JoomlaLock.com All4Share.net

Background Video

இலங்கை

இலங்கை (318)

இலங்கைக்கு வியஜம் மேற்கொண்டுள்ள கனேடிய வெளிவிவகார அமைச்சர் ஸ்டீபன் டியன், எதிர்க்கட்சித் தலைவர் இரா.சம்பந்தனைச் சந்தித்து கலந்துரையாடியுள்ளார்.

எதிர்க்கட்சித் தலைவரின் செயலகத்தில் நேற்று மாலை இடம்பெற்ற இந்த சந்திப்பில் கூட்டமைப்பின், பாராளுமன்ற உறுப்பினர் எம்.ஏ.சுமந்திரனும் கலந்து கொண்டார்.

இந்தச் சந்திப்பின் போது, நல்லிணக்கம், புதிய அரசியலமைப்பு உருவாக்கம், பொறுப்புக்கூறல், தமிழ் மக்களின் உடனடித் தேவைகள் உள்ளிட்ட விடயங்கள் குறித்த கவனம் செலுத்தப்பட்டுள்ளது.

குறித்த சந்திப்பு தொடர்பில் ஊடகங்களுக்கு கருத்து தெரிவித்த பாராளுமன்ற உறுப்பினர்எம்.ஏ.சுமந்திரன், இவ்வாறு தெரிவித்துள்ளார்.

அனைத்து மக்களும் ஏற்றுக் கொள்ளக்கூடிய ஒரு அரசியலமைப்புச் சட்டம் உருவாக்கினால், அது தேசிய இனப்பிரச்சனைக்கு ஓர் தீர்வாக அமையும். அதற்கான சந்தர்ப்பம் தற்போது அமைந்துள்ளது.

அந்த செயற்றிட்டத்தில், நாங்கள் பொறுப்பாக ஈடுபட்டிருக்கிறோம் என்பதை எதிர்க்கட்சித் தலைவர் கனேடிய வெளிவிவகார அமைச்சரிடம் எடுத்துக் கூறியுள்ளார்.

தமிழ் மக்களின் நலன்களில் அக்கறை செலுத்தியுள்ள கனடாவின் புதிய வெளிவிவகார அமைச்சர், நல்லிணக்கம், புதிய அரசியலமைப்பு, பொறுப்புக்கூறல், தமிழ் மக்களின் உடனடித் தேவைகள் குறித்து ஆராய்ந்துள்ளார்.

இதேவேளை, இலங்கைக்கு உதவிகளை வழங்கவிருப்பதாக அவர் ஏற்கனவே அறிவித்துள்ளார். அதை நாங்கள் வரவேற்கிறோம் என அவர் மேலும் தெரிவித்துள்ளார்.

கொழும்பில் மீண்டும் டெங்கு ஒழிப்பு வேலைத்திட்டமானது இன்று ஆரம்பமாகவுள்ளதாக சுகாதார அமைச்சு தெரிவித்துள்ளது.

இன்று தொடக்கம் எதிர்வரும் முதலாம் திகதி வரை இந்த டெங்கு ஒழிப்பு வேலைத்திட்டம் நடைபெறும் என சுகாதார பணிப்பாளர் வைத்தியர் பாலித மஹிபால தெரிவித்துள்ளார்.

மேலும் இராணுவம்,பொலிஸ் ஆகியோரி;ன் ஒத்துழைப்புடன் இந்த வேலைத்திட்டம் நடைமுறைப்படுத்தப்படவுள்ளதாகவும், ஏற்கனவே இவர்களின் ஒத்துழைப்புடன் முன்னெடுக்கப்பட்ட டெங்கு ஒழிப்பு வேலைத்திட்டத்தினால் டெங்குவின் தாக்கம் குறைந்துள்ளதாகவும் அவர் சுட்டிக்காட்டியுள்ளார்.

அத்துடன் குறித்த நான்கு நாட்களுக்கு 450 குழுக்கள் மூலம் குறித்த டெங்கு ஒழிப்பு வேலைத்திட்டமானது மேல்மாகாணத்தில் முன்னெடுக்கப்படும் எனவும் சுகாதார பணிப்பாளர் குறி;ப்பிட்டுள்ளார்.

புலம்பெயர்ந்து வாழும் மனித உரிமை ஆர்வலர் ஒருவரிடமிருந்து இராணுவ உணவகமொன்றில் கூடுதல் கட்டணம் அறவிடப்பட்ட குற்றச்சாட்டு தொடர்பில் இராணுவத்தரப்பு மறுப்புத் தெரிவித்துள்ளது.

