JoomlaLock.com All4Share.net

Background Video

இன்று உலகம் ஒரு கிராமமாகச் சுருங்கிவிட்டது. இணையம் வாயிலான கருத்துப் பரிமாற்றங்களால் விநாடிக்குள் உலகின் எந்தப் பகுதியையும் தொடர்பு கொள்ள முடிகிறது. அதிவேகமான உலகம், திறமையுள்ள மனிதர்களால் நிரம்பியிருக்கிறது.

இத்தகைய போட்டி மிகுந்த உலகில் இன்றைய இளைஞர்கள் வெல்ல வேண்டுமானால், வழக்கமான தொழில் சார்ந்த படிப்புகள் மட்டுமல்லாது, சில பிரத்யேகத் திறன்களையும் பெற்றிருப்பது அவசியமாகிறது.

தகவல் தொடர்புத் திறன் (இர்ம்ன்ய்ண்ஸ்ரீஹற்ண்ர்ய் நந்ண்ப்ப்ள்) மிகுந்தவர்கள் எந்தத் துறையிலும் கோலோச்ச முடியும் என்ற நிலை உருவாகியுள்ளது. இதற்கு அடிப்படையாக பிறமொழி அறிவு உள்ளது. எனவே தாய்மொழி, உலகப் பொதுமொழியான ஆங்கிலம் தவிர்த்து பிற உலக மொழிகள் சிலவற்றையும் தெரிந்து வைத்திருப்பது அவசியமாகியுள்ளது.

முதலாவதாக மாணவர்கள் ஒவ்வொருவரும் தனது தாய்மொழியில் பிழையின்றிப் பேசவும், எழுதவும் தெரிந்திருப்பது இன்றியமையாததாகும். சொந்த மொழியை அலட்சியம் செய்பவர்களால் பிற மொழிகளில் சாதனை படைத்துவிட முடியாது.

பிற மொழிகளில் நீங்கள் திறன் படைத்திருந்தாலும் உங்கள் வேர்கள் நிலைகொண்டுள்ள தாய்மொழியையும் அதிலுள்ள இலக்கியங்களையும் பற்றிய புரிதலும் பெருமிதமும் இருப்பது அவசியம். அது நீங்கள் பிற மொழிகளில் நடத்தும் கருத்துப் பரிமாற்றங்களில் வெளிப்படும்போது உங்களுக்கு தனி மரியாதை கிட்டும்.

தாய்மொழியைத் தொடர்ந்து, தேசிய மொழியாக உள்ள ஹிந்தியிலும் மாணவர்கள் திறன் படைத்திருப்பது நல்லது. படித்து முடித்தவுடன் வேலைவாய்ப்புக்காக நாடு முழுவதும் செல்லும்போது, அங்குள்ள மக்களுடன் விரைவாகப் பழகவும், உரையாடவும் ஹிந்தி மொழி அறிவு அத்தியாவசியம்.

நாடு முழுவதிலும் ஒவ்வொரு மாநிலத்திலும் ஒவ்வொரு மொழி புழங்கினாலும், ஹிந்தியும் ஆங்கிலமும் தெரிந்திருந்தால் நீங்கள் எங்கு சென்றாலும் சரளமாக உரையாடவும் எளிதாக மக்களுடன் தொடர்பு கொள்ளவும் முடியும்.

அடுத்ததாக, உலகப் பொதுமொழியாகக் கருதப்படும் ஆங்கிலத்திலும் படித்தல், எழுதுதல், பேசுதல் ஆகிய மூன்று திறன்களையும் மாணவர்கள் பெற்றிருப்பது முக்கியம்.

பிழையின்றி சரளமாக எழுதுதல், சரியான உச்சரிப்பு, இயல்பாக திணறலின்றி உரையாடும் திறன் ஆகியவையே மொழி ஆளுமையாகக் கருதப்படுகின்றன. ஆங்கில நூல் வாசிப்பு உங்கள் ஆங்கில ஆளுமையை மேம்படுத்தும்.

தாய்மொழி, ஹிந்தி, ஆங்கிலம் ஆகிய மும்மொழிகளுடன், வேறு ஏதாவது ஒரு உலக மொழியிலும் மாணவர்கள் பாண்டித்தியம் பெறுவது சிறப்பான தகுதியாகக் கருதப்படுகிறது.

வெளிநாட்டு மொழிகளைக் கற்றுக் கொண்டால் அந்த மொழி பேசும் நாட்டிற்குச்  சென்றுதான் பணிபுரிய வேண்டும் என்றில்லை. இந்தியா தற்போது உலக நாடுகள் அனைத்தும் வந்துசெல்லும் நாடாக மாறிவிட்டது. எனவே உள்நாட்டிலுள்ள பிறநாட்டு நிறுவனங்களின கிளைகளிலேயே நல்ல வேலைவாய்ப்பும் கிடைக்கும்.

உலகமயமாக்கலும் தாராளமயமாக்கலும் பரவலான பிறகு, எந்த நாடும் பிற நாடுகளில் தொழில் துவங்குவது எளிதாகியுள்ளது. ஸ்வராஜ் பால், மிட்டல் போன்ற இந்தியத் தொழிலதிபர்களே பல வெளிநாடுகளில் பெருந்தொழில்களை நடத்தும் காலம் இது. அத்தகைய நிறுவனங்களுக்கு பல மொழிகளில் ஆளுமை வாய்ந்த நிபுணர்கள் தேவைப் படுகிறார்கள்.

