JoomlaLock.com All4Share.net

Background Video

இலங்கை

இலங்கை (318)

பல்வேறு அரசியல் கட்சிகளினால் இன்று வியாழக்கிழமை ஏற்பாடு செய்யப்பட்டுள்ள நடைபவனிகள் மற்றும் கட்சி ஊழியர் ஊக்குவிப்பு நிகழ்ச்சிகள் என்பனவற்றின் போது மோதல்கள் ஏற்படக் கூடிய சாத்தியம் இருப்பதாக பொலிஸ் மா அதிபர் புஜித ஜயசுந்தர தெரிவித்துள்ளார்.

கலவரம் ஏற்படும் விதமான செயற்படும் சகலருக்கும் எதிராக சட்டம் கடுமையாக நடைமுறைப்படுத்தப்படும் எனவும் பொலிஸ் மா அதிபர் புஜித ஜயசுந்தர எச்சரித்துள்ளார்.

அவர் விடுத்துள்ள விசேட அறிவித்தல் ஒன்றில் இதனை அறிவித்துள்ளார்.

கண்டியிலிருந்து ஆரம்பிக்கவுள்ள நடைபவனி மற்றும் வேறு அரசியல் கட்சிகள் ஏற்பாடு செய்துள்ள நிகழ்வுகள் என்பனவற்றினால் மோதல்கள் ஏற்படக் கூடிய சாத்தியப்பாடுகள் இருப்பதாக தகவல்கள் கிடைக்கப் பெற்றுள்ளன.

இதனால், பொது மக்கள் கூடிய அவதானத்துடன் இருக்குமாறும் பொலிஸ் மா அதிபர் விசேட அறிவித்தல் மூலம் வேண்டுகோள் விடுத்துள்ளார்.

மோதல்கள் குறித்து விழிப்புடன் இருங்கள்! ஜனாதிபதியின் அதிரடி உத்தரவு

கண்டியில் இருந்து கொழும்பு நோக்கி கூட்டு எதிர்க்கட்சியினால் ஏற்பாடு செய்யப்பட்டிருக்கும் பாதயாத்திரையின் போது எந்த மோதல்களும் இடம்பெறக் கூடாது என ஜனாதிபதி மைத்திரிபால சிறிசேன பொலிஸ்மா அதிபருக்கு உத்தரவிட்டுள்ளார்.

ஸ்ரீ லங்கா சுதந்திர கட்சி அமைச்சர்களால் நேற்றிரவு இடம் பெற்ற ஒன்று கூடலின் போதே ஜனாதிபதி இந்த உத்தரவை பிறப்பித்துள்ளார்.

இந்த பாதயாத்திரையின் போது ஐக்கிய தேசிய கட்சியின் ஆதரவாளர்களாலும் தாக்குதல் ஏற்பட வாய்ப்பு இருப்பதாக ஜனாதிபதி குறிப்பிட்டுள்ளார்.

மேலும் மோதல்கள் குறித்து விழிப்புணர்வுடன் செயற்படுமாறும் ஜனாதிபதி மைத்திரிபால சிறிசேன தெரிவித்துள்ளார்.

கூட்டு எதிர்க்கட்சியின் பாத யாத்திரையின் பின்னர் ஸ்ரீலங்கா சுதந்திரக் கட்சியில் பாரிய மாற்றங்கள் செய்யப்பட உள்ளதாக வட மத்திய மாகாண முதலமைச்சர் பேசல ஜயரட்ன தெரிவித்துள்ளார்.

சுதந்திரக் கட்சியின் தலைமையகத்தில் நேற்று நடைபெற்ற செய்தியாளர் சந்திப்பில் அவர் இதனைக் குறிப்பிட்டுள்ளார்.

அவர் மேலும் கூறுகையில்…

கண்டியில் ஆரம்பமாகவுள்ள கூட்டு எதிர்க்கட்சியின் பாத யாத்திரைப் போராட்டத்தின் பின்னர் கட்சியில் மாற்றங்கள் செய்யப்படும்.

சுதந்திரக் கட்சிக்கு எதிராக செயற்படும் எந்தவொரு நபருக்கு எதிராகவும் ஒழுக்காற்று நடவடிக்கை எடுக்கப்பட வேண்டும்.

கட்சியை பிளவடையச் செய்யக் கூடாது என்ற காரணத்தினால் ஜனாதிபதி நீண்ட காலமாக பொறுமை காத்து வந்தார். எனினும் சில சந்தர்ப்பங்களில் சில முக்கியமான தீர்மானங்கள் எடுக்கப்பட வேண்டியிருக்கின்றது.