சுதந்திர ஊடக அமைப்பின் முன்னாள் ஒருங்கிணைப்பாளரும், மனித உரிமை ஆர்வலருமான சுனந்த தேசப்பிரிய கடந்த அரசாங்கத்தில் நிலவிய அச்சுறுத்தலான சூழ்நிலையை அடுத்து புலம்பெயர்ந்து சுவிட்சர்லாந்தில் வாழ்ந்து வருகின்றார்.

அண்மையில் இலங்கை வந்து சென்றிருந்த அவர், இலங்கையில் தங்கியிருந்த நாட்களில் நாட்டின் பல்வேறு பகுதிகளுக்கும் சுற்றுப் பயணம் மேற்கொண்டிருந்தார்.

இந்தப் பயணத்தின் போது மாத்தறை மாவட்டம், கொக்கல பிரதேசத்தில் அமைந்திருக்கும் இராணுவ முகாம் ஒன்றின் வளாகத்தை ஒட்டியுள்ள உணவகம் ஒன்றில் அவர் ஆகாரம் உட்கொண்டிருந்தார்.

அதன்போது அவரிடமிருந்து கூடுதல் கட்டணம் அறவிடப்பட்டிருந்ததுடன், அது தொடர்பாக இராணுவத் தளபதி வரை சுனந்த தேசப்பிரிய முறைப்பாடு செய்திருந்தார்.

எனினும் குறித்த குற்றச்சாட்டை நீண்ட நாட்கள் கழித்து தற்போது இராணுவத் தரப்பு மறுத்துள்ளது.

குறித்த உணவு விடுதி இராணுவ முகாம் வளாகத்தின் உள்ளே இருந்தபோதும் அது இராணுவத்தினரால் நடத்தப்படும் உணவு விடுதி அல்லவென்றும், தனியார் விடுதிகளில் உணவுகளின் விலைகளை நிர்ணயிப்பதில் இராணுவத்தினர் தலையிட முடியாது என்றும் சுனந்த தேசப்பிரியவின் குற்றச்சாட்டு தொடர்பில் இராணுவத் தரப்பு பதிலளித்துள்ளது.

பாத யாத்திரையில் பங்கேற்பது மூழ்கும் கப்பலில் ஏறுவதற்கு நிகரானது என அமைச்சர் பைசர் முஸ்தபா தெரிவித்துள்ளார்.

சுயாதீன தேர்தல் ஆணைக்குழுவின் தலைவர் மஹிந்த தேசப்பிரியவுடன் நடைபெற்ற சந்திப்பின் பின்னர் ஊடகங்களுக்கு கருத்து வெளியிட்ட போது இதனைத் தெரிவித்துள்ளார்.

அவர் மேலும் கூறுகையில்…கூட்டு எதிர்க்கட்சியினால் ஏற்பாடு செய்யப்பட்டுள்ள பாத யாத்திரையில் ஸ்ரீலங்கா சுதந்திரக் கட்சியின் உறுப்பினர்கள் பங்கேற்பது மூழ்கும் கப்பலில் பங்கேற்பதற்கு நிகரானது.

ஸ்ரீலங்கா சுதந்திரக் கட்சியின் மத்திய செயற்குழுவின் அனுமதியின்றி இந்த பாத யாத்திரையில் பங்கேற்கின்றார்கள் என்றால், அவர்கள் அனைவரும் கட்சியை பிளவடையச் செய்ய முயற்சிப்பவர்களாகும்.

சுதந்திரக் கட்சியில் உருவாகி பின்னர் அதற்கு துரோகம் இழைப்பவர்கள் நன்றாக இருக்க முடியாது.கட்சியை அழிக்க முயற்சித்த பலர் இல்லாமல் போயுள்ளனர்.

சுதந்திரக் கட்சியின் வரலாறே இதற்கு சான்று பகர்கின்றது.எவ்வளவு ஆட்களைக் கொண்டு வந்தாலும் அரசாங்கத்தை கவிழ்க்க முடியாது.

நாடாளுமன்றில் கணித ரீதியாக பார்த்தாலும் ஆளும் கட்சிக்கு மிகப் பெரிய பலம் காணப்படுகின்றது.பாத யாத்திரையானது ஸ்ரீலங்கா சுதந்திரக் கட்சியினால் நடத்தப்படுவதல்ல.

சுதந்திரக் கட்சியின் மூலம் நன்மை பெற்றுக்கொண்ட சில வேறும் கட்சிகளைச் சேர்ந்தவர்கள் சுதந்திரக் கட்சியை அழிக்க முயற்சிக்கின்றனர்.

