JoomlaLock.com All4Share.net

Background Video

இலங்கை

இலங்கை (309)

வெள்ளிக்கிழமை, 05 ஆகஸ்ட் 2016 00:00

முடிவுக்கு வந்த நானுஓயா அவோகா படுகொலை!

Written by

நானுஓயா அவோகா தோட்டத்தில் 2000ஆம் ஆண்டு இடம்பெற்ற கொலைச் சம்பவத்தில் கைதுசெய்யப்பட்ட 08 சந்தேகநபர்களில் எழுவரை, நுவரெலியா மேல் நீதிமன்றம் நேற்று விடுதலை செய்ததுடன், ஒருவருக்கு 10 வருடச் சிறைத்தண்டனையை விதித்து உத்தரவிட்டுள்ளது.

குறித்த வழக்கு தொடர்பில் தெரியவருவதாவது,

கிளரன்டன் அவோகா தோட்டத்தில் 12.10.2000 அன்று, மரக்குற்றிகளை திருட்டில் 8 பேர் அடங்கிய குழு ஒன்று ஈடுபட்டுள்ளது. இதனைத் தடுக்க முயன்ற காவலாளி பன்னீர்ச்செல்வம் என்பவரை அந்தக் குழு தாக்கியுள்ளது. தாக்குதலில் பலத்த காயமடைந்த பன்னீர்ச்செல்வம் உயிரிழந்துள்ளார்.

இந்த சம்பவம் தொடர்பில் சந்தேகநபர்களான 8 பேர் நானுஓயாப் பொலிஸாரினால் கைது செய்யப்பட்டு நுவரெலியா நீதிமன்றத்தில் ஆஜர்செய்யப்பட்டனர்.

3 மாதகால விளக்கமறியலின் பின்னர் இவர்கள் பிணையில் விடுதலை செய்யப்பட்டனர். தொடர்ந்து 16 வருட காலம் இடம்பெற்றுவந்த வழக்கில் பிரதான குற்றவாளியாக இனங்காணப்பட்ட ராமன் பாஸ்கரன் (48) என்பவருக்கு 10 வருடகாலச் சிறைத்தண்டனை வழங்கி நுவரெலியா மேல் நீதிமன்ற நீதிபதி லலித் ஏக்கநாயக்கவினால் தீர்ப்பளிக்கப்பட்டது.

குற்றவாளி தலவாக்கலை பொலிஸ் நிலையத்தின் சிவில் கிராமப் பாதுகாப்பு உத்தியோகத்தராகக் கடமையாற்றியவர் என்பது குறிப்பிடத்ததக்கது.

நாம் இன்றும் மஹிந்த ராஜபக்ஷவைக் கண்டு அஞ்சுகின்றோம் அதில் எந்தவித சந்தேகமும் இல்லை என இராஜாங்க அமைச்சர் டிலான் பெரேரா தெரிவித்தார்.

கொழும்பில் இன்று இடம் பெற்ற ஊடகவியலாளர் சந்திப்பின் போதே இவர் இதனைத் கூறினார்.

உண்மையில் மஹிந்த ராஜபக்ஷவைக் கண்டு அஞ்சுவதற்கு சில காரணங்கள் இருக்கின்றன. அவர் எங்களுடைய கட்சியை உடைத்து விடுவார் என அஞ்சுகின்றோம், எமது கட்சி உறுப்பினர்களை ஏமாற்றி விடுவார்கள் என அஞ்சுகின்றோம். அதே போல நாட்டு மக்களுக்கு நிறைவேற்ற முடியாத சில வாக்குறுதிகளை அளித்து விடுவார் என அஞ்சுகின்றோம் என இவர் தெரிவித்தார்.

மேலும் இங்கு கருத்து தெரிவித்த இராஜாங்க அமைச்சர்,

நாமல் ராஜபக்ஷ அரசியலில் தோற்றாலும் நடனத்தில் வெல்வதற்குரிய எல்லாத் திறமைகளும் உள்ளது அதை நாங்கள் கடந்த 5 நாட்களாக அவதானித்துக் கொண்டே இருந்தோம் எனவும் கூறினார்.