அந்த அடிப்படையில் பாத யாத்திரையில் பங்கேற்போர் தொடர்பில் கட்சியில் முக்கிய தீர்மானங்கள் எடுக்கப்படும் என பேசல ஜயரட்ன தெரிவித்துள்ளார்.

இந்த நாட்டில் தமிழ் மக்கள், தமிழ் போராளிகள் கொல்லப்பட்டால் விசாரணைகள் தேவையில்லை என்பது எழுதப்படாத சட்டமாகவுள்ளது என முன்னாள் பாராளுமன்ற உறுப்பினர் சுரேஸ் பிரேமச்சந்திரன் தெரிவித்துள்ளார்.

வவுனியாவில் நேற்று இடம்பெற்ற வெலிக்கடை படுகொலையின் 33ஆவது நினைவு தினத்தில் கலந்து கொண்டு உரையாற்றும் போதே இதனைத் தெரிவித்தார்.

அவர் தொடர்ந்தும் தெரிவிக்கையில்,

மனிதப்படுகொலை என்று சொல்லும் வகையில் இந்த நாட்டில் கொலைகள் நடைபெற்றுள்ளன.

பல்லாயிரக்கணக்கான மக்கள் காணாமல் போக செய்யப்பட்டார்கள். சரணடைந்தவர்கள், கடத்தப்பட்டவர்கள் என இப்படி பலருக்கு என்ன நடந்தது என தெரியாதுள்ளது.

ஆகவே தமிழ் மக்கள், தமிழ் போராளிகள் கொல்லப்பட்டால் விசாரணைகள் தேவையில்லை என்பது இந்த நாட்டில் எழுதப்படாத ஒரு சட்டமாக இருக்கிறது.

ஐ.நா மனித உரிமை ஆணையகத்தில் ஒரு தீர்மானம் நிறைவேற்றப்பட்டது. அந்த தீர்மானத்தை முதன்முதலாக அமெரிக்கா கொண்டு வந்தது.

அதில் முழுமையாக மாற்றம் செய்யப்பட்டு இலங்கை அரசாங்கத்தின் ஒப்புதலுடன் அது வந்தது.

சர்வதேச நீதிபதிகளுடன் கூடிய ஒரு உள்ளக விசாரணையை நாங்கள் நடத்துவோம். அந்த உள்ளக விசாரணை ஊடாக யுத்த குற்றங்களில் ஈடுபட்டவர்களுக்கான தண்டனைகள் வழங்கப்படும். உண்மைகள் கண்டறியப்படும். அதன் மூலம் தமிழ், சிங்கள மக்களிடையே நல்லிணக்கத்தை ஏற்படுத்துவதற்கான முயற்சிகளை மேற்கொள்ளலாம் என்று கூறப்பட்டது.

தற்போதைய பிரதமர் மற்றும் வெளிவிவகார அமைச்சர் ஆகியோர் இந்த தீர்மானத்தின் ஒவ்வொரு வரிகளையும் பார்த்த பின்பு அதனை ஏற்றுக் கொள்வதாக தெரிவித்தனர்.

ஆனால் இன்று அந்த தீர்மானத்தின் பிரகாரம் செயற்படவில்லை. நான் உயிருடன் இருக்கும்வரை சர்வதேச நீதிபதிகள் அழைக்கப்பட மாட்டார்கள் என ஜனாதபதி கூறுகிறார்.

எங்களுடைய நாட்டு நீதித்துறை போதுமானது நாங்கள் வேறு யாரையும் அழைக்க தேவையில்லை என பிரதமர் கூறுகின்றார்.

இவர்களுடைய கருத்துக்கள் தனிப்பட்ட கருத்து. அது அரசாங்கத்தின் கருத்து இல்லை என கூறிய வெளிவிவகார அமைச்சர் தற்போது நான் சர்வதேச நீதிபதிகளை கோரவில்லை. அவர்களிடம் சில தொழில்நுட்ப உதவிகளை பெறலாம் என்றே கூறினேன் என கூறுகின்றார்.

மொத்தத்தில் யுத்தக் குற்றங்கள், காணாமல் போதல் தொடர்பாக ஒரு முழுமையான விசாரணை நடத்துவதற்கு இலங்கை அரசாங்கம் தயாராக இல்லை என்பது தான் முதலாவது விடயம்.

advertisement

அதுமட்டுமல்ல, விசாரணைகள் இடம்பெறுவதற்கு முன்பாகவே இராணுவத்தினர் விசாரிக்கப்படமாட்டார்கள் என தீர்ப்பு கூறப்பட்டுள்ளது.