தற்போதைய ஜனாதிபதியே கட்சியில் ஜனநாயகத்தை நிலைநாட்டினார் என அவர் தெரிவித்துள்ளார்.

பாராளுமன்ற உறுப்பினர் வாசுதேவ நாணயக்கார பணம் கொடுத்து முன்பதிவு செய்துள்ளகொழும்பு ஹைட்பார்க் மைதானத்தின் புனரமைப்பு பணிகள் இன்னும் நிறைவடையவில்லைஎன்று கொழும்பு நகர சபை தெரிவித்துள்ளது.

தற்போது குறித்த மைதானத்தில் சீர்திருத்த பணிகள் இடம்பெறுவதால் துரிதமாக இதைநிறைவு செய்து அடுத்த மாதம் முதலாம் திகதிக்குள் பாராளுமன்ற உறுப்பினர்வாசுதேவவிடம் குறித்த மைதானம் கையளிக்கப்படும் என கொழும்பு நகரசபையின்விளையாட்டு மற்றும் பொழுதுபோக்கு பிரிவின் பணிப்பாளர் சாலிகா ரணவீரகுறிப்பிட்டுள்ளார்.

அத்துடன் மழை காரணமாக குறித்த மைதானம் பாதிப்படைந்துள்ளதாகவும்,இதனைநவீனமயப்படுத்துமாறு கொழும்பு நகரசபை பொறியியலாளர் பிரிவுக்கு கடந்த மே மாதமேஅறிவித்தும் அவர்களின் தாமதம் காரணமாக மைதானத்தை உரிய தினத்தில் வழங்குவதில்கால தாமதம் ஏற்பட்டுள்ளதாகவும் பணிப்பாளர் மேலும் தெரிவித்துள்ளார்.

மேலும் யாராவது நகரசபைக்கு பணத்தை வழங்கி மைதானத்தை பதிவு செய்தால் அதனை உரியதினத்தில் வழங்குவது நகரசபையினரின் பொறுப்பு என்றும், அவ்வாறு முடியாதெனில்அவர்களுக்கு மாற்று இடங்கள் வழங்கப்படும் என்றும் தெரிவித்துள்ள அவர்அவ்வாறும் இல்லையென்றால் அவர்களது பணம் மீளவழங்கப்படும் எனவும்குறிப்பிட்டுள்ளார்.

கிராம சேவகர் போட்டிப் பரீட்சைக்காக இம்முறை இரண்டு லட்சம் பேர் தோற்றவுள்ளனதாக அமைச்சர் வஜிர அபேகுணவர்தன தெரிவித்துள்ளார்.

கொழும்பில் அண்மையில் நடைபெற்ற செய்தியாளர் சந்திப்பில் அவர் இதனைத் தெரிவித்துள்ளார்.

அவர் மேலும் கூறுகையில்…

கிராம சேவகர்களை இணைத்துக் கொள்ளும் நோக்கில் நடைபெறவுள்ள போட்டிப் பரீட்சை எதிர்வரும் செப்டம்பர் மாதம் 3ம் திகதி நடைபெறவுள்ளது.

இதற்காக பல்வேறு மாவட்டங்களிலிருந்து விண்ணப்பம் செய்துள்ளனர்.

சுமார் இரண்டாயிரம் கிராம உத்தியோகத்தர்களை நியமிப்பதற்காக இந்தப் போட்டி பரீட்சை நடத்தப்படுகின்றது.

போட்டிப் பரீட்சையில் அதிகளவு புள்ளிகளைப் பெற்றுக்கொள்ளும் விண்ணப்பதாரிகள் கிராம சேவகர்களாக நியமிக்கப்பட உள்ளனர்.

வடக்கு கிழக்கில் அதிகளவில் கிராம சேவகர்களுக்கு தட்டுப்பாடு நிலவி வருகின்றது.

அந்த வெற்றிடங்களை நிரப்புவதற்கு நடவடிக்கை எடுக்கப்படும் என அவர் தெரிவித்துள்ளார்.

எதிர்வரும் உள்ளூராட்சி மன்றத் தேர்தல்களில் ஜனாதிபதி மைத்திரிபால சிறிசேன மூன்றாவது, நான்காவது இடத்தை பிடிப்பது உறுதி என பாராளுமன்ற உறுப்பினர் குமார வெல்கம தெரிவித்துள்ளார்.

மத்துகமயில் இடம்பெற்ற நிகழ்வொன்றில் கலந்து கொண்ட போதே அவர் இதனைத் தெரிவித்துள்ளார்.

