JoomlaLock.com All4Share.net

Background Video

இலங்கை

இலங்கை (309)

தெனியாய - பிட்டபெத்தர பிரதேசத்தில் 13 வயது சிறுமியை ஒரு மாதமாக துஸ்பிரயோகத்திற்கு உள்ளாக்கிய 30 நபர்களைத் தேடி பொலிஸார் வலைவிரித்துள்ளதாக தெரிவிக்கப்பட்டுள்ளது.

குறித்த சம்பவம் தொடர்பாக சந்தேகத்தின் பெயரில் ஒருவர் கைதுசெய்யப்பட்டுள்ளார்.

மேலும், கைது செய்யப்பட்ட நபர் வழங்கிய தகவலுக்கமைய பஸ் நடத்துநர்கள், சாரதிகள், வர்த்தகர்கள் உள்ளிட்ட சமூகத்தில் பல முக்கயஸ்தர்கள் இதனுடன் தொடர்புடையதாக தெரிவிக்கப்பட்டுள்ளது.

இதேவேளை கைதுசெய்யப்பட்ட நபர் இது தொடர்பில் பல அதிர்ச்சித் தகவல்களை பொலிஸாரிடம் வழங்கியுள்ளதாகவும் குறிப்பிடப்பட்டுள்ளது.

மஹிந்த ராஜபக்ச எடுக்கும் எந்த முயற்சிகளாலும் தற்போதைய அரசாங்கத்தின் நல்லிணக்க செயற்பாடுகளை தடுத்து விட முடியாது. அவரின் குந்தகமான செயற்பாடுகளுக்கு சிங்கள மக்கள் உடன்படப் போவதுமில்லை என்று தமிழ்த் தேசியக் கூட்டமைப்பின் பேச்சாளரும், பாராளுமன்ற உறுப்பினருமான எம்.ஏ. சுமந்திரன் தெரிவித்தார்.

தேசிய அரசாங்கத்துக்கு எதிராக கூட்டு எதிர்க்கட்சியின் பாதயாத்திரை எதிர்வரும் 28ம் திகதி கண்டியிலிருந்து ஆரம்பிக்கப்படவுள்ள நிலையில் மேற்படிபாதயாத்திரையினால் தற்போதைய அரசாங்கத்துக்கு நெருக்கடி நிலை ஏற்படுமா? அரசு மேற்கொண்டு வரும் தமிழ் மக்களுக்கான அரசியல் தீர்வு விவகாரத்துக்கு பங்கம் ஏற்படுமா? என அவரிடம் கேட்ட போதே அவர் மேற்கண்டவாறு கூறினார்.

அவர் தொடர்ந்து கருத்துத் தெரிவிக்கையில்,

முன்னாள் ஜனாதிபதி மஹிந்த ராஜபக்ச கடந்த ஜனவரி 8ம் திகதி நடைபெற்ற புரட்சியுடன் துரத்தி அடிக்கப்பட்ட பின் மீண்டும் ஆட்சியைக் கைப்பற்றி பதவிக்கு வர பல்வேறு பிரயத்தனங்களை மேற்கொண்டு வருகின்றார் என்பது உலகறிந்த விடயமாகும்.

இந்த முயற்சியின் ஒரு அங்கமே மஹிந்தவும் அவரது அணியினரும் எதிர்வரும் 28ம் திகதி பாதயாத்திரையை மேற்கொள்ளும் முயற்சியாகும்.

தற்பொழுது அவர் என்ன கூறுகின்றார். ஜனாதிபதி மைத்திரிபால சிறிசேனவின் வெற்றிக்கு சிங்கள மக்கள் வாக்களிக்கவில்லை. ஈழ மக்கள் வாக்களித்ததன் காரணமாகவே அவர் வெற்றி பெற்றார். அவ்வாறு இல்லையாயின் அவர் வெற்றி பெற்றிருக்க முடியாது என்றெல்லாம் கூறிக்கொண்டிருக்கின்றார். இது அவரின் ஆற்றாமையையே எடுத்துக் காட்டுகிறது.

மஹிந்த இந்த அரசை வீழ்ச்சியடைய செய்வதற்காக பல முயற்சிகளையும் கைங்கரியங்களையும் செய்துகொண்டுதான் இருக்கின்றார். அது எதுவுமே பலனளிப்பதாகவில்லை. காரணம் சிங்கள மக்கள் இவரின் எதிர்ப்பிரசாரத்துக்கு பலிபோகவில்லையென்பதே உண்மை.