அத்துடன், நாமல் பபா, பசில் பபா, அலிபபா போன்றவர்கள் மக்களுடைய பிரச்சினையைப் பற்றி பேசவில்லை என்பது அனைவரும் அறிந்த உண்மை என இராஜாங்க அமைச்சர் டிலான் பெரேரா தெரிவித்தார்.

 

 

வெலிமடை நீதிமன்ற எல்லைக்கு உட்பட்ட பிரதேசங்களில், கடந்த ஆறு மாதங்களில் சிறுவர் துஷ்பிரயோகம் மற்றும் பாலியல் வன்புணர்வு சம்பவங்கள் 45 பதிவாகியுள்ளதாக சிறுவர் நன்னடத்தை அதிகாரி ஏ.ஏ.சுகத் ரோகன தெரிவித்தார்.

வெலிமடை பிரதேச அபிவிருத்தி இணைப்புக் குழுக்கூட்டம் பிரதேச செயலகத்தில், நேற்று திங்கட்கிழமை நடைபெற்றது.

இதில் கலந்துகொண்டு கருத்து தெரிவிக்கும்போதே அவர் மேற்கண்டவாறு கூறினார்.

இங்கு தொடர்ந்துரைத்த அவர்,

வெலிமடை பிரதேச செயலகத்துக்கு உட்பட்ட பகுதிகளில் கடந்த வருடங்களைவிட, இவ்வருடத்தின் முதல் ஆறு மாதங்களில் சிறுவர் துஷ்பிரயோகங்கள், பாலியல் வன்புணர்வுச் சம்பவங்கள் அதிகரித்துள்ளன.

எமக்கு கிடைத்துள்ள 45 முறைப்பாடுகளுக்கு எதிராக சட்ட நடவடிக்கைகளை மேற்கொண்டு வருகின்றோம்.

தோட்டப் பகுதிகளில் நடைபெறும் இத்தகைய சம்பவங்கள் மூடி மறைக்கப்படுகின்றன. இவற்றை தடுப்பதற்கான செயற்றிட்டங்களை எமது திணைக்களம் முன்னெடுத்து வருகின்றது என்றார்.

திருகோணமலை, தாவுல்வெவ பகுதியில் புதையல் தோண்டிய குற்றச்சாட்டின் பேரில் கைது செய்யப்பட்டு விளக்கமறியலில் வைக்கப்பட்டிருந்த ஆறு பேரையும், இரண்டு குற்றங்களுக்காக தலா 45,000 ரூபாய் அபராதம் விதித்து, திருகோணமலை நீதிமன்ற நீதவான் விஷ்வானந்த பெர்ணான்டோ, நேற்று உத்தரவிட்டார்.

அடையாளப்படுத்தப்பட்ட புராதன இடத்துக்குச் சென்ற முதலாவது குற்றத்துக்காக தலா 20 ஆயிரம் ரூபாயும், அவ்விடத்துக்குச்சென்று புத்த சிலையின் வடிவத்தை மாற்றிய இரண்டாவது குற்றத்துக்காக தலா 25 ஆயிரம் ரூபாயும் தண்டப் பணமாகச் செலுத்துமாறும் நீதவான் உத்தரவிட்டார்.

கடந்த ஜூலை மாதம் 08ஆம் திகதி கோமரங்கடெவல பொலிஸாரினால் தாவுல்வெவ பகுதியில் கைது செய்யப்பட்ட ஆறு பேருக்குமான வழக்கு விசாரணை நேற்று எடுத்துக்கொள்ளப்பட்ட போதே இத்தீர்ப்பு வழங்கப்பட்டது

இதேவேளை, திருகோணமலை, தம்பலகாமம் பொலிஸ் பிரிவுக்குட்பட்ட பரவிப்பாஞ்சான் காட்டுப்பகுதியில் அனுமதியின்றி நுழைந்த குற்றச்சாட்டின் பேரில் 4 பேரை பொலிஸார் நேற்று கைது செய்துள்ளனர்.

