JoomlaLock.com All4Share.net

Background Video

பொதுமக்கள் போராட்டம் காரணமாக கேரளாவின் பாலக்காடு பகுதியில் மீண்டும் ஆலையை தொடங்க மாட்டோம் என கோககோலா நிறுவனம் தெரிவித்துள்ளது.

உச்சநீதிமன்றத்தில் இதுதொடர்பாக நடந்து வரும் வழக்கில் கோககோலா தாக்கல் செய்த பதில் மனுவில் இத்தகவலை தெரிவித்துள்ளது. பாலக்காடு மாவட்டம் பிளாசிமாடா பகுதியில் கோககோலா ஆலை இயங்கி வந்தது. தண்ணீரை அதிகம் உறிஞ்சி ஆலை அட்டகாசம் செய்வதாக உள்ளூர் மக்கள் எதிர்த்தனர்.

12 வருடமாக வழக்குகள் நடைபெற்று வருகின்றன. இதனால் ஆலை இயங்காமல் இருந்து வருகிறது.

கோககோலா தரப்பில் ஆஜரான மூத்த வழக்கறிஞர் கே.வி.விஸ்வநாதன், நீதிபதி ரோகின்டன் நாரிமன் தலைமையிலான அமர்வு முன்னிலையில் ஆஜராகி, தங்கள் மனு தாரருக்கு எதிரான மனு இனிமேல் செல்லாது என அறிவிக்க கோரினார்.

கோககோலா நிறுவனம், சர்ச்சைக்குரிய இடத்தில் மீண்டும் ஆலை திறக்கப்போவதில்லை என்பதால் இக்கோரிக்கையை வைப்பதாக அவர் தெரிவித்தார்.


இந்திய பங்குச்சந்தை வரலாற்றில் முதல்முறையாக சென்செக்ஸ் 32,000 புள்ளிகளை எட்டிப்பிடித்து புதிய சாதனை படைத்துள்ளது. தேசிய பங்குச்சந்தையான நிப்டியும் 9,900 புள்ளிகளை எட்டி உள்ளது.1999ம் ஆண்டிற்கு பிறகு முதல் முறையாக ஜூன் மாதத்தில் பணவீக்கம் வெகுவாக குறைந்துள்ளது.

இதன் எதிரொலியாக ரிசர்வ் வங்கியும் வட்டி விகிதத்தை குறைக்கும் என்ற எதிர்பார்ப்பு ஏற்பட்டுள்ளது. இதன் விளைவாக தொடர்ந்து 4வது நாளாக இந்திய பங்குச்சந்தைகள் ஏற்றத்துடன் துவங்கின.இன்றைய வர்த்தக நேர துவக்கத்தின் போது (ஜூலை 13, காலை 9 மணி நிலவரம்) 189.99 புள்ளிகள் உயர்ந்து 31,994.81 புள்ளிகளாகவும், நிப்டி 56.50 புள்ளிகள் உயர்ந்து 9872 புள்ளிகளாகவும் இருந்தது.

டாடா ஸ்டீல், டாடா மோட்டார்ஸ், எஸ்பிஐ, இன்போசிஸ் உள்ளிட்ட முன்னணி நிறுவனங்களின் பங்கு மதிப்பு வெகுவாக உயர்ந்ததன் காரணமாக காலை 9.30 மணியளவில் பங்குச்சந்தைகள் அதிரடியாக உயர்ந்து புதிய உச்சத்தை எட்டின.

சென்செக்ஸ் 215.60 புள்ளிகள் உயர்ந்து 32,020.42 புள்ளிகள், நிப்டி 62.40 புள்ளிகள் உயர்ந்து 9878.50 புள்ளிகள் என்ற அளவையும் எட்டி உள்ளன. மின்துறை, உலோகம், வங்கி துறை, ஆட்டோ துறை உள்ளிட்ட முக்கிய துறைகளின் பங்குகள் தொடர்ந்து ஏற்றத்துடனேயே காணப்படுவதால் பங்குச்சந்தை முதலீட்டாளர்கள் மகிழ்ச்சி அடைந்துள்ளனர்.