எனவே தான் மஹிந்த ராஜபக்ச மேற்கொள்ளும் பாதயாத்திரை முயற்சியும் தோல்வியிலேயே முடியும். இதில் அவர் எதையுமே சாதிக்க முடியாத நிலையே ஏற்படும்.

அரசியல் சாசன ஆக்க முயற்சிகள் சுமூகமாக நடைபெற்றுக் கொண்டிருக்கிறது. மஹிந்தவின் பாதயாத்திரை எதிர்ப்பு நிலைகளால் அரசியல் சாசன முன்னெடுப்புகளுக்கு பங்கம் ஏற்படுமென்று கூறிவிடமுடியாது.

புதிய அரசியல் சாசனத்தை நிறைவேற்றுவதற்கு பாராளுமன்றில் மூன்றில் இரண்டு பெரும்பான்மை தேவையென்பது பொதுவான நியதி. அவ்விடயத்தில் பாராளுமன்றிலும் இலங்கை மக்களிடமும் பூரண ஆதரவு கிடைக்கும் என்ற நம்பிக்கையின் பேரிலேயே அரசாங்கத்தின் அரசியல் சாசன முன்னெடுப்புகள் நடைபெற்று வருகின்றன. இதில் சந்தேகப்பட வேண்டிய விடயம் ஏதுமில்லை.

ஆனால் இம்முயற்சிகளை குழப்புவதற்கு தன்னாலான முழு முயற்சிகளையும் மஹிந்த ராஜபக்ச மேற்கொள்வாரென்பது நாம் அறிந்துக் கொள்ளக்கூடிய உண்மைதான். அதற்காக நாம் பயந்து கொண்டிருப்பதில் அர்த்தமில்லையென்றே எண்ணுகின்றேன்.

புதிய அரசியல் சாசன நிறைவேற்றம் அரசு மற்றும் எமது கணிப்பின்படி எதிர்வரும் வரவு செலவுத் திட்டம் பாராளுமன்றுக்கு வருவதற்கு முன் புதிய அரசியல் சாசனம் நிறைவேற்றப்படலாம் என்ற எதிர்பார்ப்புடன் தான் அரசியல் சாசன ஆக்கப்பாடுகள் நடைபெற்றுக் கொண்டிருக்கின்றது.

இதற்கு எந்த தடையீடுகள் வந்தாலும் அதற்கு முகங்கொடுத்து அரசு முன்னெடுத்துச் செல்லுமென்றே நம்புகின்றோமென சுமந்திரன் தெரிவித்தார்.

செவ்வாய்க்கிழமை, 26 ஜூலை 2016 00:00

பாதயாத்திரைக்கு ஜனாதிபதி ஆதரவு?

Written by

கூட்டு எதிர்க்கட்சியின் சார்பில் மேற்கொள்ளப்படவுள்ள பாதயாத்திரைக்கு தாம் எவ்வித தடையுமாக இருக்கப்போவதில்லை எனவும், முழு ஆதரவு தருவதாகவும் ஜனாதிபதி தெரிவித்துள்ளதாக தெரிய வந்துள்ளது.

கூட்டு எதிர்க்கட்சியின் ஒருங்கிணைப்பாளரும், நாடாளுமன்ற உறுப்பினருமான பிரசன்ன ரணதுங்க இதனை நேற்றிரவு ஊடகங்களுக்குத் தெரிவித்துள்ளார்.

தொடர்ந்தும் கருத்து வெளியிட்டுள்ள அவர்,

கூட்டு எதிர்க்கட்சியின் பாதயாத்திரை சுதந்திரக் கட்சியை ஒன்றிணைப்பதற்கும், அரசாங்கத்துக்கு எதிர்ப்பை வெளிப்படுத்தும் நோக்கிலும் மேற்கொள்ளப்படுவதாக ஜனாதிபதிக்கு சுட்டிக்காட்டப்பட்டது.

இதனையடுத்து ஐக்கிய தேசியக் கட்சி மற்றும் அரசாங்கத்துக்கு எதிரான போராட்டங்களை மேற்கொள்ள கூட்டு எதிர்க்கட்சிக்கு எதுவித தடையும் இல்லை என்று ஜனாதிபதி தெரிவித்துள்ளார்.

சுதந்திரக்கட்சியை விமர்சிக்கவோ, கட்சியின் ஒழுங்குவிதிகளை மீறிச் செயற்படவோ ஒருபோதும் இடமளிக்க முடியாது என்றும் ஜனாதிபதி வலியுறுத்தியுள்ளார்.