மேலும் ஜனவரி 12ஆம் திகதி உள்ளூராட்சி தேர்தல்கள் நடக்கவுள்ளதாக தகவல்கள் கிடைத்துள்ளதாகவும், அதில் ஸ்ரீலங்கா சுதந்திரக்கட்சியானது ஜனாதிபதி தலைமையின் கீழ் போட்டியிட்டால் கட்டாயம் தோல்வி நிச்சயம் என்றும் குறிப்பிட்டுள்ளார்.

அத்துடன் இதில் ஐக்கிய தேசிய கட்சியுடன் இணைந்து ஸ்ரீலங்கா சுதந்திரகட்சி போட்டியிடவுள்ளதாகவும், அவ்வாறு போட்டியிட்டால் மஹிந்தவுடன் இணைந்து போட்டியிடுபவர்களின் வெற்றி உறுதி என்றும் பாராளுமன்ற உறுப்பினர் குமார வெல்கம தெரிவித்துள்ளார்.

 

மன்னார் - தலைமன்னார் பிரதான வீதி சிறுத்தோப்பு காட்டுப்பகுதியில் பதுக்கி வைக்கப்பட்டிருந்த நிலையில் சுமார் 18 இலட்சம் ரூபாய் பெறுமதியான கேரளகஞ்சாப்பொதிகளை பேசாலை பொலிஸார் நேற்று வியாழக்கிழமை மாலை மீட்டுள்ளனர்.

போதைப்பொருள் தடுப்பு பிரிவு பொலிஸ் உத்தியோகஸ்தர்களுக்கு கிடைக்கப்பெற்ற இரகசிய தகவலையடுத்தே குறித்த கேரள கஞ்சாப்பொதிகளை மீட்டுள்ளனர்.

9 பொதிகளில் அடைக்கப்பட்ட குறித்த கஞ்சாப்பொதிகள் 18 கிலோ 600 கிராம் எடை கொண்டது என தெரிவித்த பொலிஸார் சுமார் 18 இலட்சம் ரூபாய் பெறுமதி வாய்ந்தது என தெரிவித்துள்ளனர்.

எனினும் சந்தேகநபர்கள் எவரும் கைது செய்யப்படவில்லை எனவும் பொலிஸார் தெரிவித்தனர்.

சம்பவம் தொடர்பான மேலதிக விசாரணைகளை பேசாலை பொலிஸார் மேற்கொண்டு வருகின்றனர்.

சகல கட்சிகளும், குழுக்களும் தமது அரசியல் பலத்துக்காக இனவாதத்தை தோற்றுவிப்பதாக பாராளுமன்ற உறுப்பினர் அநுரகுமார திசாநாயக்க தெரிவித்துள்ளார்.

கொழும்பு விகாரமாதேவி பூங்காவில் நேற்றுஇடம்பெற்ற நிகழ்வொன்றில் கலந்துக்கொண்டு உரையாற்றும் போதே அநுரகுமார திசாநாயக்க இதனைத் தெரிவித்துள்ளமை குறிப்பிடத்தக்கது.

மேலும், அனைத்து இன மக்களுடைய உரிமைகளை ஏற்றுக்கொள்வதன் மூலமே தேசிய ஒற்றுமையை கட்டியெழுப்ப முடியம் எனவும் அவர் குறிப்பிட்டுள்ளார்.

அத்துடன், அரசியல்வாதிகள் இனவாத கருத்துக்கள் ஊடாக மக்களை பிரிக்கும் நடவடிக்கையில் ஈடுபட்டுள்ளதாகவும் அவர் தெரிவித்துள்ளார்.

ஐக்கிய தேசிய கட்சியுடன் இணைந்து நாட்டை முன்னேற்றுவதற்கான பல வேலைத்திட்டங்களை முன்னெடுத்துள்ளதாக அமைச்சர் அநுரபிரியதர்சன யாப்பா தெரிவித்துள்ளார்.

குருநாகல் நகரபிதாவின் இல்லத்தில் நேற்று இடம்பெற்ற நிகழ்வொன்றில் கலந்துக்கொண்ட போதே அவர் இதனைத் தெரிவித்துள்ளார்.

மேலும், இரண்டு பிரதான கட்சிகளின் கொள்கைக்கு அமைய நடுநிலைமையுடன் செயலாற்றுவதற்கு ஸ்ரீலங்கா சுதந்திரக் கட்சி நடவடிக்கை எடுக்கவுள்ளதாகவும் அவர் குறிப்பிட்டுள்ளார்.

பக்கம் 5 / 23
Top
We use cookies to improve our website. By continuing to use this website, you are giving consent to cookies being used. More details…