JoomlaLock.com All4Share.net

Background Video

இலங்கை

இலங்கை (318)

நாடாளுமன்ற உறுப்பினர்களின் வாகன தீர்வை அனுமதிப்பத்திர துஸ்பிரயோகம் தொடர்பான வழக்கு விசாரணை ஒன்று நேற்று உயர்நீதிமன்றத்தில் இடம்பெற்றது.

சமூக ஆர்வலர் நாகாநந்த கொடிதுவக்கு இந்த மனுவை தாக்கல் செய்துள்ளார்.

குறித்த வழக்கு தொடர்பில் உரிய சாட்சியங்கள் இல்லை.

எனவே இதற்காக உயர்நீதிமன்றத்தில் முழுமை நீதியரசர்களின் விசாரணை அவசியம் இல்லை என்று சட்டமா அதிபர் தமது அறிக்கையை நீதிமன்றத்துக்கு சமர்ப்பித்தார்.

எனினும் வழக்காளியான கொடிதுவக்கு, ஏற்கனவே 10 வாகனங்களுக்கான தீர்வையற்ற அனுமதிப்பத்திரம் விநியோகிக்கப்பட்ட நிலையில் அவை ஒன்று 25 மில்லியன் ரூபா என்ற விலைகளில் விற்பனை செய்யப்பட்டுள்ளன என்று தெரிவித்தார்.

எனவே இது பொதுமக்களின் இறைமையை பாதிப்பதாக அவர் சுட்டிக்காட்டினார்.

எனவே உயர்நீதிமன்றத்தில் முழுமை அமர்வில் இது விசாரணை செய்யப்படவேண்டும் என்று அவர் கோரிக்கை விடுத்துள்ளார்.

செவ்வாய்க்கிழமை, 26 ஜூலை 2016 00:00

ரவூப் ஹக்கீமுக்கு வந்த நெருக்கடி!

Written by

ஸ்ரீலங்கா முஸ்லிம் காங்கிரஸ் கட்சியின் சொத்துக்கள் மற்றும் அவற்றின் நிர்வாகம் குறித்து கட்சியின் சிரேஷ்ட அங்கத்தவர்கள் பகிரங்கமாக கேள்வி எழுப்பியுள்ளனர்.

காலம் சென்ற அமைச்சர் அஷ்ரப், தான் உருவாக்கிய முஸ்லிம் காங்கிரஸ் கட்சி தொடர்ந்தும் செயற்பட வேண்டுமென்பதற்காக கட்சியின் பெயரில் சில சொத்துக்களை விட்டுச் சென்றிருந்தார்.

அவருக்குப் பின் கட்சியின் தலைமைத்துவத்துக்கு வந்த அமைச்சர் ஹக்கீம் குறித்த சொத்துக்களை நிர்வகிக்கும் பொறுப்பில் தனக்கு நெருக்கமானவர்களை ஈடுபடுத்தியுள்ளதாக குற்றச்சாட்டொன்று எழுந்துள்ளது.

இந்நிலையில் முஸ்லிம் காங்கிரஸ் கட்சியின் சொத்துக்கள் விபரம், அவற்றினை நிர்வகிப்போர் குறித்த விபரங்களை வெளியிடுமாறு கோரி அக்கட்சியின் மூத்த போராளிகளினால் கட்சித் தலைமைக்கு கடிதம் ஒன்று அனுப்பப்பட்டுள்ளது.

குறைந்த பட்சம் கட்சித் தலைமையகமான தாருஸ் ஸலாம் கட்டிடத்தில் இயங்கும் அலுவலகங்கள் அளிக்கும் வாடகை, கட்சிக்கு உரித்தான காணித்துண்டுகளின் விற்பனை மூலம் கிடைத்த வருமானம் போன்றவற்றுக்கு என்ன நடந்தது என்பது குறித்தாவது நாட்டு மக்களுக்குத் தெளிவுபடுத்தப்பட வேண்டும் என்றும் அவர்கள் வேண்டுகோள் விடுத்துள்ளனர்.

இது தொடர்பில் ஓரிரு வாரங்களுக்குள் கட்சித் தலைவர் அமைச்சர் ஹக்கீம் பதிலளிக்காது போனால் அவருக்கு எதிரான நடவடிக்கைகளில் இறங்கப் போவதாகவும் குறித்த கடிதத்தில் சுட்டிக்காட்டப்பட்டுள்ளது.

ஸ்ரீலங்கா சுதந்திரக் கட்சியை நேசிக்கும் எவரும் மஹிந்த ராஜபக்சவின் பாத யாத்திரையில் இணைந்து கொள்ள மாட்டார்கள் என கட்சியின் பொதுச் செயலாளர் துமிந்த திஸாநாயக்க தெரிவித்துள்ளார்.