அத்துடன் சுதந்திரக் கட்சி சார்பில் தேர்தல்களில் கூடுதலான விருப்பு வாக்குகளைப் பெற்ற நிலையில் தொகுதி அமைப்பாளர் பதவிகளில் இருந்து நீக்கப்பட்டுள்ளவர்கள் தொடர்பில் எதிர்வரும் நாட்களில் மீள்பரிசீலனை செய்யப்படும் என்றும் ஜனாதிபதி உறுதியளித்துள்ளார்.

ஜனாதிபதியின் உத்தியோகபூர்வ இல்லத்தில் நேற்றிரவு நடைபெற்ற இந்தக் கலந்துரையாடலில் ராஜபக்ச தரப்பின் எவருக்கும் அழைப்பு விடுக்கப்பட்டிருக்கவில்லை என்பதுடன், அவர்களின் சார்பில் யாரும் கலந்து கொண்டிருக்கவும் இல்லை என்றும் தெரியவந்துள்ளது.

யாழ்ப்பாண பல்கலைக்கழக சிங்கள மாணவர்களின் பாதுகாப்பிற்காக சிவில் உடையணிந்த பொலிஸார் கடமையில் ஈடுபடுத்தப்பட்டுள்ளனர்.

சிவில் உடையணிந்த பொலிஸ் உத்தியோகத்தர்கள் கடமையில் ஈடுபடுத்தப்பட்டு கடுமையான பாதுகாப்பு வழங்கப்பட்டுள்ளது என யாழ் பிராந்திய பதில் பிரதிப் பொலிஸ் மா அதிபர் தேசபந்து தென்னக்கோன் கொழும்பு ஊடகமொன்றுக்குத் தெரிவித்துள்ளார்.

அவர் மேலும் கூறுகையில்,

சிவில் உடையணிந்த பொலிஸ் உத்தியோகத்தர்களுக்கு மேலதிகமாக சீருடை அணிந்த பொலிஸ் உத்தியோகத்தர்களும் யாழ்ப்பாண பல்கலைக்கழகத்தை அண்டிய பகுதிகளில் கடமையில் ஈடுபடுத்தப்பட்டுள்ளனர்.

யாழ்ப்பாண பல்கலைக்கழகத்தில் எவ்வித பாதுகாப்புப் பிரச்சினையும் ஏற்படக்கூடிய சாத்தியமில்லை.

கற்றல் நடவடிக்கைகளை தொடர்வதற்கு மாணவர்களுக்கு எவ்வித தடையும் கிடையாது.

பூரண பாதுகாப்பினை பொலிஸார் வழங்குவதனால் அச்சமின்றி சிங்கள மாணவர்கள் கல்வி நடவடிக்கைகளை தொடர முடியும் என தேசபந்து தென்னக்கோன் தெரிவித்துள்ளார்.

செவ்வாய்க்கிழமை, 26 ஜூலை 2016 00:00

வட மாகாண சபையின் வாலாக செயற்பட தயாரில்லை!

Written by

மீள்குடியேற்றச் செயலணியின் செயற்பாடுகளை முடக்கும் வகையிலான வடக்கு மாகாண சபையின் நடவடிக்கைகளை நாம் பொறுத்துக்கொண்டு, அதன் வாலாக இருக்கப் போவதில்லை என அமைச்சர் ரிஷாத் பதியுதீன் தெரிவித்துள்ளார்.

இது குறித்து தொடர்ந்தும் கருத்து தெரிவித்துள்ள அவர், வடக்கில் இருந்து வெளியேற்றப்பட்ட முஸ்லிம்களையும் சிங்களவர்களையும் முறையாக ஒரு கட்டமைப்பின் கீழ் குடியேற்ற வேண்டும்.

வெளியேற்றப்பட்ட மக்களை மீள்குடியேற்றி அவர்களை நிம்மதியாக வாழ வைக்கவென உருவாக்கப்பட்ட மீள்குடியேற்ற செயலணியின் செயற்பாடுகளை முடக்கும் வகையில் வடக்கு மாகாண சபை தீர்மானம் ஒன்றை நிறைவேற்றியுள்ளது.

செயலணியின் நோக்கங்களை திரிவுபடுத்தி அதன் எதிர்கால நடவடிக்கைகளை கறுப்புக் கண்ணோடு பார்த்துவரும் வடக்கு மாகாண சபையின் போக்கை நாம் வன்மையாகக் கண்டிக்கின்றோம்.