இராணுவத்திற்கு எதிரான விசாரணைகள் நடைபெறமாட்டாது. அப்ப யாருக்கு எதிராக விசாரணை..? ஏன் இந்த விசாரணை? போன்ற பல்வேறுபட்ட கேள்விகள் தமிழ் மக்களுக்கு எழுந்திருக்கின்றது.

தற்போது உள்ள அரசாங்கத்தை கொண்டு வந்ததில் தமிழ் மக்களுக்கும் பாரிய பங்களிப்பு இருக்கிறது.

தமிழ் மக்கள் மகிந்த ராஜபக்சவை மாற்ற வேண்டும் என விரும்பினார்கள். தமிழ்த் தேசியக் கூட்டமைப்பும் அதனை விரும்பியது.

தமிழ்த் தேசியக் கூட்டமைப்பின் தலைமை மைத்திரிபால சிறிசேனவுக்கு ஆதரவு வழங்குமாறு மக்களை கேட்டார்கள்.

மக்களும் ஆதரவு வழங்கினார்கள். இதனால் ஆட்சி மாற்றம் ஏற்பட்டது. ஜனாதிபதி மாறினார். அதன்பின் ரணில் விக்கிரமசிங்க தலைமையில் புதிய அரசாங்கம். புதிய அமைச்சரவை என மாறியுள்ளது. இந்த நல்லாட்சி அரசாங்கம் என கூறும் இவர்கள் தமிழ் மக்களுக்கு என்ன நல்லாட்சியை கொடுத்தார்கள்.

சரியான அரசியல் தீர்வு, காணாமல் போன பிள்ளைகளை கண்டு பிடிப்பது, தமிழ் சிங்கள மக்களிடையே சமத்துவமான வாழ்க்கை முறை, சமத்துவமான அதிகார பகிர்வுகள் என ஏதாவது கிடைத்ததா? ஆனால் தமிழ் மக்களுக்கு தற்போது கிடைத்துக் கொண்டிருப்பது என்ன?

முன்னைய அரசாங்கத்தை விடுவோம். இந்த அரசாங்கத்தால் கிடைத்தது என்ன? முலத்திற்கு முலம் புத்தர் சிலை, சிங்கள குடியேற்றங்கள், இராணுவம் காணிகளை கைப்பற்றுவது, இவை தவிர இந்த அரசாங்கம் என்ன செய்தது.

சம்பந்தனின் மாவட்டத்தில் உள்ள சாம்பல் தீவில் நூற்றுக்கு நூறு வீதம் தமிழ் மக்கள் வாழ்கிறார்கள். அங்கு புத்தர் சிலை வைக்கப்பட்டுள்ளது.

பிள்ளையார் சிலையை தூக்கிவிட்டு புத்தர் சிலை வைத்தார்கள். பிள்ளையார் சிலையை தூக்கி எறியலாம். ஆனால் புத்தர் சிலையை வைத்தால் நீதிமன்றம் போகலாம்.

நீதிமன்றம் புத்தர் சிலையை அகற்றுவதற்கான ஆணையை கொடுக்கவில்லை. முல்லைத்தீவு, கொக்கிளாயில் ஒரு தனியாருடைய காணியில் புத்தர் சிலை வைக்கப்பட்டுக் கொண்டிருக்கின்றது.

காணிச் சொந்தக்காரர் நீதிமன்றம் சென்றார். நீதிமன்றில் தடை உத்தரவு பிறப்பிக்கப்பட்டது. ஆனால் புத்த பிக்கு சொல்கிறார் எனக்கு தடை உத்தரவு தர நீ யார்? இன்றும் அந்தப்புத்த கோயில் கட்டப்பட்டுக் கொண்டிருக்கின்றது.

நீதிமன்றத்திற்கு எதிராக புத்த கோவில் கட்டப்பட்டுக் கொண்டிருக்கின்றது. ஆனால் அரசாங்கம் பார்த்துக் கொண்டிருக்கின்றது.

ஆகவே, இந்த அரசாங்கமும் இந்தச் செயற்பாடுகளுக்கு ஒரு மறைமுகமான ஆதவைக் கொடுத்துக் கொண்டு தான் இருக்கிறார்கள்.

இதற்கு மேலதிகமாக வடக்கு மாகாணம் முழுமையாக இராணுவக் கட்டுப்பாட்டுக்குள் இருக்கக் கூடிய ஒரு மாகாணம். புத்த பிக்குகள் விரும்பினால் எதையும் செய்யலாம்.

யாழ் பல்கலைக்கழகத்தில் கற்கும் சிங்கள மாணவர் ஒருவர் சிங்களப் பத்திரிகை ஒன்றுக்கு சொன்ன விடயம் தமிழ் பத்திரிகையில் வந்தது.

