JoomlaLock.com All4Share.net

Background Video

இலங்கை

இலங்கை (299)

உள்ளூராட்சி சபைத் தேர்தலை நடத்த நடவடிக்கை எடுக்காததன் மூலம் தனது மற்றும் நாட்டு மக்களின் அடிப்படை உரிமை மீறப்பட்டுள்ளதாக கூறி பெப்ரல் அமைப்பு உயர்நீதிமன்றத்தில் அடிப்படை உரிமை மீறல் மனுவொன்றை தாக்கல் செய்துள்ளது.

உடனடியாக உள்ளூராட்சி சபைத் தேர்தலை நடத்துமாறு உத்தரவிடுமாறும் மனுவில் கோரப்பட்டுள்ளது.

பெப்ரல் அமைப்பின் நிறைவேற்றுப் பணிப்பாளர் ரோஹன ஹெட்டியாராச்சி தாக்கல் செய்துள்ள இந்த மனுவில் மாகாண சபைகள் மற்றும் உள்ளூராட்சி சபைகள் அமைச்சர் பைசஸர் முஸ்தபா, தேர்தல் ஆணைக்குழு மற்றும் எல்லை நிர்ணய ஆணைக்குழு ஆகிய தரப்பினர் பிரதிவாதிகளாக குறிப்பிடப்பட்டுள்ளனர்.

நுவரெலியா திம்புள்ள - பத்தனை பொலிஸ் பிரிவிற்குட்பட்ட பகுதியில் இடம்பெற்ற வாகனவிபத்தில் இருவர் பலத்த காயங்களுக்குள்ளாகியுள்ளனர்.

குறித்த விபத்து நேற்று இரவு 11.30 மணியளவில், அட்டன் நுவரெலியா பிரதான வீதியில் நடந்துள்ளதாக பொலிஸார் குறிப்பிட்டுள்ளனர்.

கொட்டகலை, தலவாக்கலை பகுதியிலிருந்து அட்டன் நோக்கி பயணித்த மோட்டார் சைக்கிள் எதிரே வந்த கெப் ரக வாகனம் ஒன்றுடன் நேருக்கு நேர் மோதியதாலேயே இந்த விபத்து இடம்பெற்றுள்ளதாக தெரிவிக்கப்பட்டுள்ளது.

குறித்த விபத்தில், மோட்டர் சைக்கிளில் சென்ற இருவருமே பலத்த காயங்களுடன் நுவரெலியா மாவட்ட வைத்தியசாலையில் அனுமதிக்கப்பட்டுள்ளனர்.

கெப் ரக வாகன சாரதியை கைது செய்து விபத்து தொடர்பாக மேலதிக விசாரணைகளை மேற்கொண்டு வருவதாக திம்புள்ள பத்தனை பொலிஸார் தெரிவித்துள்ளனர்.

கூட்டு எதிர்க்கட்சியின் பாத யாத்திரையின் பின்னர் ஸ்ரீலங்கா சுதந்திரக் கட்சியில் பாரிய மாற்றங்கள் செய்யப்பட உள்ளதாக வட மத்திய மாகாண முதலமைச்சர் பேசல ஜயரட்ன தெரிவித்துள்ளார்.

சுதந்திரக் கட்சியின் தலைமையகத்தில் நேற்று நடைபெற்ற செய்தியாளர் சந்திப்பில் அவர் இதனைக் குறிப்பிட்டுள்ளார்.

அவர் மேலும் கூறுகையில்…

கண்டியில் ஆரம்பமாகவுள்ள கூட்டு எதிர்க்கட்சியின் பாத யாத்திரைப் போராட்டத்தின் பின்னர் கட்சியில் மாற்றங்கள் செய்யப்படும்.

சுதந்திரக் கட்சிக்கு எதிராக செயற்படும் எந்தவொரு நபருக்கு எதிராகவும் ஒழுக்காற்று நடவடிக்கை எடுக்கப்பட வேண்டும்.

கட்சியை பிளவடையச் செய்யக் கூடாது என்ற காரணத்தினால் ஜனாதிபதி நீண்ட காலமாக பொறுமை காத்து வந்தார். எனினும் சில சந்தர்ப்பங்களில் சில முக்கியமான தீர்மானங்கள் எடுக்கப்பட வேண்டியிருக்கின்றது.