முன்னாள் நீதியரசர் சீ.வி.விக்னேஸ்வரன் தலைமையிலான வடக்கு மாகாணசபை கடந்த 3 வருட காலம் பதவியில் இருந்து வருகின்றது.

1990ஆம் ஆண்டு புலிகளால் வெளியேற்றப்பட்ட ஒரு இலட்சத்துக்கும் மேற்பட்ட முஸ்லிம்களில் பெரும்பாலானோர் இன்னும் தென்னிலங்கையில் பல இடங்களில் முகாம்களிலும் வீடுகளிலும் வாழ்ந்து வருகின்றனர்.

வட மாகாண சபையைப் பொறுத்தவரையில் முஸ்லிம்கள் குடியேறுவதற்கு இன்று வரைதுளியளவேனும் உதவவில்லை.

உதவாவிட்டாலும் பரவாயில்லை உதட்டளவிலேனும் ஆதரவளிக்கவுமில்லை. இந்நிலையில், மத்திய அரசு தற்போது முன்னெடுத்துள்ள மீள்குடியேற்றக் கட்டமைப்பைச் சீர்குலைப்பதற்கு வட மாகாண சபை முன்னிற்பது வேதனையானது.

அது மனித தர்மமும் அல்ல. அகதிகளாக வாழும் இந்த மக்கள் படுகின்ற அவஸ்தைகளை கண்டும் காணாதது போன்று செயற்படும் இந்த மாகாண சபையின் நடவடிக்கை குறித்து முஸ்லிம் மக்களுக்கு நிறைய கேள்விகள் எழுகின்றன.

இந்த நிலையில், காணி அதிகாரம், பொலிஸ் அதிகாரம் என்றெல்லாம் கோரிக்கை விடப்படுகின்றன என அவர் மேலும் தெரிவித்துள்ளார்.

பாடசாலைகளிலிருந்து நல்லிணக்கத்தை உருவாக்க வேண்டுமென ஜனாதிபதி மைத்திரிபால சிறிசேன தெரிவித்துள்ளார்.

பதுளை ஹாலிஎல பிரதேசத்தில் நடைபெற்ற விளையாட்டு நிகழ்வு ஒன்றில் அவர் இதனைத் தெரிவித்துள்ளார்.

அவர் மேலும் கூறுகையில்,

நாட்டின் தேசிய ஒற்றுமை சகோதரத்துவம் மற்றும் நல்லிணக்கத்தை பாடசாலை மாணவர்களின் ஊடாக ஏற்படுத்த வேண்டியது அவசியமானது.

நாட்டில் வாழும் அனைத்து மக்களிடையேயும் சகோதரத்துவத்தையும் ஒற்றுமையையும் கட்டியெழுப்பி நம்பிக்கையை உருவாக்க வேண்டும்.

இதேவேளை அச்சம் சந்தேகமின்றி வாழக்கூடிய சூழ்நிலையை உறுதி செய்யும் விரிவான தேசிய திட்டமொன்று அமுல்படுத்தப்படும் என ஜனாதிபதி மைத்திரிபால சிறிசேன தெரிவித்துள்ளார்.

முன்னாள் ஜனாதிபதி மஹிந்த ராஜபக்ச ஆட்சிக் காலத்தில் சிறையில் பூனை இறைச்சி சாப்பாடு வழங்கப்பட்டதாக பிரதி அமைச்சர் பாலித தெவரப்பெரும தெரிவித்துள்ளார்.

உள்விவகார வடமேல் மாகாண அபிவிருத்தி மற்றும் கலாச்சார அமைச்சர் எஸ்.பி. நாவின்னவிற்கு அனுப்பி வைத்துள்ள நீண்ட கடிதமொன்றில் அவர் இதனைத் தெரிவித்துள்ளார்.

அமைச்சர் நாவின்ன அண்மையில் திவயின சிங்கள பத்திரிகைக்கு அளித்த நேர்காணல் ஒன்றில், பிரதி அமைச்சர் பாலித தெவரப்பெருமவை விமர்சனம் செய்திருந்தார்.

இந்த விமர்சனங்களுக்கு பதிலளிக்கும் வகையில் அனுப்பி வைத்துள்ள நீண்ட கடிதத்தில், தமக்கு இழைக்கப்பட்ட அநீதிகள் குறித்து தெவரப்பெரும விளக்கியுள்ளார்.