சிங்கள பத்திரிகை ஒன்று எழுப்பிய கேள்விக்கு பதிலளித்த போது அவர் இதனைத் தெரிவித்துள்ளார்.

அவர் மேலும் கூறுகையில்,

ஸ்ரீலங்கா சுதந்திரக்கட்சியை நேசிக்கும் எந்தவொரு உறுப்பினரும் மஹிந்த ராஜபக்சவின் பாத யாத்திரையில் இணைந்து கொள்ளக்கூடிய சாத்தியமில்லை.

எதிர்வரும் 28ம் திகதி கண்டியில் ஆரம்பமாகும் பாத யாத்திரைக்கு சுதந்திரக் கட்சியின் அனுமதியோ அல்லது ஆதரவோ கிடையாது.

ஸ்ரீலங்கா சுதந்திரக் கட்சியை நேசிக்கும் நாடாளுமன்ற உறுப்பினர்கள், மாகாணசபை உறுப்பினர்கள், மாநகர சபை, நகரசபை மற்றும் உள்ளுராட்சி மன்ற உறுப்பினர்கள், தொகுதி அமைப்பாளர்கள் மற்றும் கட்சியின் உறுப்பினர்கள் இந்த பாத யாத்திரையில் இணைந்து கொள்ள மாட்டார்கள்.

அரசாங்கத்திற்கு எதிராக பாத யாத்திரை மேற்கொள்ள வேண்டுமென ஸ்ரீலங்கா சுதந்திரக் கட்சியின் மத்திய செயற்குழுவோ அல்லது தீர்மானம் எடுக்கும் வேறும் எந்தவொரு கூட்டத்திலோ தீர்மானிக்கப்படவில்லை என அவர் தெரிவித்துள்ளார்.

இது சிங்கள பௌத்த நாடு, இங்கு ஆட்சியாளர்கள் தான்தோன்றித்தனமாக செயற்படமுடியாதுஎன அஸ்கிரிய பீடத்தின் மகாநாயக்கர் வரகாகொட ஞானரத்ன தேரர் தெரிவித்துள்ளார்.

தேசிய மதத்திற்காக, இனத்திற்காக நாட்டில் இன்று சர்ச்சைகள் தோன்றியுள்ளதாகவும்அவர் மேலும் குறிப்பிட்டுள்ளார்.

இது தொடர்பில் ஆட்சியாளர்களிடம் கேட்டால் அவ்வாறு ஒன்றும் இல்லை என்றும், இதுபொய் பிரச்சாரம் என்றும் தெரிவிப்பதாக தேரர் தெரிவித்துள்ளார்.

மேலும் வீட்டிற்குள் முகமூடி அணிந்தால் வீதிக்கே வரவேண்டும். எனவே என்றாவது ஒருநாள் குறித்த பிரச்சினைகள் வெளியே வரும் என்றும் அவர் குறிப்பிட்டுள்ளார்.

கொழும்பு நேற்று சம்போதி விகாரையில் இடம்பெற்ற நிகழ்வொன்றில் கலந்து கொண்டபோதே அவர் இதனைத் தெரிவித்துள்ளார்.

இது சிங்கள பௌத்தர்களின் நாடு என்றும், சிங்களவர்களுக்கு இலங்கை மட்டுமே சொந்தநாடு என்றும், இந்த நாட்டில் உள்ள பிக்குகள் எந்தவொரு விடயத்திற்கும்பின்நிற்க மாட்டார்கள் என்றும் தேரர் சுட்டிக்காட்டியுள்ளார்.

கொடிய யுத்தத்தினால் உள்ளங்கள் உடைக்கப்பட்டுள்ளது. உள்ளங்கள் நொந்து போயுள்ளது. ஒவ்வொரு சமூகங்கள் சந்தேகக் கண்களுடன் பார்க்கின்ற நிலைமையே மன்னார் மாவட்டத்தில் உள்ளது. உள்ளங்கள் இணைக்கப்பட வேண்டும் மக்கள் மத்தியில் ஒற்றுமையினை ஏற்படுத்த அனைவரும் கை கோர்க்க வேண்டும் என மன்னார் மூர்வீதி யூம்மாப்பள்ளிவாசல் மௌலவி அசீம் தெரிவித்தார்.

வடமாகாண மீன்பிடி போக்குவரத்து அமைச்சின் மன்னார் மாவட்ட உப அலுவலகத்தில் நேற்று இடம்பெற்ற நிகழ்வு ஒன்றில் கலந்து கொண்டு உரையாற்றுகையிலேயெ அவர் அவ்வாறு தெரிவித்தார்.