அந்த அடிப்படையில் பாத யாத்திரையில் பங்கேற்போர் தொடர்பில் கட்சியில் முக்கிய தீர்மானங்கள் எடுக்கப்படும் என பேசல ஜயரட்ன தெரிவித்துள்ளார்.

வியாழக்கிழமை, 28 ஜூலை 2016 00:00

மதுபானசாலைகளுக்கு 10 நாட்கள் பூட்டு!!!!!!

Written by

கண்டி மற்றும் கண்டியை சுற்றியுள்ள பகுதிகளில் உள்ள மதுபானசாலைகளை 10 நாட்களுக்கு மூடவுள்ளதாக கலால் தீர்வை திணைக்களம் தெரிவித்துள்ளது.

கண்டி தலதா மாளிகையில் இடம்பெறவிருக்கும் பெரஹராவை முன்னிட்டே இந்த தீர்மானம் எடுக்கப்பட்டுள்ளதாக தெரிவிக்கப்பட்டுள்ளது.

ஆகஸ்ட் 8ஆம் திகதியில் இருந்து ஆகஸ்ட் 18ஆம் திகதி வரையிலேயே மதுபானசாலைகள் மூடப்பட உள்ளன.

இந்த காலக்கட்டத்தின் போது சட்டவிரோதமாக மதுபான போத்தல்களை கொள்வனவு செய்யும் நபர்களுக்கு எதிராக சட்ட நடவடிக்கை எடுக்கப்படும் எனவும் கலால் தீர்வை திணைக்களம் அறிவித்துள்ளது.

நல்லாட்சி அரசாங்கம் பதவிக்கு வந்து ஓராண்டு பூர்த்தியடைய இன்னும் சில வாரங்களே எஞ்சியுள்ள இந்த வேளையில் ஆளும் கூட்டணிக் கட்சிகள் இரண்டுக்குமே சோதனைக் காலம் வந்திருக்கிறது.

நெருக்கடி நிலைமைகளை சமாளிப்பதில் அரசாங்கம் கடைப்பிடிக்கும் மென்மையான போக்கும், கருத்துச் சுதந்திரத்துக்குக் கொடுக்கப்படும் அதீத சுதந்திரமும் மக்கள் தமது வாழ்வாதாரப் பிரச்சினைகளுக்காக கிளர்ந்தெழ வசதியான களம் அமைத்துக் கொடுத்திருக்கிறது எனலாம்.

இதில் தற்போது சூடிபிடித்துள்ள பெறுமதி சேர்க்கப்பட்ட வரி (வற்) விவகாரம் ஸ்ரீலங்கா சுதந்திரக் கட்சியையும், ஐக்கிய தேசியக் கட்சியையும் தேவையில்லாத நெருக்கடிக்குள் தள்ளியிருக்கிறது.

மத்திய வங்கிக்கு புதிய ஆளுநரை நியமிக்கும் விடயத்தில் பிரதமர் ரணில் விக்கிரமசிங்க முன்னாள் ஆளுநர் அர்ஜுன மகேந்திரனையே தொடர்ந்தும் அந்தப் பதவியில் வைத்திருக்க விரும்பினார். ஆனால், ஜனாதிபதி மைத்திரிபால சிறிசேனவோ வேறு ஒருவரைத்தான் நியமிக்கவேண்டுமென விரும்பினார்.

இந்த இழுபறியையடுத்து புதிய ஆளுநர் இந்திரஜித் குமாரசுவாமி நியமிக்கப்பட்டார். அதியுயர் கல்வித் தகுதி உள்ளவராகவும், நிதி சார்ந்த வட்டாரங்களில் கௌரவ அந்தஸ்தில் உள்ள ஒருவராகவும் இந்திரஜித் குமாரசுவாமி பார்க்கப்படுகிறார். எனவே, இநதப் பதவியில் அவர் பாரபட்சமின்றி பணியாற்றுவார் என எதிர்பார்க்கப்படுகிறது.

'ஒரு பிரச்சினை முடிந்து விட்டது' என அரசாங்கம் நிம்மதிப் பெருமூச்சு விட்டுக் கொண்டிருந்த வேளையில், வேறொரு வீக்கமாக முளைத்திருக்கிறது ‘வற்’ அதிகரிப்பு. இந்தப் பிரச்சினையை அரசாங்கம் மிக இலேசாக தவிர்த்திருக்கலாம்.