முறைப்பாட்டாளரான தம்மை ராஜபக்ச அரசாங்கம் 400 நாட்கள் சிறையில் அடைத்து பழிவாங்கியதாகத் தெரிவித்துள்ளார்.

மேலும் கண்ணால் பார்க்கக்கூடிய வகையில் கிழங்கு கறியில் பானை ஒன்றை இட்டு வேக வைத்து அதனை சோற்றுடன் ராஜபக்ச அரசாங்கம் வழங்கியதாகக் குறிப்பிட்டுள்ளார்.

சிறைச்சாலை வாழ்க்கையை நரகமாக்கும் நோக்கில் இவ்வாறு தமக்கு பல்வேறு பழிவாங்கல் நடவடிக்கைகள் மேற்கொள்ளப்பட்டதாகத் தெரிவித்துள்ளார்.

எந்தவொரு சந்தர்ப்பத்திலும் தாம் அதிகார மோகத்தில் செயற்பட்டதில்லை எனவும் கட்சியை காட்டிக் கொடுத்ததில்லை எனவும் அவர் குறிப்பிட்டுள்ளார்.

போராட்டங்களை நடத்துவது நியாயத்திற்காக அன்றி அரசியல் நோக்கங்களுக்காகவோ அல்லது வேறும் நலன்களுக்காக அல்ல என அவர் தெரிவித்துள்ளார்.

வடக்கில் எப்போது குண்டு வெடிக்கும் என மஹிந்த ராஜபக்ச மற்றும் அவரின் ஆதரவு தரப்பினர் ஆவலுடன் எதிர்பார்த்திருப்பதாக ஜே.வி.பி கூறியுள்ளது.

அந்த கட்சியின் பாராளுமன்ற உறுப்பின் அநுரகுமார் திஸாநாயக்க இதன் தெரிவித்துள்ளார். சோசலிச இளைஞர் முன்னணியின் ஏற்பாட்டில் சகோதரத்துவ தின நிகழ்வு நேற்று யாழ்ப்பாணத்தில் இடம்பெற்றது.

இந்த நிகழ்வில் கலந்துகொண்டு உரையாற்றி அவர் இவ்வாறு கூறியுள்ளார். இதன் போது தொடர்ந்தும் கருத்து தெரிவித்த அவர்,

ஆட்சி அதிகாரத்தை தக்க வைத்துகொள்ளும் முகமாக 1983ஆம் ஆண்டு ஜே.ஆர்.ஜெயவர்த்தன ஜூலை கலவரத்தினை ஏற்படுத்தினார்.

ஐக்கிய தேசியக் கட்சி, அபிவிருத்தி குழு யாழ்பாணத்தில் வெற்றி பெறவேண்டும் என்பதற்காக யாழ். பொது நூலகத்தினை எரித்தது.

இந்நிலையிலேயே, மீண்டும் ஆட்சி அதிகாரத்தினை முன்னாள் ஜனாதிபதி மஹிந்த ராஜபக்ச கைப்பற்ற வேண்டும் என்பதற்காக அவருடைய ஆதரவு குழுக்கள் இனவாத கருத்துக்களை வெளியிடுகின்றது.

கடந்த 30ஆண்டுகளாக இடம்பெற்ற உள்நாட்டு யுத்தம் காரணமாக வடக்கில் மாத்திரம் சுமார் 55 ஆயிரத்திற்கும் மேற்பட்ட விதவைகள் உள்ளனர்.

அத்துடன், 2500 மேற்பட்டவர்கள் தாய் மற்றும் தந்தையை இழந்த சிறுவர்களாக இருக்கின்றனர். காணமல் போன தமது உறவுகளை தேடி வீதியில் இறங்கி போராடுகின்றனர்.

இதேவேளை, யாழ்ப்பாணத்தில் வாழும் தமிழ் மக்களை, சமயம், சாதி என்ற அடிப்படையில் பிரிக்க வேண்டும் என்பதே மேல் வர்க்கத்தின் பிரதான நோக்கமாக அமைந்துள்ளதாக அவர் வலியுறுத்தியுள்ளார்.

இந்நிலையிலேயே, வடக்கில் இனவாதத்தினை தூண்டி ஆட்சியினை கைப்பற்ற முன்னாள் ஜனாதிபதி மஹிந்த ராஜபக்ச முனைவதாக அவர் கூறியுள்ளார்.

இதற்கான வடக்கில் எப்போது குண்டு வெடிக்கும், இராணுவத்தினர் மீது கல் வீச்சு தாக்குதல் நடத்தப்படும் என மஹிந்த ராஜபக்ச ஆவலுடன் எதிர்பார்த்திருப்பதாக அவர் மேலும் தெரிவித்துள்ளார்.