தமிழ் மாணவர்கள் அனைவரும் இராணுவத்திற்கு சரியான பயம் என்று சொல்கிறார். ஆகவே பல்கலைக்கழகத்தைச் சூழ இராணுவத்தை நிறுத்த வேண்டும். அவ்வாறு இராணுவத்தை நிறுத்தினால் தமிழ் மாணவர்களால் பல்கலைக்கழகத்தில் ஒன்றும் செய்ய முடியாது.

இப்படியே போனால் பல்கலைக்கழகத்தில் ஒரு இராணுவக் குடியிருப்பையே ஏற்படுத்தச் சொல்லி அவர்கள் கேட்பார்கள்.

இவ்வாறான ஒரு நிலையில் புத்த பிக்குகள் செயற்படவும், சிங்கள மாணவர்கள் செயற்படவும், வடக்கு மாகாணம் தொடர்பில் சிங்கள மக்கள் செயற்படவும் அதற்கான அங்கீகாரத்தை கொடுத்தது யார்?

இந்த நல்லாட்சி அரசாங்கத்துடன் இணைந்து தமிழ் தேசியக் கூட்மைப்பு செயற்படுகிறது. ஆனால் செய்ய முடிந்தது என்ன, இந்த இணைந்த செயற்பாட்டின் ஊடாக அரசியல் கைதிகளை விடுதலை செய்ய முடிந்ததா?

காணாமல் போன ஒருவரைக் கூட கண்டுபிடிக்க முடிந்ததா? புத்தர் சிலை வைப்பதை தடுக்க முடிந்ததா? இது குறித்து அரசாங்கத்துடன் பேசப்பட்டதா?

பேச்சப்பட்டால் இது ஏன் நிறுத்தப்படவில்லை அல்லது அரசாங்கம் கூட்டமைப்பு கூறுவதை மறுதலிக்கிறதா?

மறுதலித்தால் அதற்கு காரணம் என்ன? கிழக்கு மாகாணம் போல் வடக்கு மாகாணமும் தமது தனித்துவத்தை இழக்கும் நிலை வந்துள்ளது.

வடக்கு மாகாணத்தில் சிங்கள பௌத்த மேலாதிக்கத்திற்கு கீழ் கொண்டு வர இலங்கை அரசாங்கம் விரும்புகின்றது. அது தான் உண்மை. இந்த அடிப்படையில் தான் வேலைகள் நடைபெறுகிறது.

இதை நாம் புரிந்து கொண்டிருக்கின்றோமா? அல்லது புரிந்தும் புரிந்து கொள்ளாமல் இருப்பது போல் இருக்கின்றோமா என்பது தான் இப்போதுள்ள கேள்வி.

தமிழ் மக்களுக்காக ஆயிரக்கணக்கான போராளிகள் உயிரைக் கொடுத்துள்ளார்கள். ஆனால் நாங்கள் அவர்கள் உயிர்கொடுத்த சிந்தனைக்கேற்ப செயற்படுகின்றோமா?

நாங்கள் இன்று கதிரைகளை காப்பாற்றி கொள்ளவும், நமது இருப்பையும் தங்க வைத்துக் கொள்வதற்கு ஏற்ப செயற்படுகின்றோமா? என்பது தெரியவில்லை.

ஏனெனில் இந்த நல்லாட்சிக் காலத்தில் எதனையும் எம்மால் செய்ய முடியாதுள்ளது. ஆகவே இது இப்படியே போய்க் கொண்டிருந்தால் நாம் எங்கே போய் சேரப்போகின்றோம்.

இது பாதுகாப்பானதா என்ற கேள்வி எழுகிறது. இதற்கேல்லாம் தலைமை தாங்கக் கூடியவர்கள், தமிழ்த் தேசியக் கூட்டமைப்பின் கட்சித்தலைவர்கள் பதில் சொல்லியாக வேண்டும்.

இந்த சிறிய விடயங்களையே செய்ய முடியாத அரசாங்கம். புதிய அரசியலமைப்பு ஊடாக வடக்கு - கிழக்கு இணைப்பு, சமஸ்டி ஆட்சி முறை, அதிகாரபரவலாக்கம் செய்ய முன்வருவார்களா? இதெல்லாம் நடக்குமா என்ற கேள்வி உள்ளது.

ஆனால் சம்மந்தன் குழப்ப வேண்டாம். எல்லாம் வரும் என கூறுகிறார். அதேவேளை சில சமயம் இது எனது கணிப்பு தான் எனவும் கூறுகிறார்.