ஆனால் அரசாங்கத்தின் பலவீனத்தால் மஹிந்த ஆதரவு அணி இதைப் பெரிதாக நீட்டி முழங்கி மக்கள் தற்போது அனுபவிக்கும் பொருளாதாரக் கஷ்டங்களுக்கு மத்தியில் ‘வற்’ ஒரு புதிய வரி என்ற தோற்றப்பாட்டை உருவாக்க பிரசாரம் மேற்கொண்டு வருகின்றது.

இதனால் ‘வற்’ என்ற ஒரு புதிய வரியை அரசாங்கம் விதித்திருப்பதனால்தான் பாவனைப் பொருட்களின் விலைகள் ஏறி விட்டன என மக்கள் இப்போது நினைக்கிறார்கள். ஆனால், இந்த ‘வற்’ வரி கடந்த அரசாங்க காலத்திலும் இருந்தது. அப்போது அது குறைந்த வீதத்தில் விதிக்கப்பட்டிருந்தது.

பதினான்கு சதவீதமாக இருந்த ‘வற்’ வரி தற்போது பதினைந்து வீதமாக அதிகரிக்கப்பட்டுள்ளது. இதுதான் உண்மை. இந்த உண்மையை அரசாங்கம் மக்களுக்கு எடுத்துக் கூறத் தவறியதால்தான் மக்களின் எதிர்ப்பு மேலோங்கி வருகிறது.

அரசாங்கத்தில் உள்ள அமைச்சர்கள் இந்த வரி குறித்துப் பேசுகிறார்கள். ஆனால் அவர்களில் எத்தனை பேர் இது பழைய வரிதான் என இதுவரை கூறியிருக்கிறார்கள் என்பது கேள்விக்குரிய விடயம்.இதுபோதாதென்று அரசாங்கம் தகுந்த சட்டமியற்றலின்றி அதிகரிக்கப்பட்ட ‘வற்’ வரியை மே 2ம் திகதியிலிருந்து நடைமுறைப்படுத்த தீர்மானித்தமை அது செய்த மற்றொரு பிழை.

இதனால் தேசிய சுதந்திர முன்னணியின் தலைவர் விமல் வீரவன்சவுடன் மற்றும் ஐவர் நீதிமன்றம் சென்றனர். இவர்களது வழக்கை ஆராய்ந்த உச்சநீதிமன்றம் ‘வற்’ வரி மட்டுமல்ல தேசத்தைக் கட்டியெழுப்பும் வரியையும் மே 2ம் திகதியிலிருந்து நடைமுறைப்படுத்துவதற்கு எதிராக இடைக்காலத் தடை ஒன்றை விதித்தது.

இதை அடுத்து விஷயம் விபரீதமாகிறது என்பதைப் புரிந்து கொண்ட பிரதமர் அலுவலகம் ‘வற்’ மற்றும் ‘தேசத்தைக் கட்டியெழுப்பும் வரி’ என்ற இந்த இரண்டு வரிகளிலும் செய்யப்பட்ட திருத்தங்கள் விரைவில் பாராளுமன்றத்தின் ஒப்புதலைப் பெற நடவடிக்கை எடுக்கப்படும் என அறிக்கை வெளியிட்டது.

இது இவ்விதமிருக்க, அரசாங்கத்திலுள்ள ஸ்ரீல. சு. க உறுப்பினர்கள் அதிகரிக்கப்பட்ட ‘வற்’ வரி நடைமுறைப்படுத்தப்பட்டால் அது கட்சியின் செல்வாக்கை சரியச் செய்து விடும் என எச்சரித்திருக்கின்றனர்.

உள்ளூராட்சித் தேர்தல்கள் அறிவிக்கப்பட்டுள்ள நிலையில் தமது தேர்தல் தொகுதிகளில் மஹிந்த ஆதரவு அணி செய்து வரும் பிரசாரத்தில் மக்கள் ‘வற்’ வரிக்கு எதிராக கொதித்தெழுந்துள்ளதால் ஜனாதிபதி இதில் தலையிட்டு நிலைமையின் பாரதூரமான தன்மையை சற்றுத் தணித்துள்ளார்.