 

 

டாடா மோட்டார்‌‌ஸ் நிறுவனம் நானோ கார் உற்பத்தியை நிறுத்திக்கொள்ள வாய்ப்புள்ளதாக தகவல் வெளியாகியுள்ளது.
நானோ கார்கள் விற்பனை திருப்தி தரும் வகையில் இல்லாததால் இம்முடிவுக்கு டாடா மோட்டார்ஸ் வந்துள்ளதாக தெரிகிறது. கடந்த மே மாதம் மொத்தம் 355 நானோ கார்கள் மட்டுமே விற்பனையானதாக புள்ளிவிவரங்கள் தெரிவிக்கின்றன. எனினும் வெளிநாட்டு சந்தைகளுக்கு மட்டும் நானோ கார்களை தொடர்ந்து ஏற்றுமதி செய்ய அந்நிறுவனம் திட்டமிட்டுள்ளதாக தெரிகிறது.

மிகக் குறைந்த கட்டணத்தில் டேட்டா வழங்கி மற்ற தொலைதொடர்பு நிறுவனங்களை அதிர்ச்சி அடைய வைத்த ரிலையன்ஸ் ஜியோ நிறுவனம், அடுத்த அதிரடிக்கு தயாராகி உள்ளது.

ஜியோ அறிவித்த குறைந்த விலையில் 4ஜி டேட்டா திட்டத்தால் இந்த ஆண்டு ஏப்ரல் மாதம் வரை ஜியோ வாடிக்கையாளர்களின் எண்ணிக்கை 112.55 மில்லியனை எட்டி உள்ளது. இந்நிலையில் அடுத்த கட்டமாக ரூ.500 க்கு 4ஜி மொபைல்போன்களை விற்பனை செய்ய ஜியோ திட்டமிட்டுள்ளது. ரிலையன்ஸ் இண்டஸ்ட்ரீஸ் நிறுவனத்தின் ஆண்டு பொதுக் கூட்டம் ஜூலை 21 ம் தேதி நடக்க உள்ளது.

அன்றைய தினம் அல்லது ஆகஸ்ட் துவக்கத்தில் இத்திட்டத்தை ஜியோ முறைப்படி அறிமுகம் செய்ய உள்ளது. ரூ.1000 க்கு மொபைல் போன்களை விற்பனை செய்ய ஜியோ திட்டமிட்டுள்ளதாக கூறப்பட்டு வந்த நிலையில், எதிர்ப்பார்ப்புக்களை விட மேலும் விலையை குறைத்து, ஸ்மார்ட் போன்களை விற்பனைக்கு கொண்டு வர உள்ளது ஜியோ.

ஆகஸ்ட் 15 அன்று தங்களின் புதிய திட்டத்தை துவக்கவும், ஜியோ திட்டமிட்டுள்ளதாக கூறப்படுகிறது. வாடிக்கையாளர்களை கவருவதற்காக 2ஜி வாடிக்கையாளர்கள் இந்த புதிய போன் மூலம் நேரடியாக 4ஜி க்கு தங்களை மாற்றிக் கொள்ளலாம். இதன் விலை ரூ.500 ஆக நிர்ணயிக்கப்பட்டுள்ளது.

குறிப்பிட்ட எண்ணிக்கையிலேயே இந்த குறைந்த விலை ஸ்மார்ட்போனை விற்பனை செய்ய ஜியோ திட்டமிட்டுள்ளது. இருந்தாலும் 2ஜி வாடிக்கையாளர்கள் தங்களை 4ஜி க்கு மாற்றி கொள்வதற்காக இந்த போனை அதிகம் வாங்குவார்கள் என எதிர்பார்க்கப்படுகிறது.