குழப்ப வேண்டாம் என்றால் போராட வேண்டாம். அமைதியாக இருங்கள் என்றே கூறுகின்றார். ஆனால் இந்த அரசியல் சாசனத்தில் வரவேண்டியவை இருக்கிறது.

அது வருமா என்பதற்கு அப்பால் பௌத்த கோவில்கள், சிங்கள குடியேற்றம், இராணுவ வெளியேற்றம் என்பன குறித்து பேசப்படுமா, இது அரசியல் சாசனத்தில் வராது. இது நாளாந்த பிரச்சினை.

நாவற்குழி, கோணேஸ்வரம், கேதீஸ்வரம், கொக்கிளாய் என பல பகுதிகளில் புத்தர் சிலைகள் வைக்கப்பட்டுள்ளது.

ஆகவே அவை அகற்றப்படுமா? வந்திருந்தால் அகற்ற முடியாது. வருவதற்கு முன்னரே அவற்றைத் தடுக்க வேண்டும்.

இது தொடர்பில் கட்சித் தலைவர்கள் சிந்திக்க வேண்டும். இது தொடர்பில் பேச்சுவார்த்தை நடத்தப்பட வேண்டும்.

இது தள்ளிப் போடக் கூடிய விடயம் இல்லை. திருகோணமலை பறிபோயிருக்கின்றது. மட்டக்களப்பு பறிபோகிறது.

வடக்கில் முல்லைத்தீவு, வவுனியா, மன்னாரிலும் அது தான் தான் நடந்து கொண்டிருக்கிறது.

கிழக்கு மாகாணம் போல் வடக்கும் போய் கொண்டிருக்கிறது. எனவே காலத்தை இனியும் கடத்த முடியாது.

இவை வெறுமனே கேள்விகளாக இருக்க கூடாது. இதற்கான பதில்கள் கண்டு பிடிக்கப்பட வேண்டும் எனத் தெரிவித்தார்.

கூட்டு எதிர்க் கட்சியினால் ஏற்பாடு செய்யப்பட்டுள்ள “மக்கள் போராட்டம்” எனும் தொனிப் பொருளின் கீழ் மாபெரும் நடைபவனி சற்றுமுன் கண்டி கெடம்பே பிரதேசத்திலிருந்து ஆரம்பமாகியுள்ளது.

முன்னர் திட்டமிட்டபடி, கண்டி தலதா மாளிகையின் முன்னால் இந்த நடைபவனி ஆரம்பமாகவிருந்த போதிலும் அதற்கு நேற்று நீதிமன்றம் தடை விதித்து தீர்ப்பளித்திருந்தது.

இன்று கண்டியில் ஆரம்பமாகும் இந்த நடைபவனி மாவனல்லை வரையிலும் இடம்பெறவுள்ளது.

நாளை ( 29) மீண்டும் மாவனல்லையிலிருந்து நெலுந்தெனிய வரை செல்லவுள்ளது.

மூன்றாவது நாளில் (30) நெலுந்தெனியவிலிருந்து நிட்டம்புவ வரையிலும், நான்காவது நாளான 31 ஆம் திகதி நிட்டம்புவயிலிருந்து கிரிபத்கொட நகர் வரையிலும் செல்ல ஏற்பாடு செய்யப்பட்டுள்ளது.

ஐந்தாவது நாளில் (01) கிரிபத்கொட நகரிலிருந்து கொழும்பு வரை நடைபவனி செல்லவுள்ளதாக கூட்டு எதிர்க் கட்சி அறிவித்துள்ளது.

நாட்டை ஆட்சி செய்தவர்கள், தற்போது ஆட்சி செய்பவர்கள் என அனைவரும் நாட்டின் பொருளாதாரத்தை சீர்குலைத்துள்ளதாக குற்றம் சுமத்தப்பட்டுள்ளது.

இதன் காரணமாக, நாட்டு மக்களுக்கு தேவையான அனைத்தும் வெளிநாடுகளில் இருந்தே இறக்குமதி செய்யப்படுவதாக பாராளுமன்ற உறுப்பினர் அநுர குமார திஸாநாயக்க தெரிவித்துள்ளார்.

கலேவெல பிரதேசத்தில் இன்று இடம்பெற்ற நிகழ்வொன்றில் கலந்துக்கொண்டு உரையாற்றிய அவர் இதனைத் தெரிவித்துள்ளார்.

வெளிநாடுகளில் இருந்து பொருட்கள் இறக்குமதி செய்யப்படுவதனால் அதிகமான பணம் இலங்கையில் இருந்து வெளிநாடுகளுக்கு செல்கின்றது.