இதன்படி கைத்தொழில் மற்றும் வர்த்தக அமைச்சு வர்த்தமானி அறிவித்தல் மூலம் 16 அத்தியாவசிய பொருட்களுக்கு கட்டுப்பாட்டு விலையை நிர்ணயம் செய்திருக்கிறது.

இதனைத் தொடர்ந்து அதிகரிக்கப்பட்ட ‘வற்’ வரி நடைமுறைப்படுத்தப்படும் போது மக்கள் மீது விழும் மேலதிக சுமையைக் குறைக்க எடுக்கக் கூடிய நடவடிக்கைகள் பற்றி ஆராய ஒரு குழுவையும் ஸ்ரீல.சு.க மத்திய குழு நியமித்திருக்கிறது.

புதிய ‘வற்’ வரிகள் 2017 மார்ச் வரை நடைமுறைப்படுத்தப்படுவதை தடை செய்வதையே அவர்கள் விரும்புவதாகத் தெரிகிறது. அரசியலை மையமாகக் கொண்ட இத்தகைய நடவடிக்கைகளால் ஏற்கனவே காலியான திறைசேரிக்கு எதிர்பார்க்கும் வருவாய் கிடைக்காமல் போகும்.

புதிய ‘வற்’ வரி மீது ஐ. தே. கவும், ஸ்ரீல.சு.கவும் வெவ்வேறான நிலைப்பாடுகளைக் கொண்டிருந்தாலும் ஸ்ரீல.சு.கவின் மத்திய குழு புதிய வரிகள் அடுத்த உள்ளூராட்சி மன்றத் தேர்தலுக்கு முன்னர் நடைமுறைப்படுத்தப்பட்டால் அது தேர்தலில் சிறிசேன மற்றும் மஹிந்த ராஜபக்ச அணிகளுக்கிடையில் வாக்குச் சிதறல்கள் இடம்பெற வழிவகுத்து விடும் என்ற அச்சத்தில் இருக்கிறது.

அதிகாரத்தில் இல்லாவிட்டாலும் 2015 பொதுத் தேர்தலில் 51 பாராளுமன்ற உறுப்பினர்களின் ஆதரவு இருப்பதால் அடுத்த உள்ளூராட்சி மன்றத் தேர்தலில் சிறிசேன அணியைத் தோற்கடிக்கமுடியும் என்ற நம்பிக்கையில் ராஜபக்ச அணி இப்போது மிதக்கிறது.

இருப்பினும் பாரம்பரிய வாக்களிப்பு முறையும் ஸ்ரீல.சு.க மற்றும் ஐ.தே.க வாக்காளர் பலமும் இப்போது இருப்பது போலவே தொடர்ந்தும் இருந்தால் ஸ்ரீல.சு.கவில் ஏற்படக் கூடிய பிளவு ஐ.தே.கவுக்கு வெற்றியையே கொண்டு வரும்.

ஐ. தே.க பாராளுமன்ற உறுப்பினர்களை விடவும், ‘வற்’ போன்ற விவகாரங்களால் சிறிசேன அணியைச் சேர்ந்த பாராளுமன்ற உறுப்பினர்கள் குழப்பமடைந்திருப்பது இதனால்தான்.

இந்த ‘வற்’ அதிகரிப்புக்கு எதிராக மஹிந்த அணி பொதுமக்களின் ஆதரவைத் திரட்டியதற்கு முன்னர் இந்த வரி ஏற்கனவே கடந்த அரசாங்கத்திலும் இருந்ததுதான்.

நாம் அதை நான்கு சதவீதத்தால் மட்டுமே உயர்த்துகிறோம் என அரசாங்கம் மக்களுக்கு தெளிவுபடுத்தாததனால் இப்போது அதற்கு எதிராக எழுந்துள்ள எதிர்ப்பலைக்கு அரசாங்கம் முகம் கொடுக்க வேண்டிய நிலையில் உள்ளது.

‘வற்’ வரி விதிக்கப்பட்டிருந்தால் ஐ. தே. க. வும் செல்வாக்கை இழந்திருக்கும்.ஒருவகையில் ‘வற்’ வரியை நடைமுறைப்படுத்துவதில் ஸ்ரீல.சு.க பின்வாங்குவது ஐ.தே.கவுக்கு ஒருமறைமுகமான வெற்றி என்றே கூற வேண்டும்.