காலித் துறைமுகத்தை சுற்றுலாப் பயணிகளின் பாய்மரப் படகோட்டத் தரிப்பிடமாக மாற்றுவது குறித்து கவனம் செலுத்தப்பட்டுள்ளது.

காலி நகரை வர்த்தக நகராக்கும் நோக்குடன் மேற்கொள்ளப்படும் அபிவிருத்தித் திட்டங்களின் ஒரு கட்டமாக காலித்துறைமுகத்தை விஸ்தரித்து, அதனை ஒரு வர்த்தக துறைமுகமாக மாற்றியமைப்பதற்கு திட்டமிடப்பட்டிருந்தது.

எனினும் யுனெஸ்கோவின் புராதனச் சின்னங்களைக் கொண்டுள்ள நகரம் என்ற வகையிலும் துறைமுக விஸ்தரிப்பின் மூலம், உலக மரபுரிமையான காலி கோட்டைக்கு சேதங்கள் ஏற்படலாம் என்ற அச்சம் காரணமாகவும் குறித்த திட்டம் தற்போது கைவிடப்பட்டுள்ளது.

அதற்குப் பதிலாக சிறிய ரக துறைமுகமாகவே தொடர்ந்தும் பராமரிக்கப்படவுள்ள காலித் துறைமுகம், சுற்றுலாப் பயணிகளை ஈர்த்தெடுக்கும் வகையில் பாய் மரப் படகுகளின் தரிப்பிடமாக மாற்றப்படவுள்ளது.

இதன் மூலம் காலியை நோக்கி கூடுதலான சுற்றுலாப் பயணிகளை ஈர்த்தெடுக்க முடியும் என்று எதிர்பார்க்கப்படுகின்றது.

சொத்துவிற்பனையொன்றின் மூலம் சேரவேண்டிய தரகுப் பணத்தை தரமறுத்த சட்டத்தரணி ஒருவரை வர்த்தகர் ஒருவர் கடத்திச் சென்று, மிரட்டியுள்ளதாக தெரிவித்து பொலிஸில் முறைப்பாடு செய்யப்பட்டுள்ளது.

இந்த சம்பவம், களுத்துறை நகரில் இடம்பெற்றுள்ளதாக தெரிவிக்கப்பட்டுள்ளது. குறித்த சம்பவம் தொடர்பில் மேலும் தெரியவருவதாவது,

தெஹிவளையில் உள்ள சொத்தொன்றை விற்பனை செய்த வகையில் களுத்துறை வர்த்தகர் ஒருவருக்கு 35 லட்சம் ரூபா தரகுப் பணம் வரவேண்டி இருந்துள்ளது.

எனினும் விற்பனை செய்த சொத்துக்கு உயில் எழுதிய சட்டத்தரணி குறித்த தரகுப் பணத்தை சுருட்டிக் கொண்டதுடன், வர்த்தகரையும் ஏமாற்ற முனைந்துள்ளார்.

இதனையடுத்து ஆத்திரம் கொண்ட வர்த்தகர் குறித்த சட்டத்தரணியையும் அவரது உதவியாளரையும் கடத்திச் சென்று அச்சுறுத்தியுள்ளார். இதற்கு வர்த்தகரின் நண்பர் ஒருவரும் உதவியுள்ளதாக தெரிவிக்கப்படுகின்றது.

இதுகுறித்து சட்டத்தரணி மேற்கொண்ட முறைப்பாட்டின் அடிப்படையில் குறித்த வர்த்தகர் தற்போது கைது செய்யப்பட்டுள்ளார்.

அத்துடன், கடத்தலுக்குப் பயன்படுத்தியதாக தெரிவிக்கப்படும் காரையும் பொலிஸார் கைப்பற்றியுள்ளதாக தெரிவிக்கப்பட்டுள்ளது.

இதனிடையே, விற்பனை செய்யப்பட்ட சொத்தும் போலி ஆவணங்கள் மூலமாக விற்பனை செய்திருப்பதும் பொலிசாரின் விசாரணைகளில் தெரிய வந்துள்ளது.

இதேவேளை, சம்பவம் தொடர்பிலான மேலதிக விசாரணைகளை பொலிஸார் முன்னெடுத்து வருகின்றனர்.

பக்கம் 10 / 23
Top
We use cookies to improve our website. By continuing to use this website, you are giving consent to cookies being used. More details…