இன்று வீதிகளில் செல்லும் பெண்களை பார்த்தால் அவர்கள் தலைக்கு பூசும் எண்ணெய் முதல் பாதணிகள் வரை அனைத்தும் வெளிநாடுகளில் இருந்தே இறக்குமதி செய்யப்படுகின்றது.

பால்மா இறக்குமதிக்காக 34 கோடி டொலரும், சீனிக்காக 25 கோடி டொலரும், மிளகாய் இறக்குமதிக்காக 6 கோடி டொலரும், வெங்காயத்திற்கு 4 கோடி டொலருமாக நாட்டின் பணம் வெளிநாடுகளுக்கு வழங்கப்படுவதாக அவர் மேலும் தெரிவித்துள்ளார்.

மேல்மாகாணங்களில் உள்ள முச்சக்கர வண்டிகளை பதிவு செய்வதன் மூலம் 600 கோடி ரூபாயினை மோசடி செய்வதற்கு வீதி போக்குவரத்து அதிகார சபை திட்டமிட்டுள்ளதாக சுயதொழில் வேலைவாய்ப்பு தொழிற்சங்கம் தெரிவித்துள்ளது.

மேலும் முச்சக்கர வண்டிகளின் பதிவுகளுக்காக இதுவரை 100 ரூபாய் அறவிடப்பட்டு வந்ததாகவும், ஆனால் தற்போது பதிவுக்கட்டணம் 350 ரூபாயிலிருந்து 1750 ரூபாவாக அதிகரிக்கப்பட்டுள்ளதாகவும் இந்த சங்கத்தின் தலைவர் சுனில் ஜயவர்தன தெரிவித்துள்ளார்.

அத்துடன் இலவசமாக தரப்படும் என குறிப்பிடப்பட்ட மீற்றர் தற்போது 1400ரூபாவுக்கு வழங்கப்படுவதாகவும், போக்குவரத்து அதிகார சபையினால் வழங்கப்படும் சிம் அட்டையினை பதிவு செய்த முச்சக்கர வண்டிகள் பயன்படுத்துவது கட்டாயமாக்கப்பட்டுள்ளதாகவும் அவர் மேலும் குறிப்பிட்டுள்ளார்.

எனினும் குறித்த சிம் அட்டைக்காக நாளொன்றிட்கு 40 ரூபாய் படி மாதத்திற்கு 1200ரூபாவும், வருடத்திற்கு 14,400 ரூபாவையும் பெறுவதற்கு அதிகார சபைதிட்டமிட்டுள்ளதாகவும் இந்த தொழிற்சங்கத்தின் தலைவர் சுட்டிக்காட்டியுள்ளார்.

மேலும் முச்சக்கர வண்டிகளின் பின்புறம் ஒட்டப்படும் ஸ்டிக்கர்களுக்காக 250ரூபாய் படி 600 கோடிகளை மோசடி செய்வதற்கு வீதிப் பயணிகள் போக்குவரத்து அதிகாரசபை திட்டமிட்டுள்ளதாகவும், இதற்கு எதிராக போக்குவரத்து அமைச்சிடம் மனுஒன்று வழங்கியுள்ளதாகவும் சுயதொழில் வேலைவாய்ப்பு தொழிற்சங்கம் குறிப்பிட்டுள்ளது.

கடந்த ஆட்சியின் போது முன்னாள் ஜனாதிபதி மஹிந்த ராஜபக்ஷவின் புதல்வர்களால் பயன்படுத்தப்பட்ட மிகவும் ஆடம்பர கார்கள் குறித்து சர்ச்சைக்குரிய தகவல்கள் வெளியாகி இருந்தன.

பல கோடி ரூபா பெறுமதியான ஆடம்பர கார்களை மஹிந்த குடும்பத்தினர் தம்வசம் வைத்திருந்ததாக குற்றம் சாட்டப்பட்டது. எனினும் அந்த கார்கள் இன்னும் கண்டுபிடிக்கப்படவில்லை.

இந்த நிலையில், பிலியந்தலை மக்குலுதுவ மாவத்தை என்ற பிரதேசத்தில் வீடொன்றில் மறைத்து வைத்திருந்த நிஸான் GTR 3800 மோட்டர் வாகனம் மீட்கப்பட்டிருந்தன.

கடந்த ராஜபக்ச அரசாங்கத்தின் போது இராணுவத்திற்கு வாகனம் வழங்கும் நபர் ஒருவரினால் கொண்டு வந்து மறைக்கப்பட்டதாக ஆரம்ப கட்ட விசாரணைகளில் தெரியவந்தது.

