாட்டு உற்பத்தியில், 2.34 சதவீதம். இந்த அளவிற்கு சீனாவை, அமெரிக்கா சார்ந்துள்ளது. அதனால், வரி உயர்வு காரணமாக, அமெரிக்காவில் பொருட்கள் விலை உயரும். இது, அந்நாட்டின் பணவீக்க உயர்வுக்கு வழி வகுக்கும். அமெரிக்க முதலீட்டாளர்களின் அன்னிய முதலீடுகள் குறையும். இதுவும், இந்தியாவிற்கு சாதகமற்ற அம்சம் தான்.

அதுபோல, சீனா, அதன் யுவான் கரன்சி மதிப்பை குறைத்தால், அது, அன்னியச் செலாவணிக்கு நிகரான இந்திய ரூபாய் மதிப்பு குறைய வழி வகுக்கும். இவ்வாறு அதில் கூறப்பட்டுள்ளது.

மே 23 ம் தேதி வெளியாக உள்ள லோக்சபா தேர்தல் முடிவுகள் எப்படி இருக்குமோ என்ற பதற்றம் இந்திய பங்குச்சந்தைகளையும் விட்டு வைக்கவில்லை. பிரதமர் மோடி மீண்டும் ஆட்சிக்கு வருவது கடும் போட்டியாகுமோ என்ற பயம் மற்றும் பதற்றம் காரணமாக பங்குச்சந்தைகள் , ரூபாய் மதிப்பு ஆகியன சரிவுடனேயே காணப்படுகின்றன.

விவசாயிகள் பிரச்னை, வேலையின்மை பிரச்னை ஆகியவற்றால் 2014 லோக்சபா தேர்தலை போன்ற மற்றொரு மாபெரும் வெற்றியை பிரதமர் மோடி பெறுவதில் சந்தேகம் எழுந்துள்ளது. நீண்டகால முதலீடுகளை மேற்கொள்வதில் இந்திய முதலீட்டாளர்கள் தயக்கம் காட்டி வருகின்றனர். பங்குச்சந்தைகள், பாண்டுகள் மதிப்பு கடுமையாக சரிவடையவும், சர்வதேச சந்தையில் ரூபாய் மதிப்பு 75 வரை செல்லவும் வாய்ப்புள்ளதாக சந்தை நிபுணர்கள் சிலர் தெரிவித்துள்ளனர்.

உலகின் மிகப் பெரிய ஜனநாயக நாடான இந்தியாவின் புதிய அரசை தேர்வு செய்வதற்கான பணிகள் மே 23 ல் துவங்க உள்ள நிலையில் இந்திய பங்குச்சந்தைகள் தள்ளாட்டத்துடன் காணப்படுகின்றன. டிசம்பர் மாதத்தில் நடந்த சட்டசபை தேர்தல்களில் 3 மாநிலங்களில் பா.ஜ., ஆட்சியை இழந்த போது, ஓட்டு எண்ணிக்கை நாளன்று இந்திய ரூபாய் மதிப்பு மிகவும் சரிந்தது. கிட்டதட்ட அதே போன்றதொரு நிலை தான் தற்போதும் ஏற்பட்டுள்ளதாக கூறப்படுகிறது.

மத்தியில் ஆளும் பா.ஜ., தோல்வி அடைந்தாலோ அல்லது தனிப்பெரும்பான்மையை பெற தவறினாலோ பங்குச்சந்தைகளும், ரூபாய் மதிப்பும் கடுமையான சரிவை சந்திக்கும் நிலை ஏற்படும் என பொருளாதார நிபுணரான பிரகாஷ் சக்பால் தெரிவித்துள்ளார். அதே சமயம், பா.ஜ., மீண்டும் ஆட்சிக்கு வந்து பங்குச் சந்தைகளும், உள்நாட்டு பொருளாதாரமும் ஸ்திர தன்மையுடனும், உயர்வுடனும் இருக்கும் உதவி செய்யும் என மும்பையில் உள்ள சில நிறுவனங்கள் நம்பிக்கை தெரிவித்துள்ளன. 

 

பக்கம் 1 / 23
Top
We use cookies to improve our website. By continuing to use this website, you are giving consent to cookies being used. More details…