குறித்த காட்டுப்பகுதியில் புதையல் தோண்டுவதாக தகவல் கிடைத்ததனை அடுத்து,

அக்காட்டுப்பகுதியை சுற்றிவளைத்து தாம் தேடுதல் நடத்தியதாகவும் இதன்போது, ஒரு பௌத்த பிக்குவும் ஒரு சிவில் பாதுகாப்பு உத்தியோகஸ்தரும் உட்பட 04 பேரைக் கைது செய்துள்ளதாக பொலிஸார் தெரிவித்தனர்.

இவர்களிடமிருந்து புதையல் தோண்டுவதற்கான ஆயுதங்கள் எதுவும் கைப்பற்றப்படவில்லையெனக் கூறிய பொலிஸார், திசையை அறிந்து கொள்வதற்கான வரைபடமொன்றைக் கைப்பற்றியதாகவும் தெரிவித்தனர்.

பலாலி விமான நிலைய சீரமைப்புக்கான மாதிரி வரைபடம் தயாரிப்பதற்கு இலங்கை மதிப்பில் இரண்டு கோடி ரூபா கோரப்பட்டுள்ளதாக, இந்திய தூதரக வட்டாரங்கள்தெரிவித்தன.

பலாலி விமான நிலையத்தைப் பிராந்திய விமான நிலையமாகச் சீரமைப்பதற்கு முடிவுசெய்யப்பட்டது.

சீரமைப்புப் பணிகளை மேற்கொள்வதற்காக, இந்திய அதிகாரிகள் குழு கடந்த மார்ச்17ம் திகதி பலாலி விமான நிலையத்தைப் பார்வையிட்டது.

இந்தக் குழுவினர், பலாலி விமான நிலையத்தின் சீரமைப்புத் தொடர்பான மதிப்பீடு மேற்கொள்வதற்கு, வரைபடம் தயாரிப்பதற்கு ஓர் நிறுவனத்தை அணுகியுள்ளனர்.

பலாலியில் மேற்கொள்ளப்பட வேண்டிய அபிவிருத்தி தொடர்பான மாதிரி வரைபடங்கள்தயாரிப்பதற்கு மாத்திரம் இலங்கை மதிப்பில் இரண்டு கோடி ரூபா வரையில் செலவாகும்என்று தெரிவிக்கப்பட்டது.

சட்ட ரீதியாக திருமணம் செய்துகொண்ட மனைவியை, தனது எதிரிலேயே வேறு ஒருவரைக் கொண்டு கடுமையான பாலியல் வன்கொடுமைகளுக்கு உள்ளாக்கி திருப்தி அடைந்த நபருக்கு 22 ஆண்டு சிறைத்தண்டனை விதிக்கப்பட்டுள்ளது.

வேறு ஒர் நபர் ஆயுதம் ஒன்றை காண்பித்து அச்சுறுத்தி மனைவி பாலியல் ரீதியாக வன்கொடுமைக்கு உள்ளாவதனை குறித்த கணவர் பார்த்துக் கொண்டிருந்துள்ளார்.

இந்தக் குற்றச் செயல்களில் ஈடுபட்ட கணவர் மற்றும் பாலியல் வன்கொடுமையில் ஈடுபட்ட நபர் ஆகியோருக்கு நீதிமன்றம் 22 ஆண்டு கால கடூழிய சிறைத்தண்டனையும் தலா இருபதாயிரம் ரூபா அபராதமும், குற்றவாளிகள் தலா 150,000 ரூபா நட்டஈடு வழங்க வேண்டுமெனவும் நீதிமன்றம் உத்தரவிட்டுள்ளது.

கேகாலை உயர் நீதிமன்ற நீதவான் தம்மிக்க கனேபொல இந்த தண்டனையை அண்மையில் விதித்துள்ளார்.