இந்த மோட்டார் வாகனம் பதிவு செய்யப்படவில்லை எனவும் போலி வாகன இலக்கத் தகடுகளை பயன்படுத்தி மோட்டார் வாகன போட்டிக்காக பயன்படுத்தப்பட்டுள்ளதாகவும், ஒவ்வொரு சந்தர்ப்பங்களில் ஒவ்வொரு நிறங்களை மாற்றியதாக விசாரணைகளில் தகவல் வெளியாகியது.

இந்த மோட்டார் வாகனம் தொடர்பில், வாகனத்தை மறைத்து வைத்த வீட்டின் உரிமையாளர் துப்பு வழங்கியதாக அப்போதைய பொலிஸ் ஊடக பேச்சாளர் அஜித் ரோஹன தெரிவித்துள்ளார்.

எனினும் இது தொடர்பில் இடம்பெற்ற சட்ட ரீதியான நடவடிக்கை தொடர்பில் தற்போது வரை எந்த ஒரு தகவலும் வெளியாகவில்லை.

அண்மையில் நாடாளுமன்ற உறுப்பினர் நாமல் ராஜபக்ச கைது செய்யப்படுவதற்கு முன்னர் வெளியிட்ட கருத்தே தற்போது இந்த விடயம் மீண்டும் வெளியில் வருவதற்கு காரணமாக அமைந்துள்ளது.

“எங்களுக்கு எதிராக பல்வேறு குற்றச்சாட்டுகளை பல்வேறு தரப்பில் இருந்து சுமத்தப்பட்டிருந்தது. எங்களின் ரேசிங் கார்கள் குறித்து பேசினார்கள். எங்கள் ஹோட்டல் குறித்து பேசினார்கள், வெளிநாட்டு பணம் குறித்து பேசினார்கள். எனினும் இதுவரை ஒன்றுக்கும் உண்மைகளை நிரூபிக்கவில்லை. போலி குற்றச்சாட்டில் என்னை சிறைக்கு அனுப்ப முயற்சிப்பதாக” நாமல் குறிப்பிட்டிருந்தார்.

பிலியந்தலையில் கைப்பற்றப்பட்ட மோட்டர் வாகனம் முன்னாள் ஜனாதிபதி மஹிந்த ராஜபக்சவின் மகன் யோஷித ராஜபக்சவினால் மோட்டார் பந்தயங்களில் பயன்படுத்தப்பட்டுள்ளதை நிரூபிக்கும் வகையிலான புகைப்படங்கள் அப்போதைய காலப்பகுதியில் சமூக வலைத்தளங்களில் வெளியாகியிருந்தன.

யோஷித ராஜபக்ச குறித்த மோட்டார் வாகனத்தில் மோட்டார் பந்தயத்தில் கலந்துகொள்வதற்கு ஆயத்தமாகுவதாக அவரது முகப்புத்தகத்தில் புகைப்படங்கள் வெளியிட்டிருந்தமை குறிப்பிடத்தக்கது.

சேருநுவர பகுதியில், கைகலப்புச் சம்பவத்துடன் குற்றஞ்சாட்டப்பட்டு விளக்கமறியலில் வைக்கப்பட்டிருந்த கிராமசேவையாளரை, ஒரு இலட்சம் ரூபாய் சரீரப்பிணையில் செல்ல மூதூர் நீதவான் நீதிமன்ற நீதிபதி ஐ.என்.றிஸ்வான், நேற்று உத்தரவிட்டார்.

அத்துடன், ஆகஸ்ட் மாதம் முதலாம் திகதி குறித்த கிராமசேவையாளரை மீண்டும் நீதிமன்றத்தில் ஆஜராகுமாறும் நீதவான் உத்தரவிட்டார்.

காணித் தகராறு காரணமாக இரண்டு சிறுபான்மைக் குழுக்களுக்கிடையில் கடந்த சனிக்கிழமை (16) இடம்பெற்ற கைகலப்புச் சம்பவத்தில், இருதரப்பிலும் அறுவர் காயங்களுக்குள்ளான நிலையில் மூதூர் சேருநுவர வைத்தியசாலைகளில் அனுமதிக்கப்பட்டிருந்தனர்.

இந்த நிலையில் சம்பவம் குறித்து சேருநுவர பொலிஸார் மேற்கொண்ட விசாரணையின் அடிப்படையில், இந்த கைகலப்பு சம்பவம் இடம்பெறுவதற்கு உப்பூறல் கிராம சேவையாளரே காரணமாக இருந்ததாக சிறுபாண்மை குழுவொன்று, சேருநுவர பொலிஸில் முறைப்பாட்டை பதிவு செய்திருந்தனர்.