இத்துடன் ஜியோ, தனது ‛டன் டனா டன்' சலுகையின் புதிய திட்டத்தின் ஆரம்ப விலையை மாதத்திற்கு ரூ.150 ஆக நிர்ணயித்துள்ளது. மேலும் ரூ.80 முதல் 90 என்ற சலுகை கட்டண திட்டத்தையும் ஜியோ அறிமுகம் செய்ய உள்ளது.

தற்போது டன் டனா டன் திட்டத்தில் ரூ.309 அல்லது ரூ.509 க்கு இலவச வாய்ஸ், அளவில்லா எஸ்.எம்.எஸ், ஜியோ ஆப்ஸ், தினமும் 1 முதல் 2 ஜிபி டேட்டா சேவையை வழங்கி வருகிறது. பிரைம் உறுப்பினர்களுக்கு இந்த சேவை ரூ.99 க்கு வழங்கப்பட்டு வருவது குறிப்பிடத்தக்கது.

ஜியோனி நிறுவனத்தின் குறிப்பிட்ட ஒரு சில ஸ்மார்ட்ஃபோன்களுக்கு 60 ஜிபி வரை இலவச டேட்டா வழங்குவதாக ரிலையன்ஸ் ஜியோ அறிவித்துள்ளது.

சீன நிறுவனமான ஜியோனி நிறுவனமும் - ரிலையன்ஸின் ஜியோவும் இணைந்து புதிய சலுகைகளை அறிவித்தள்ளது. அதன்படி, ஜூன் 16 ஆம் தேதிக்கு பின் வாங்கிய ஜியோனி pioneer P5L அல்லது ஜியோனி P7 ஃபோன்களுக்கு 2 ஜிபி 4ஜி கூடுதல் டேட்டா வழங்கப்படும்.

ஜியோனி எலைஃப் S6, ஜியோனி எலைஃப் s7, ஜியோனி மாரத்தான் M5, ஜியோனி Sபிளஸ், ஜியோனி s6எஸ், ஜியோனி F103 ப்ரோ, ஜியோனி மாரத்தான் M5 லைட் சிடிஎம்ஏ, ஜியோனி மாரத்தான் M4, மாரத்தான் M5 லைட், ஜியோனி P7 மேக்ஸ், ஜியோனி F103 வாங்குபவர்களுக்கு 5 ஜிபி அளவு இலவச கூடுதல் டேட்டா வழங்கப்படுகிறது.

மேலும், ஜியோனி A1, ஜியோனி மாரத்தான் M5 பிளஸ், ஜியோனி S6 ப்ரோ, ஜியோனி எலைஃப் E8 ஸ்மார்ட்ஃபோன்களை வாங்குபவர்களுக்கு 10 ஜிபி அளவு கூடுதல் டேட்டா வழங்கப்படுகிறது.

மேலே குறிப்பிடப்பட்டுள்ள இந்த குறிப்பிட்ட ஸ்மார்ட்ஃபோன் வாடிக்கையாளர்கள் வரும், 2018 ஆம் ஆண்டு மார்ச் 31 ஆம் தேதி வரை 6 முறை 309 ரூபாய்க்கு ரீசார்ஜ் செய்து 60 ஜிபி வரை கூடுதல் இலவச டேட்டாவை பெறலாம்.

இதேபோல், ஜியோனி நிறுவனத்தின் குறிப்பிட்ட ஸ்மார்ட்ஃபோன்களை வாங்குபவர்களுக்கு 500 ரூபாய் வரை கேஷ்பேக் கூப்பன்கள் வழங்கப்படுகிறது.

இணையதளத்தில் பொருட் களின் விற்பனை சேவைகள் குறித்து தேடும்போது, தனக்கு சாதகமான நிறுவனங்களுக்கு மட்டுமே முன்னுரிமை அளிக்கும் வகையில் மோசடி செய்ததாக, இணைய தேடு தளமான, 'கூகுள்' நிறுவனத்துக்கு, ஐரோப்பிய யூனியன், 17 ஆயிரத்து, 425 கோடி ரூபாயை அபராதமாக விதித்துள்ளது.