எது எப்படி இருந்தாலும், அரசாங்கம் தனது கஜானாவை, நிரப்புவதற்கு பெரும் பிரயத்தனம் எடுத்து வரும் இந்த நேரம், இந்த ‘வற்’ விவகாரம் அரசாங்கத்துக்கு தொடரும் தலைவலியாகவே இருக்கும் என்பதை மறுக்க முடியாது.

அரசியல்வாதிகள், அரசாங்க அதிகாரிகள் வெளிநாட்டு பயணங்கள், விஜயங்களை மேற்கொள்வது தொடர்பில் உரிய நடைமுறை பின்பற்றப்பட வேண்டுமென ஜனாதிபதி அறிவுறுத்தியுள்ளார்.

அமைச்சரவை கூட்டத்தின் போது அவர் இதனைக் குறிப்பிட்டுள்ளார்.

நேற்று முன்தினம் நடைபெற்ற அமைச்சரவைக் கூட்டத்தின் போது ஜனாதிபதி இது தொடர்பிலான யோசனை ஒன்றை சமர்ப்பித்து அனுமதி பெற்றுக்கொண்டுள்ளார் என ஊடக அமைச்சர் கயந்த கருணாதிலக்க தெரிவித்துள்ளார்.

அரசாங்க நிதியை சிக்கனமாக பயன்படுத்தும் நோக்கில் இந்த புதிய நடைமுறை அறிமுகம் செய்யப்படவுள்ளது.

அரச நிதியை சிக்கனமாகவும் பொறுப்புடனும் பயன்படுத்தும் வகையில் சுற்றுநிருபமொன்று வெளியிடப்படவுள்ளது.

குறிப்பாக உள்ளுராட்சி மன்ற பிரதிநிதிகள் மற்றும் அரசாங்க அதிகாரிகள் மக்கள் பணத்தைக்கொண்டு வெளிநாட்டு விஜயங்களை மேற்கொள்வதாக கண்டறியப்பட்டுள்ளது.

அரசாங்க நிதி, வெளிநாட்டு கடன்கள் போன்றவற்றை சரியான முறையில் பயன்படுத்துவதற்காக அரசியல்வாதிகள் அரசாங்க உத்தியோகத்தர்களின் வெளிநாட்டுப் பயணங்களை கிரமமாக்கும் திட்டமொன்றை ஜனாதிபதி அமைச்சரவையில் சமர்ப்பித்து, அங்கீகாரம் பெற்றுக் கொண்டுள்ளார் என ஊடக அமைச்சர் கயந்த கருணாதிலக்க தெரிவித்துள்ளார்.

கூட்டு எதிர்க்கட்சியினரின் கொழும்பு நோக்கிய பாதயாத்திரை இன்று காலை ஒன்பது மணியளவில் கண்டி புறநகர் கெடம்பேயில் இருந்து ஆரம்பமாகவுள்ளது.

கண்டி மாநகருக்குள் இருந்து பாதயாத்திரையைத் தொடங்குவது குறித்து நீதிமன்றம் வழங்கியுள்ள இடைக்காலத் தடை உத்தரவு காரணமாக இந்த மாற்று ஏற்பாடு மேற்கொள்ளப்பட்டுள்ளது.

கூட்டு எதிர்க்கட்சியின் அங்கத்துவ கட்சிகள் அனைத்தும் இந்தப் பாதயாத்திரையில் கலந்து கொள்ளவுள்ளதாக அறிவிக்கப்பட்டுள்ளது.

பாதயாத்திரைக்கு முன்னாள் ஜனாதிபதி மஹிந்த ராஜபக்ச தலைமை தாங்கவுள்ளார்.

எதிர்வரும் ஆகஸ்ட் மாதம் முதலாம் திகதி இப்பாத யாத்திரை கொழும்பை வந்தடையவுள்ளதாக அறிவிக்கப்பட்டுள்ளது.

பாத யாத்திரைப் போராட்டம் பேராதனையில் ஆரம்பமாகும் - மஹிந்தானந்த அளுத்கமகே

பாத யாத்திரைப் போராட்டம் பேராதனையில் ஆரம்பமாக உள்ளதாக கூட்டு எதிர்க்கட்சியின் நாடாளுமன்ற உறுப்பினர் மஹிந்தானந்த அளுத்கமகே தெரிவித்துள்ளார்.