2012ம் ஆண்டு ஜூலை மாதம் 10ம் திகதி இந்த சம்பவம் இடம்பெற்றுள்ளதாகத் தெரிவிக்கப்படுகிறது.

கேகாலை பல்லேகனுகல அமிதிரிகல என்னம் இடத்தில் இந்த சம்பவம் இடம்பெற்றுள்ளது.

தண்டனை அறிவிக்கப்பட்டபோது பாதிக்கப்பட்ட பெண் இரு கரங்களையும் கூப்பி நீதவானுக்க நன்றி தெரிவித்துள்ளார்.

திங்கட்கிழமை, 01 ஆகஸ்ட் 2016 00:00

பொலிஸ் மா அதிபரின் அதிரடி எச்சரிக்கை!!

Written by

சட்டத்தை பொலிஸார் அமுல் செய்யும் போது, பொலிஸாருடன் மோதலுக்கு வந்தால் தாக்குதல் நடத்தவும் நாம் தயங்கப் போவதில்லை. என்று பொலிஸ் மா அதிபர் பூஜித் ஜயசுந்தர தெரிவித்தார்.

காலி, கொஸ்கொட பகுதியில் பாடசாலையொன்றில் நேற்று முன்தினம் இடம்பெற்ற விஷேட நிகழ்வொன்றில் கலந்துகொண்டு உரையாற்றுகையிலேயே பொலிஸ் மா அதிபர் இதனைத் தெரிவித்தார்.

இதேவேளை பொலிஸ் மா அதிபர் உரையாற்றுகையில்,

அவரது கையடக்கத் தொலைபேசிக்கு கேகாலை சிரேஷ்ட பொலிஸ் அத்தியட்சர் ஊடாக விஷேட அழைப்பொன்று கிடைத்திருந்தது. அதில் ஒன்றிணைந்த எதிர்க்கட்சியின் ஆர்ப்பாட்டத்தின் போது அரச வாகனங்கள் இரண்டு தவறாக பயன்படுத்தப்பட்டுள்ளதாக தகவல் அளிக்கப்பட்டது.

இதனையடுத்து உடனடியாக வாகனங்கள் இரண்டை கைப்பற்றவும் சந்தேக நபர்களை கைது செய்யவும் நேரடி உத்தரவொன்றை பிறப்பித்த பொலிஸ் மா அதிபர் தொடர்ந்து உரையாற்றும் போதே மேற்படி கருத்தினைத் தெரிவித்தார்.

சட்டத்தை அமுல் செய்யும் போது ஒவ்வொருவரும் நினைத்தவாறு செயற்பட அனுமதிக்க முடியாது. கேகாலை சிரேஷ்ட பொலிஸ் அத்தியட்சர் இப்போது என்னுடன் பேசினார். நான் அவருக்கு தேவையான ஆலோசனைகளை வழங்கியுள்ளேன். பயப்படாது செயற்படுமாறும் அவர்களுக்கு பக்க பலமாக நான் இருப்பதாகவும் அவரிடம் கூறினேன்.

அரசின் வாகனங்கள் தவறாக பயன்படுத்தப்பட்டுள்ளன. அந்தவகையில் சட்டத்தை அமுல் செய்ய உத்தரவிட்டேன். சட்டத்தை அமுல் செய்யும் போது பொலிஸாருடன் முறுகல் நிலையை ஏற்படுத்தி மோதலுக்கு வந்தால் நாமும் தாக்குதல் நடத்துவோம்.

தாக்க வந்தால் பயப்பட மாட்டோம். கண்டிப்பாக தாக்குவோம். அதன் பின்னணியில் நான் இருப்பேன். எனினும் கொலை செய்ய முடியாது. படு காயங்களை ஏற்படுத்த முடியாது. குறைந்த பட்ச பலப் பிரயோகம் செய்யலாம் என்றார்.

கஞ்சாவுடன் வீதியில் நடமாடிய ஒருவரையும் கஞ்சா சுருட்டு வைத்திருந்த மற்றொரு நபரையும் தாம் கைது செய்திருப்பதாக ஏறாவூர் பொலிஸார் தெரிவித்தனர்.