அவர் மேலும் உரையாற்றுகையில்,

வடமாகாணத்தில் எமது மன்னார் மாவட்டம் முன்னிலையில் வருவதற்கு சொற்ப நேரம் கூட ஆகாது. இறைவன் நாடிவிட்டான். அந்த வகையில் நாங்கள் நம்பிக்கையுடன் முன்னேற்ற பாதைக்கு செல்ல வேண்டிய ஒரு தேவை இருந்து கொண்டிருக்கின்றது.

இஸ்ஸாத்தில் கடைசியாக வந்த இறை தூதர் சொன்னார்கள் 'தாழ்ந்த கையை விட உயர்ந்த கை சிறந்தது' என்று கூறினார்.

எனவே நாங்கள் எப்பொழுதும் மற்றவர்களின் உதவியை எதிர்பார்த்து சிந்தித்துக் கொண்டிருப்பதை விட, எமது திறமைகளை உணர்ந்து நாங்கள் எங்களை முன்னோக்கி மற்ற மக்களுக்கும் கொடுக்கக்கூடிய நிலைக்கு வரக்கூடிய நிலைமையினை நாங்கள் உணர்ந்து எங்களுக்குள்லேயே நாங்கள் ஏற்படுத்திக்கொள்ள வேண்டும்.

எங்களுடைய அரசியல்வாதிகள் குறிப்பாக அமைச்சர்கள் மக்களின் வாழ்க்கைத்தரத்தை முன்னேற்றுவதற்கு தங்களுடைய சிந்தனைகளில் இப்படியான உதவிகளை செய்கின்ற போது ஆன்மீகவாதிகளாக இருக்கின்ற மதத்தலைவர்களாகிய நாங்களும் மனித உள்ளங்களில் நல்ல எண்ணங்களையும், சிந்தனைகளையும் தோற்றுவிக்க முயற்சிக்கின்றோம்.

உள்ளங்கள் இணைக்கப்பட வேண்டும். கொடிய யுத்தத்தினால் உள்ளங்கள் உடைக்கப்பட்டுள்ளது. உள்ளங்கள் நொந்து போயுள்ளது.

சமூகங்கள் ஒன்றையொன்று சந்தேகக் கண்களுடன் பார்க்கின்ற நிலைமை இந்த மாவட்டத்திலேயே இருந்து கொண்டிருக்கின்றது.

தமிழ் பேசுகின்ற சமூகமாக இருக்கின்ற நாங்கள் மதத்தை வைத்து, இனத்தை வைத்து பிரித்து கிடக்கிறோம். எங்களுக்கு கிடைக்க வேண்டிய நியாயமான உரிமைகளை கூட இந்த பிரிவினை என்ற இனவாதம் மதவாதம் என்ற ஒன்றினை வைத்துக்கொண்டு தள்ளிப்போட்டுக் கொண்டிருக்கின்றனர்.

அதற்கு ஓர் சிறந்த உதாரணமாக வடமாகாணத்திற்கு கிடைக்க வேண்டிய பொருளாதார மத்திய நிலையம் ஒரு பேசும் பொருளாக இருப்பதனை நாங்கள் பார்க்கின்றோம்.

எங்களுக்குள் இருக்கின்ற அந்த பிரிவினைவாதத்தின் காரணமாக எங்களுக்கு கிடைக்க வேண்டிய பொருளாதார மத்திய நிலையம் எமது கையை விட்டு போய் விடுமோ என்ற ஓர் அச்ச நிலையில் நாங்கள் இருந்து கொண்டிருக்கின்றோம்.

எங்களுடைய அரசியல் தலைவர்களிடமும், அரசியல் கட்சிகளிடமும் ஒற்றுமையினை கொண்டு வருகின்ற சக்தி இந்த கிராம அபிவிருத்திச் சங்கம் மற்றும் மாதர் கிராம அபிவிருத்திச் சங்கங்களுக்கும் தாய் மார்களுக்கும் சகோதர சகோதரிகளுக்கும் இருக்கின்றது.

எனவே நீங்கள் ஒற்றுமையை ஏற்படுத்தி எங்களுக்குரிய உரிமையும், வளங்களையும் கொண்டு வாருங்கள்.

எனவே உங்களை தெரிவு செய்த எமது மாவட்டத்தை மிக மோசமான நிலைக்கு இட்டுச் செல்ல வேண்டாம் என்ற இந்த உறுதிப்பாட்டை நாங்கள் எடுக்க வேண்டும். எமது வாழ்க்கையில் கொண்டு வர வேண்டும்.