தற்போதைய அரசாங்கத்திற்கு எதிர்ப்பை வெளியிடும் நோக்கில் “ஜன சட்டன பாத யாத்திரைப் போராட்டம்” இன்று 9.00 மணிக்கு ஆரம்பமாகவுள்ளது.

அரசாங்கத்தின் அடக்குமுறைகள், அரசியல் அமைப்பு திருத்தம், உள்ளுராட்சி மன்றத் தேர்தல் ஒத்தி வைக்கப்பட்டமை, வரி அதிகரித்தல், போர்க்குற்றவியல் நீதிமன்றம் அமைத்தல், எட்கா உடன்படிக்கை, அரசியல் பழிவாங்கல்கள் உள்ளிட்ட காரணிகளை முன்னிலைப்படுத்தி இந்தப் போராட்டம் நடத்தப்படவுள்ளது.

இன்று ஆரம்பமாகும் பாத யாத்திரை ஆகஸ்ட் மாதம் 1ம் திகதி கொழும்பிற்கு சென்றடையவுள்ளது.

இந்த பாத யாத்திரை மாலை 4.30 அளவில் மாவனல்ல நகரை சென்றடையவுள்ளது.

நாளை காலை 9.00 மணிக்கு மீளவும் ஆரம்பமாகும் பாத யாத்திரை மாலை 4.30 அளவில் நெலும்தெனிய நகரை சென்றடையவுள்ளது.

30ம் திகதி காலை 9.00 மணிக்கு மீளவும் ஆரம்பமாகும் பாத யாத்திரை மாலை 4.30 மணி அளவில் நிட்டம்புவ நகரை சென்றடையும் எனவும், 31ம் திகதி நிட்டம்புவவிலிருந்து ஆரம்பமாகி மாலை 4.30 அளவில் கிரிபத்கொட நகரை சென்றடையும் எனவும் தெரிவிக்கப்படுகிறது.

ஆகஸ்ட் மாதம் 1ம் திகதி கிரிபத்கொடவிலிருந்து கொழும்பை சென்றடையும் என தெரிவிக்கப்படுகிறது.

பிற்பகல் 3.00 மணியளவில் முன்னாள் ஜனாதிபதி மஹிந்த ராஜபக்ச தலைமையில் கொழும்பில் கூட்டமொன்று நடத்தப்படவுள்ளது.

இந்தக் கூட்டம் கொழும்பு ஹைட்பார்க் மைதானத்தில் நடத்தப்படவுள்ளதாகத் தெரிவிக்கப்படுகிறது.

முற்போக்கு சக்திகள் அனைத்தையும் அணி திரளுமாறு முன்னாள் ஜனாதிபதி மஹிந்த ராஜபக்ச கோரிக்கை விடுத்துள்ளார்.

எவ்வாறான தடைகள் ஏற்படுத்தப்பட்டாலும் ஜன சட்டன பாத யாத்திரை முன்னெடுக்கப்படும் என அவர் குறிப்பிட்டுள்ளார்.

நாட்டை நேசிக்கும் அனைத்து முற்போக்கு சக்திகளும் இந்தப் போராட்டத்தில் இணைந்து கொள்ளமாறு பகிரங்க அழைப்பு விடுக்கின்றேன் என தெரிவித்துள்ளார்.

பாத யாத்திரைக்கு இறை ஆசி வேண்டி வழிபாடுகளில் ஈடுபட்டதன் பின்னர் ஊடகங்களுக்கு கருத்து வெளியிட்ட போது இந்த அழைப்பினை விடுத்துள்ளார்.a

கூட்டு எதிர்க்கட்சியின் முக்கியஸ்தர்கள் நேற்றிரவு இந்துக்கோயில்கள் மற்றும் இஸ்லாமிய பள்ளிவாசலில் நடைபெற்ற பிரார்த்தனை நிகழ்வுகளில் கலந்து கொண்டுள்ளனர்.

கூட்டு எதிர்க்கட்சியின் சார்பில் இன்று ஆரம்பிக்கப்படவுள்ள பாதயாத்திரைக்கு ஆசீர்வாதம் பெறும் நோக்கில் இந்தப் பிரார்த்தனை நிகழ்வுகள் ஏற்பாடு செய்யப்பட்டிருந்தன.