இணைய தேடு தளமான கூகுளில், பொருட்களின் விற்பனை சேவைகள் குறித்து தேடும்போது, தனக்கு சாதகமான நிறுவனங்களுக்கு முன்னுரிமை அளிப்பதாக, அதன் மீது, ஐரோப்பிய யூனியனின் நிறுவனங்கள் இடையேயான போட்டியை கண்காணிக்கும் அமைப்பில் வழக்கு தொடரப்பட்டது.

இது தொடர்பான வழக்குகளை ஏழு ஆண்டுகளாக விசாரித்து வந்த, ஐரோப்பிய யூனியன், கூகுள் நிறுவனத்துக்கு, 17 ஆயிரத்து, 425 கோடி ரூபாய் அபராதம் விதித்து தீர்ப்பளித்துள்ளது. ஒரு நிறுவனம் மீது, ஐரோப்பிய யூனியன் விதித்துள்ள அதிகபட்ச அபராதம் இது.

தன் தவறை, கூகுள் நிறுவனம், 90 நாட்களுக்குள் சீர் செய்யாவிட்டால், அதன் தினசரி மொத்த வருவாயில், 5 சதவீதத்தை கூடுதல் அபராதமாக விதிக்கப்படும் என்றும், தீர்ப்பில் கூறப்பட்டுள்ளது. 

அந்நிறுவனத்தின் மிகச் சமீபத்திய நிதி அறிக்கையின்படி, அதன் வருமானம் நாளொன்றுக்கு 14 மில்லியன் அமெரிக்க டாலர் ஆகும்.

 

பிளிப்கார்ட் நிறுவனம் ஆப்பிள், கூகுள், மோட்டோ உள்ளிட்ட ஸ்மார்ட்போன்களின் விலையில் அதிரடி தள்ளுபடியை வழங்கியுள்ளது. 

இணையதள விற்பனை சந்தையான பிளிப்கார்ட், அமேசான் உள்ளிட்ட நிறுவனங்கள் வாடிக்கையாளர்களை கவர்வதற்காக, அவ்வப்போது சிறப்பு சலுகைகளை அளித்து வருகிறது. இந்நிலையில், ஜிஎஸ்டி அறிவிப்பிற்கு பின், சில இணையதள விற்பனை சந்தைகள் ஸ்மார்ட்போன்கள் மற்றும் பிற மின்னணு சாதனங்களில் தள்ளுபடி சலுகைகளை வழங்குகின்றன.

அந்தவகையில், பிளிப்கார்ட், ஓன் யுவர் டிரீம் போன் (Own Your Dream Phone) எனும் விற்பனையை அறிவித்துள்ளது. இதில் ஐபோன் 5s, ஐபோன் 6s, ஐபோன் 6s பிளஸ், ஐபோன் 7, ஐபோன் 7 பிளஸ், கூகுள் பிக்சல், கூகுள் பிக்சல் XL, மோட்டோ இசட் உள்ளிட்ட ஸ்மார்ட்போன்களை சலுகை விலையில் விற்கிறது. இந்த சலுகை ஜுன் 22 முதல் 24 வரை அறிவிக்கப்பட்டுள்ளது.

அதன்படி, 128 ஜிபி கொண்ட ஐபோன் 7 பிளஸ், 25 சதவீதம் தள்ளுபடி விலையில் கிடைக்கிறது. ஐபோன் 7 32 ஜிபியின் விலை 60,000 ரூபாய். இதில் சுமார் 10,000 ரூபாய் தள்ளுபடி வழங்குகிறது.

மேலும், கூகுள் பிக்சல்களுக்கு 3,999 ரூபாய் வரை தள்ளுபடியும். ஒரு சில மாடல்களுக்கு 2000 ரூபாய் வரை எக்ஸ்சேன்ஜ் சலுகையும் வழங்கப்பட்டுள்ளது. இதனால் வாடிக்கையாளர்கள் மகிழ்ச்சி அடைந்துள்ளனர். 