விற்பனைக்காக தம்வசம் கஞ்சா வைத்திருந்த 22 வயதுடைய இளைஞன் ஏறாவூர் மிச்நகர் கிராம வீதியில் கைது செய்யப்பட்டுள்ளார்.

இதேவேளை ஏறாவூர் நகர பிரதான வீதியில் கஞ்சா சுருட்டு தன்வசம் வைத்திருந்த 28 வயதான நபரையும் பொலிஸார் ஞாயிறன்று கைது செய்துள்ளனர்.

இந்த நபர்கள் வீதிகளில் உலாவந்தவாறு கஞ்சா விற்பனையில் ஈடுபடுவதாக பொதுமக்களிடமிருந்து தகவல் கிடைத்ததின் பேரில் இந்தக் கைது இடம்பெற்றுள்ளது.

இச்சம்பவம் தொடர்பான விசாரணைகளை பொலிஸார் முன்னெடுத்து வருகின்றனர்.

நுரைச்சோலை அனல்மின் நிலையத்தில் இடம்பெற்றதாகக் கூறப்படும் நிலக்கரி மோசடி தொடர்பான அறிக்கையானது இன்று பிரதமரிடம் கையளிக்கப்படவுள்ளதாக குறிப்பிடப்பட்டுள்ளது.

குறித்த நிலக்கரி மோசடி தொடர்பில் ஆராய்வதற்கு நியமிக்கப்பட்ட குழுவால் தயாரிக்கப்பட்ட அறிக்கையே இன்று பிரதமரிடம் கையளிக்கப்படவுள்ளமை குறிப்பிடத்தக்கது.

குறித்த குழுவானது மின்சக்தி அமைச்சர் ரஞ்சித் சியம்பலாப்பிட்டியவினால் நியமிக்கப்பட்டது சுட்டிகாட்டத்தக்கது.

மேலும் குறித்த அறிக்கை பிரதமரைத் தொடர்ந்து பாராளுமன்றத்திற்கும், ஊடகங்களுக்கும் வழங்கப்படவுள்ளதாக அமைச்சர் ரஞ்சித் சியம்பலாப்பிட்டிய தெரிவித்துள்ளார்.

200 வருடகாலமாக இந்த நாட்டின் பொருளாதார அபிவிருத்திக்காக தமது உழைப்பை வழங்கிவரும் மலையகப் பெருந்தோட்ட மக்களின் அபிவிருத்திக்காக பொறுப்பு வாய்ந்த அரச நிறுவனம் ஒன்று இதுவரை இருக்கவில்லை.

அந்த குறையை நீக்கும் வகையில் மலையகப் பெருந்தோட்ட மக்களுக்கு புதிய கிராமங்களை அமைப்பதற்கான அரச அதிகாரசபை ஒன்றை அமைப்பதற்கு தற்போது அமைச்சரவை அனுமதி வழங்கியுள்ளது.

மலையக மக்களின் வரலாற்றில் இது வரலாற்று திருப்புமுனையாகும் என தமிழ் முற்போக்கு கூட்டணியின் நுவரெலியா மாவட்ட பாராளுமன்ற உறுப்பினர் எம்.திலகராஜ் தெரிவித்துள்ளார்.

பதுளை மாவட்டம் ஹப்புத்தளை பிரதேச சபைக்கு உட்பட்ட பிட்டரத்மலை தோட்டத்தில் 66 வீடுகளை அமைக்கும் மலைநாட்டு புதிய கிராமங்கள் உட்கட்டுமான சமுதாய அபிவிருத்தி அமைச்சின் வேலைத்திட்டத்தின் ஆரம்ப நிகழ்வில் அமைச்சர் பழனி திகாம்பரத்தின் சார்பில் சிறப்பு அதிதியாக கலந்து கொண்டு உரையாற்றுகையிலேயே மேற்கண்டவாறு தெரிவித்தார்.