அதன்மூலம் உள்ளங்களில் நல்ல சிந்தனைகளை நாங்கள் ஏற்படுத்துவோம் என்றால் இறைவனுடைய உதவி நிச்சயமாக எங்களுக்கு கிடைக்கும்.

இறை உதவி எங்களுக்கு கிடைத்து விட்டது என்றால் எங்களுடைய முன்னேற்றத்தை எந்த சக்திகளினாலும் தடுத்து விட முடியாது என மேலும் தெரிவித்தார்.

பாராளுமன்றில் தயாரிக்கப்படும் உணவுகள் விசத் தன்மையான பாம் எண்ணெய் மூலம் தயாராவதாக நுகர்வோர் உரிமைகள் பர்துகாக்கும் தேசிய அமைப்பு தெரிவித்துள்ளது.

அத்துடன் நாடு பூராகவும் பல ஹோட்டல்கள் மற்றும் உயர் இடங்களில் குறித்த பாம் எண்ணெயை பயன்படுத்தப்படுவதாகவும் இந்த அமைப்பு சுட்டிக்காட்டியுள்ளது.

மேலும் போலி வியாபாரிகள் தமது வர்த்தகத்தை அதிகரித்துக்கொள்வதற்காக பாம் எண்ணெயுடன் பல நச்சுப்பொருட்களை கலந்து விற்பதாகவும்,

தமது அமைப்பு ஆராய்ந்து பார்த்ததில் பாராளுமன்றத்திலும் குறித்த எண்ணெய்யை பயன்படுத்தப்படுவதாக நுகர்வோர் உரிமை பாதுகாப்பு அமைப்பு சுட்டிக்காட்டியுள்ளது.

எனவே இது தொடர்பில் சபாநாயகருக்கும் கடிதம் அனுப்பியுள்ளதாகவும்,பொதுமக்களின் சுகாதாரம் தொடர்பில் கரிசனைக் காட்டி குறித்த எண்ணெய் தொடர்பில் ஆராய்ந்து நடவடிக்கை எடுக்குமாறு வலியுறுத்தியுள்ளதாகவும் அந்த அமைப்பு குறிப்பிட்டுள்ளது.

ஸ்ரீலங்கா சுதந்திரக் கட்சியின் எதிர்காலச் செயற்பாடுகளுக்கு ஒத்துழைப்பு வழங்காத பாராளுமன்ற உறுப்பினர்களிடம் இருந்து கட்சியின் அமைப்பாளர் பதவிகள் பறிக்கப்படும் என எச்சரிக்கை விடுக்கப்பட்டுள்ளது.

ஜனாதிபதி மைத்திரிபால சிறிசேன இந்த எச்சரிக்கையினை விடுத்துள்ளதாக அமைச்சர் மஹிந்த அமரவீர தெரிவித்துள்ளார்.

முன்னாள் ஜனாதிபதி மஹிந்த ராஜபக்ச ஆதரவு அணியில் உள்ள ஸ்ரீலங்கா சுதந்திரக் கட்சியின் பாராளுமன்ற உறுப்பினர்கள் நேற்று மாலை ஜனாதிபதியை சந்தித்து கலந்துரையாடியிருந்தனர்

இந்த சந்திப்பின் போது கருத்து வெளியிட்ட ஜனாதிபதி, எதிர்வரும் உள்ளூராட்சித் தேர்தலுக்கு முன்னர், ஸ்ரீலங்கா சுதந்திரக் கட்சி மறுசீரமைக்கப்படும்.

கட்சியின் செயற்பாடுகளுக்கு ஒத்துழைப்பு வழங்காதவர்களுக்கு பதிலாக புதிய அமைப்பாளர்கள் நியமிக்கப்படுவார்கள்.

புதிய கட்சியை உருவாக்கி, ஸ்ரீலங்கா சுதந்திரக் கட்சியை உடைக்கும் சதித்திட்டங்களுக்கு யாரும் துணைபோகக் கூடாது என ஜனாதிபதி எச்சரிக்கை விடுத்துள்ளதாக அமைச்சர் மஹிந்த அமரவீர மேலும் தெரிவித்துள்ளார்.

கல்வி இராஜாங்க அமைச்சர் வே.இராதாகிருஸ்ணன் மூலம் எதிர்வரும் வாரங்களில் 16 திருவள்ளுவர் சிலைகள் இலங்கைக்கு கொண்டுவரப்பட உள்ளதாக த ஹிந்து செய்திவெளியிட்டுள்ளது.