சிங்கப்பூர் ஏர்லைன்ஸ் நிறுவனத்துடன் இணைந்து டாடா குழுமம் ஏர் இந்தியா நிறுவனத்தை வாங்க உள்ளதாக தகவல் வெளியாகி உள்ளது. 

 இந்தியாவில் முதன்முறையாக விமான சேவையை டாடா குழுமமே தொடங்கியது. பின்னர் 1953 ஆம் ஆண்டு இந்த விமான சேவையை மத்திய அரசு கையகப்படுத்தியது. அதன் பின்னர் இந்த நிறுவனத்தை தேசியமயமாக்கி ஏர் இந்திய நிறுவனமாக மத்திய அரசு மாற்றியது. 

 தற்போது ஏர் இந்தியா நிறுவனம் கடும் நஷ்டத்தை சந்தித்து வருகிறது. இந்நிலையில் டாடா குழுமத்தின் சேர்மன் சந்திரசேகரன் மத்திய அரசு வசம் உள்ள 51 சதவிகிதம் ஏர் இந்திய நிறுவனப்பங்குகளை பெற விருப்பம் தெரிவித்துள்ளதாக கூறப்படுகிறது. இதற்கான  பேச்சுவார்த்தை இறுதிக்கட்டத்தை எட்டியுள்ளதாக கூறப்படுகிறது.

ஏற்கெனவே ஏர் இந்தியா நிறுவனம் கடும் நஷ்டத்தை சந்தித்து வருவதாகவும் ஆகையால், தற்போதைய நிலவரப்படி 52 ஆயிரம் கோடி ரூபாய் கடனில் சிக்கி இருப்பதால் ஏர் இந்தியா நிறுவனத்தை விற்க விமான போக்குவரத்துத்துறை அமைச்சகம் முடிவெடுத்துள்ளதாக மத்திய நிதியமைச்சர் அருண் ஜேட்லி தெரிவித்து இருந்தார்.

ஏற்கெனவே ரூ.24 ஆயிரம் கோடி அளவிலான பங்குகளை ஏர் இந்திய நிறுவனத்தில் கொண்டுள்ள டாடா குழுமம் மேலும் 30 ஆயிரம் கோடி ரூபாய் செலுத்தி ஏர் இந்தியா நிறுவனத்தை வாங்க முடிவு செய்துள்ளதாக கூறப்படுகிறது. 

கடந்த 2013 ம் ஆண்டு அபோது டாடா குழுமத்தின் த்லைவராக இருந்த ரத்தன் டாடா ‘ ஏர் இந்தியா நிறுவனத்தை  திரும்ப்பப்பெற்றால் மகிழ்வேன்’ எனத் தெரிவித்திருந்தார். 

இந்த நிறுவனத்தை கைப்பற்றி சிங்கப்பூர் ஏர்லைனஸ் நிறுவனத்துடன் இணைந்து விமான சேவையாற்ற டாடா குழுமம் முடிவு செய்து இருப்பதாக தகவல்கள் வெளியாகி உள்ளன. 

ஆப்பிள் ஐஃபோன் 7, சாம்சங் கேலக்ஸி எஸ்7 மற்றும் கூகுள் பிக்சல் ஸ்மார்ட்ஃபோன்கள் ஆகியவை ஆன்லைன் ஸ்டோர்களில் மிகப்பெரிய தள்ளுபடி விலையில் கிடைக்கின்றன.

அலிபாபா டாட் காம், பேடிஎம் ஆகிய ஆன்லைன் ஸ்டோர்கள் ஆப்பிள், சாம்சங், கூகுள் ஃபோன்களை மிகப்பெரிய தள்ளுபடி விலையில் விற்பனை செய்கின்றன. மேலும் குறிப்பிட சதவீதம் பணத்தை ‘கேஷ்பேக்’ முறையில் திரும்பக் கொடுக்கின்றன.