இதன்போது முதலில் தினேஷ் குணவர்த்தன, வாசுதேவ நாணயக்கார, விமல் வீரவங்ச, உதய கம்மன்பில, பேராசிரியர் திஸ்ஸ வித்தாரண, கம்யூனிஸ்ட் கட்சியின் தலைவர் ராஜா கொல்லுரே ஆகியோர் தலதா மாளிகையில் வழிபாடுகளில் கலந்து கொண்டிருந்தனர்.

இதன் பின்னர் முன்னாள் ஜனாதிபதி மஹிந்த ராஜபக்ஷ கண்டி இந்துக் கோயில், மீரா மக்காம் பள்ளிவாசல் ஆகியவற்றில் நடைபெற்ற வழிபாட்டு நிகழ்வுகளில் கலந்து கொண்டிருந்தார்.

இதனையடுத்து கிறித்தவ தேவாலயத்திலும் விசேட ஆராதனை நிகழ்வொன்று ஏற்பாடு செய்யப்பட்டிருந்தது.

இன்று காலையிலும் பாதயாத்திரைக்கு முன்னதாக கண்டி தலதா மாளிகையில் வழிபாட்டு நிகழ்வொன்றில் கூட்டு எதிர்க்கட்சியின் முக்கியஸ்தர்கள் கலந்து கொள்ளவுள்ளனர்.

பல்வேறு அரசியல் கட்சிகளினால் இன்று வியாழக்கிழமை ஏற்பாடு செய்யப்பட்டுள்ள நடைபவனிகள் மற்றும் கட்சி ஊழியர் ஊக்குவிப்பு நிகழ்ச்சிகள் என்பனவற்றின் போது மோதல்கள் ஏற்படக் கூடிய சாத்தியம் இருப்பதாக பொலிஸ் மா அதிபர் புஜித ஜயசுந்தர தெரிவித்துள்ளார்.

கலவரம் ஏற்படும் விதமான செயற்படும் சகலருக்கும் எதிராக சட்டம் கடுமையாக நடைமுறைப்படுத்தப்படும் எனவும் பொலிஸ் மா அதிபர் புஜித ஜயசுந்தர எச்சரித்துள்ளார்.

அவர் விடுத்துள்ள விசேட அறிவித்தல் ஒன்றில் இதனை அறிவித்துள்ளார்.

கண்டியிலிருந்து ஆரம்பிக்கவுள்ள நடைபவனி மற்றும் வேறு அரசியல் கட்சிகள் ஏற்பாடு செய்துள்ள நிகழ்வுகள் என்பனவற்றினால் மோதல்கள் ஏற்படக் கூடிய சாத்தியப்பாடுகள் இருப்பதாக தகவல்கள் கிடைக்கப் பெற்றுள்ளன.

இதனால், பொது மக்கள் கூடிய அவதானத்துடன் இருக்குமாறும் பொலிஸ் மா அதிபர் விசேட அறிவித்தல் மூலம் வேண்டுகோள் விடுத்துள்ளார்.

மோதல்கள் குறித்து விழிப்புடன் இருங்கள்! ஜனாதிபதியின் அதிரடி உத்தரவு

கண்டியில் இருந்து கொழும்பு நோக்கி கூட்டு எதிர்க்கட்சியினால் ஏற்பாடு செய்யப்பட்டிருக்கும் பாதயாத்திரையின் போது எந்த மோதல்களும் இடம்பெறக் கூடாது என ஜனாதிபதி மைத்திரிபால சிறிசேன பொலிஸ்மா அதிபருக்கு உத்தரவிட்டுள்ளார்.

ஸ்ரீ லங்கா சுதந்திர கட்சி அமைச்சர்களால் நேற்றிரவு இடம் பெற்ற ஒன்று கூடலின் போதே ஜனாதிபதி இந்த உத்தரவை பிறப்பித்துள்ளார்.

இந்த பாதயாத்திரையின் போது ஐக்கிய தேசிய கட்சியின் ஆதரவாளர்களாலும் தாக்குதல் ஏற்பட வாய்ப்பு இருப்பதாக ஜனாதிபதி குறிப்பிட்டுள்ளார்.

மேலும் மோதல்கள் குறித்து விழிப்புணர்வுடன் செயற்படுமாறும் ஜனாதிபதி மைத்திரிபால சிறிசேன தெரிவித்துள்ளார்.

பக்கம் 5 / 22
Top
We use cookies to improve our website. By continuing to use this website, you are giving consent to cookies being used. More details…