அவர் மேலும் கருத்து தெரிவிக்கையில்,

மகாவலி அபிவிருத்தித் திட்டத்துடன் தொடர்புடைய விடயங்களுக்கு மகாவலி அபிவிருத்தி அதிகார சபை அமைக்கப்பட்டது போல், வடக்கு கிழக்கில் யுத்தத்தினால் இடம்பெயர்ந்தவர்களை மீளக்குடியமர்த்த மீள்குடியேற்ற அதிகார சபை அமைக்கப்பட்டது போல், தென்னிலங்கையை அபிவிருத்தி செய்ய தென்மாகாண அபிவிருத்தி அதிகார சபை அமைக்கப்பட்டது போல, மலையகப் பெருந்தோட்ட மக்களுக்கான புதிய கிராமங்களை உருவாக்குவதற்கான அரச அதிகார சபையை உருவாக்குவதற்கு அமைச்சர் திகாம்பரத்தினால் சமர்ப்பிக்கப்பட்ட அமைச்சரவை பத்திரம் ஏற்றுக் கொள்ளப்பட்டுள்ளது.

இப்போது சட்ட மா அதிபர் திணைக்களத்திற்கு சட்ட வரைபுகளுக்காக அனுப்பபட்டுள்ள குறித்த யோசனை பாராளுமன்றுக்கு சமர்ப்பிக்கப்பட்டு சட்ட ரீதியான அதிகார சபையாக விரைவில் அமைக்கப்படும்.

இருநூறு வருடகாலமாக இந்த நாட்டுக்காக உழைத்துவரும் மக்களின் அபிவிருத்தி நடவடிக்கைகளை மேற்கொள்ள அரச பொறுப்பில் எந்த ஒரு நிறுவனமும் இதுவரை இருக்கவில்லை.

இந்த விடயம் தொடர்பில் மலையக சமூக ஆர்வலர்களிடத்தில் அதிகம் பேசப்பட்டபோதும் அரசியல் ரீதியாக அதனைப் பெற்றுக் கொடுக்க நடவடிக்கை மேற்கொள்ளப்படவில்லை. ஆனால் தமிழ் முற்போக்கு கூட்டணி அமைக்கப்பட்டு ஒரு வருட காலத்திற்குள் இந்த இலக்கு அடையப்பெற்றிருக்கிறது.

எதிர்வரும் காலங்களில் அரச நிதியீட்டத்திலும் மேற்பார்வையிலும் மலையகத்தில் புதிய கிராமங்கள் மற்றும் உட்கட்டுமான அபிவிருத்திகளை முன்னெடுக்க முடியும்.

மலையக மக்களின் அவலம் நிறைந்த லயத்து வாழ்க்கை முறையை இல்லாமல் ஆக்கி மலையகமெங்கும் தனிவீட்டுத் திட்டங்களை வேகமாக முன்னெடுக்க இந்த அதிகார சபை பெரும் வரப்பிரசாதமாக அமையும்.

நாங்கள் பாராளுமன்றத்தில் குரல் எழுப்புவது இத்தகைய உரிமைகளை வென்றெடுப்பதற்காகவே. ஒருவரை அனுப்பி இன்னொருவருக்கு விடுமுறை விண்ணப்பம் செய்வதற்கு அல்ல என தெரிவித்தார்.

இந்த நிகழ்வில் பதுளை மாவட்ட பாராளுமன்ற உறுப்பினர்களான அரவிந்த குமார், வடிவேல் சுரேஷ், பெருந்தோட்ட மனிதவள அபிவிருத்தி நிறுவனத்தின் தலைவர் வீ.புத்திரசிகாமணி, தொழிலாளர் தேசிய சங்கத்தின் உப தலைவர் எஸ்.ராஜமாணிக்கம், ஊவா மாகாண சபை உறுப்பினர் பிரகதி அனுசல்ய உட்பட பலர் கலந்து கொண்டிருந்தனர்.

பக்கம் 3 / 23
Top
We use cookies to improve our website. By continuing to use this website, you are giving consent to cookies being used. More details…