இதன் அடிப்படையில், குறித்த கிராமசேவையாளரை, கடந்த வெள்ளிக்கிழமை (22) மூதூர் நீதிமன்றத்தில் ஆஜராகுமாறு சேருநுவர பொலிஸார் கேட்டுக் கொண்டதற்கமைய, அவர் மூதூர் நீதிமன்றத்தில் ஆஜராகிய போது, அவரை எதிர்வரும் 26ஆம் திகதி வரை விளக்கமறியலில் வைக்குமாறு உத்தரவு பிறப்பிக்கப்பிக்கப்படமை குறிப்பிடத்தக்கது.

நண்பர்கள் கேலி செய்தமையால் மனைமுடைந்த பாடசாலை மாணவி ஒருவர் தூக்கிட்டு தற்கொலை செய்துகொண்டுள்ளார்.

குறித்த மாணவி தூக்கிட்டு பத்து நாட்கள் கடந்த நிலையில், இவர் நேற்று வைத்தியசாலையில் உயிரிழந்துள்ளதாக தெரிவிக்கப்படுகின்றது.

இந்த சம்பவம் சிலாபத்தில் இடம்பெற்றுள்ளது. தற்கொலை செய்துகொண்டுள்ள மாணவியின் தந்தை சிறுவர் துஷ்பிரயோக குற்றச்சாட்டில் கைது செய்யப்பட்டு, சிறையில் தடுத்து வைக்கப்பட்டுள்ளார்.

சிலாபம் பிரதேச பாடசாலை ஒன்றில் கல்வி கற்றுவரும் குறித்த மாணவி படிப்பிலும் சிறந்து விளங்கியுள்ளார்.

எனினும், தந்தையின் செயலை சுட்டிக்காட்டி பாடசாலை நண்பர் நண்பிகள் அடிக்கடி இம்மாணவியை கேலி செய்துள்ளததாக தெரிவிக்கப்படுகின்றது.

இதன் காரணமாக மனமுடைந்த குறித்த மாணவி தூக்கிட்டு தற்கொலை செய்துகொண்டுள்ளதாக பொலிஸார் தெரிவித்துள்ளனர்.

கடந்த 15ஆம் திகதி பாடசாலையிலிருந்து வீடு திரும்பிய குறித்த மாணவி "இனிமேல் பாடசாலை செல்ல போவதில்லை எனவும் நண்பர்கள் தன்னை கேலி செய்வதாகவும்" தனது தாயிடம் முறையிட்டுள்ளார்.

இதன் பின்னர் வீட்டில் தனது அறையில் தூக்கிட்டு தற்கொலைக்கு முயற்சித்த நிலையில் மீட்கப்பட்ட மாணவி வைத்தியசாலையில் அதிதீவிர சிகிச்சை பிரிவில் அனுமதிக்கப்பட்டார்.

எனினும், சிகிச்சை பலனின்றி குறித்த மாணவி நேற்று உயிரிழந்துள்ளதாக தெரிவித்துள்ள பொலிஸார் மேலதிக விசாரணைகளை முன்னெடுத்துள்ளனர்.a

கூட்டு எதிர்க்கட்சியினால் ஏற்பாடு செய்யப்பட்டுள்ள பாத யாத்திரையில் பங்கேற்கப் போவதில்லை என எதிர்க்கட்சித் தலைவர் இரா.சம்பந்தன் தெரிவித்துள்ளார்.

குறித்த விடயம் தொடர்பில் ஊடகம் ஒன்று எழுப்பிய கேள்விக்கு பதிலளித்த போதே அவர் இதனைத் தெரிவித்துள்ளார்.

கூட்டு எதிர்க்கட்சியின் ஒழுங்கமைப்பில் முன்னெடுக்கப்பட உள்ள பாத யாத்திரைக்கு எனது ஒத்துழைப்பு கிடையாது.

கூட்டு எதிர்க்கட்சியின் பாத யாத்திரையில் பங்கேற்குமாறு எமக்கு அழைப்பு விடுக்கப்படவில்லை. அவ்வாறு அழைப்பு விடுக்கப்பட்டாலும் நாம் அதில் பங்கேற்கப் போவதில்லை.

பாத யாத்திரை நல்ல விடயமா தீமையான விடயமா என்பதனை என்னால் கூற முடியாது.

எனினும் நாம் பாத யாத்திரையில் பங்கேற்கப் போவதில்லை என இரா.சம்பந்தன் மேலும் தெரிவித்துள்ளார்.

பக்கம் 7 / 23
Top
We use cookies to improve our website. By continuing to use this website, you are giving consent to cookies being used. More details…