ரூ.60,000 மதிப்புள்ள 32 ஜிபி ஆப்பிள் ஐஃபோன் 7, ரூ.45,000க்கு கிடைக்கிறது. செலுத்தும் ரூ.45 ஆயிரத்தில் ரூ.5,850 திரும்ப கேஷ்பேக் முறையில் கிடைக்கிறது. அதேபோல், ரூ.70,000 மதிப்புள்ள 128 ஜிபி ஆப்பிள் ஐஃபோன் 7, ரூ.53,000க்கு கிடைக்கிறது. இதில் ரூ.6,400 திரும்பக் கிடைக்கிறது.

ரூ.72,000 மதிப்புள்ள 32 ஜிபி ஆப்பிள் ஐஃபோன் 7 பிளஸ், ரூ.58,000க்கு கிடைக்கிறது. அதேபோல், ரூ.82,000 மதிப்புள்ள 128 ஜிபி ஆப்பிள் ஐஃபோன் 7 பிளஸ், ரூ.66,000க்கு கிடைக்கிறது.

இந்த இரண்டு ஃபோன்களுக்கும் ரூ.7,000 பணம் திரும்பக் கிடைக்கிறது. இதேபோல், சம்சங் கேலக்ஸி எஸ்7 மற்றும் கூகுள் பிக்சல் ஸ்மார்ட்ஃபோன்களும் கணிசமான தொகை தள்ளுபடியில் விற்பனைக்கு வந்துள்ளன. ஏற்கனவே, அமேசான், ஃபிளிப்கார்ட் போன்ற இகாமர்ஸ் தளங்கள் தள்ளுபடி அறிவித்துள்ளன.

தீபாவளி போன்ற பண்டிகைகளின் போதுதான் அதிரடி தள்ளுபடி.... விலைக்குறைப்பு என்றெல்லாம் அறிவிப்பார்கள். ஆனால் எலக்ட்ரானிக் பொருட்களுக்கு இப்போதே அதிரடி சலுகைகளை அறிவித்துள்ளனர் சில்லறை விற்பனையாளர்கள். அதற்குக் காரணம் ஜிஎஸ்டிதான்.

ஜூலை ஒன்று முதல் ஜிஎஸ்டி அமலுக்கு வருகிறது. அப்படி வரும்போது எலக்ட்ரானிக் பொருட்களுக்கு தற்போதைய 23 சதவீத வரி 28 சதவீதமாக உயரும். இதனால் டிவி, வாஷிங் மெஷின், ஏசி, ரெப்ரிஜிரேட்டர் போன்ற பொருட்களின் விலை மூன்றிலிருந்து ஐந்து சதவீதமாக உயர வாய்ப்பிருக்கிறது.

ஜிஎஸ்டி அமலுக்கு வரும் போது, கூடும் வரி காரணமாக மே மாதத்திற்கு முன்பு கொள்முதல் செய்த பொருட்களுக்கு 6 சதவீதமும் ஒரு வருடத்திற்கு முன்பு கொள்முதல் செய்து இப்போது வரையில் விற்பனை ஆகாமல் இருக்கும் பொருட்களுக்கு 14 சதவீதம் வரையிலும் நஷ்டம் ஏற்பட வாய்ப்புள்ளது.

எனவே ஜிஎஸ்டி வருவதற்குள் தங்களிடம் உள்ள பொருட்களை அதிக அளவில் விற்பனை செய்ய சில்லறை விற்பனையாளர்கள் இந்தச் சலுகைகளை அறிவித்து வருகின்றனர்.

சில்லறை விற்பனைக் கடைகள் மற்றும் அமேசான், ஃபிளிப்கார்ட், பேடிஎம் போன்ற ஆன்லைன் விற்பனையாளர்கள் 40 சதவீதம் வரையில் தள்ளுபடி அறிவித்துள்ளனர்

பக்கம் 4 / 20
Top
We use cookies to improve our website. By continuing to use this website, you are giving consent to cookies being used. More details…