இந்த 16 திருவள்ளுவர் சிலைகளையும் வட மாகாணத்தில் மன்னார், கிளிநொச்சி, முல்லைத்தீவு மற்றும் சாவக்கச்சேரி ஆகிய பிரதேசங்களிலும், வடமேல் மாகாணத்தில் புத்தளத்திலும், மேல் மாகாணத்தில் கொழும்பிலும், மத்தியமாகாணத்தில் மாத்தளை, ஹட்டன் மற்றும் நாவலப்பிட்டியிலும், திருகோணமலை, மட்டக்களப்பு, அம்பாறை ஆகிய இடங்களில் நிறுவப்பட உள்ளதாக தெரிவிக்கப்பட்டுள்ளது.

முன்னதாக சர்வதேச தமிழ் சங்கத்தினால் இலங்கைக்கு வழங்கியிருந்த திருவள்ளுவர் சிலைகளைப் பெற்றுக் கொள்ளும் நிகழ்வில் இராஜாங்க அமைச்சர் இராதாகிருஸ்ணன் கலந்துக் கொண்டமை குறிப்பிடத்தக்கது.

இலங்கைக்கும் இந்தியாவுக்கும் இடையில் இரு தரப்பு உறவுகளை மேம்படுத்தும் நோக்கில் இந்த நிகழ்வு அமையும் என சர்வதேச தமிழ் சங்கத் தலைவர் வி.ஜி.சந்தோசம் தெரிவித்துள்ளார்.

இதேவேளை கொழும்பு அல்லது மட்டக்களப்பு பிரதேசங்களில் கேளிக்கை பூங்கா அமைப்பது குறித்தும் வி.ஜி.சந்தோசம் கருத்து தெரிவித்திருந்திருந்தார்

மேலும், 16 திருவள்ளுவர் சிலைகள் நல்லெண்ண நோக்கத்துடன் கடந்த மாதம் 19ஆம் திகதி இலங்கைக்கு வழங்கி வைக்கப்பட்டமை குறிப்பிடத்தக்கது.

செவ்வாய்க்கிழமை, 26 ஜூலை 2016 00:00

மீண்டும் ஒரு மிருக வதை!!

Written by

தம்புள்ளை-பகமுன பிரதான வீதி உனபதுருயாய கலுன்தாவ பிரதேசத்தில் கன்று உட்பட 4 பசுக்களை இறைச்சிக்காக வெட்டியுள்ளனர்.

வயல்வெளியில் கட்டப்பட்டிருந்த பசுக்களை வெட்டிய நபர் யார் என்பது இது வரையும் அறியப்படவில்லை.

மேலும், இந்த நபர்களை கைது செய்வதற்கான நடவடிக்கைகளில் பொலிஸார் ஈடுபட்டு வருகின்றனர்.

குறித்த இடத்தில் இருந்து கன்றுக்குட்டியின் கால்கள், தோல் உள்ளிட்ட உடற்பாகங்கள் மீட்கப்பட்டுள்ளதாக பொலிஸார் தெரிவித்துள்ளனர்.

இதேவேளை, கடந்த சில வாரங்களுக்கு முன் இது போன்ற ஒரு சம்பவம் இணையத்தளங்களில் பதிவாகி மக்கள் மத்தியில் பரபரப்பை ஏற்படுத்தியிருந்தமை குறிப்பிடத்தக்கது.

தெனியாய - பிட்டபெத்தர பிரதேசத்தில் 13 வயது சிறுமியை ஒரு மாதமாக துஸ்பிரயோகத்திற்கு உள்ளாக்கிய 30 நபர்களைத் தேடி பொலிஸார் வலைவிரித்துள்ளதாக தெரிவிக்கப்பட்டுள்ளது.

குறித்த சம்பவம் தொடர்பாக சந்தேகத்தின் பெயரில் ஒருவர் கைதுசெய்யப்பட்டுள்ளார்.

மேலும், கைது செய்யப்பட்ட நபர் வழங்கிய தகவலுக்கமைய பஸ் நடத்துநர்கள், சாரதிகள், வர்த்தகர்கள் உள்ளிட்ட சமூகத்தில் பல முக்கயஸ்தர்கள் இதனுடன் தொடர்புடையதாக தெரிவிக்கப்பட்டுள்ளது.

இதேவேளை கைதுசெய்யப்பட்ட நபர் இது தொடர்பில் பல அதிர்ச்சித் தகவல்களை பொலிஸாரிடம் வழங்கியுள்ளதாகவும் குறிப்பிடப்பட்டுள்ளது.

பக்கம் 10 / 23
Top
We use cookies to improve our website. By continuing to use this website, you are giving consent to cookies being used. More details…