குறிப்பாக, சீனம், ஜெர்மன், பிரெஞ்ச், ரஷியன், லத்தீன், ஜப்பானிஸ், கொரியன், அரபு மொழிகளைக் கற்றவர்களுக்கு பிற நாடுகளிலும் நம் நாட்டிலும் பல வாய்ப்புகள் காத்திருக்கின்றன.

இந்த மொழிகளைப் படிப்பவர்களுக்கு, மொழிபெயர்ப்பாளர், விளக்க உரையாளர், மொழி ஆசிரியர், மொழியியல் வல்லுநர், தகவல் தொடர்பாளர் உள்ளிட்ட பணி வாய்ப்புகள் உள்ளன. 

வெளிநாட்டு மொழிகளில் பட்டப் படிப்பு படித்தவர்களுக்கு, சுற்றுலாத் துறை, பொழுதுபோக்கு துறை, மக்கள் தொடர்புத் துறை, தூதரகங்கள், பதிப்புத் துறை போன்றவற்றில் பலவிதமான பணி வாய்ப்புகள் காத்திருக்கின்றன.

உலகமொழிகளை படிப்புகளாக வழங்கும் சில கல்வி நிறுவனங்கள் இங்கு கொடுக்கப்பட்டுள்ளன. இவை சில உதாரணங்கள் மட்டுமே. ஆர்வமுள்ள மாணவர்களுக்கு பிறமொழிகளைக் கற்பதற்கான வாய்ப்புகள் தேடிவரும்.

சீனம்

தில்லி பல்கலைக்கழகம்: எம்.ஃபில்.

கொல்கத்தா பல்கலைக்கழகம்: டிப்ளமோ

சைனிஸ் லேங்குவேஜ் இன்ஸ்டிட்யூட்: டிப்ளமோ

பிரெஞ்ச்

தில்லி பல்கலைக்கழகம்: பி.ஏ.

மதுரை காமராசர் பல்கலைக்கழகம்: சான்றிதழ்

அலையான்ஸ் பிரான்சிஸ்: டிப்ளமோ, சான்றிதழ்

பெரியார் பல்லைக்கழகம்: சான்றிதழ்

ஜெர்மன்

கொல்கத்தா பல்கலைக்கழகம்: டிப்ளமோ

தில்லி பல்கலைக்கழகம்: சான்றிதழ்

லத்தீன்

இத்தாலியன் கல்சுரல் இன்ஸ்டிட்யூட்: டிப்ளமோ, சான்றிதழ்

சென்னை பல்கலைக்கழகம்: சான்றிதழ்

தில்லி பல்கலைக்கழகம்: டிப்ளமோ, எம்.ஏ, எம்.ஃபில், பி.எச்டி.

ஜப்பானிஸ்

தில்லி பல்கலைக்கழகம்: டிப்ளமோ, எம்.ஃபில்

அமெரிக்கன் கல்லூரி, மதுரை: சான்றிதழ்

சாஸ்த்ரா பல்கலைக்கழகம், தஞ்சாவூர்: சான்றிதழ்

இந்திரா காந்தி தேசிய திறந்தநிலை பல்கலைக்கழகம், தில்லி: சான்றிதழ்

ஸ்பானிஷ்

சென்னை பல்கலைக்கழகம்: டிப்ளமோ, சான்றிதழ்

தில்லி பல்கலைக்கழகம்: டிப்ளமோ

அரபு மொழி

சென்னை பல்கலைக்கழகம்: எம்.ஏ, எம்.ஃபில், சான்றிதழ், டிப்ளமோ.

தில்லி பல்கலைக்கழகம்: பி.ஏ.

கோழிக்கோடு (காலிகட்) பல்கலைக்கழகம்: பி.ஏ.

 எந்த மொழியைக் கற்றாலும், மொழி அறிவுக்காகவும் வேலைவாய்ப்புக்காகவும்  மட்டும் கற்காமல், அந்த மொழியிலுள்ள இலக்கிய வளத்தைச் சுவைக்கும் தன்மை கொண்டவர்களாகவும் மாணவர்கள் இருந்தால் அவர்களது அறிவு மேம்படும்.

 தமிழகம் வரும் வெளிநாட்டவர் ஒருவர் திருக்குறளில் தனது ஆர்வத்தையும் திறனையும் தமிழில் வெளிப்படுத்தினால் தமிழக மக்கள் இயல்பாகவே அவரால் கவரப்படுவர். அதேபோலத் தான், ஷேக்ஸ்பியரை நன்கு அறிந்த இந்தியரால் பிரிட்டனில் வெகு எளிதாக செயலாற்ற முடியும். தவிர, பிற நாட்டு இலக்கிய அறிவு நமது அறிவை விசாலமாக்குவதுடன், நம்மைப் பண்படுத்துவதாகவும் அமைகிறது.

செவ்வாய்க்கிழமை, 24 மே 2016 00:00

300 மொழிகள் பேசப்படும் லண்டன்

'உலக பாராளுமன்றங்களின் தாய்' என்று இங்கிலாந்து பாராளுமன்றம் சிறப்பித்து அழைக்கப்படுகிறது.

உலகின் புகழ் பெற்ற நகரங்களில் லண்டனுக்கு தனிச்சிறப்பு உண்டு. அருங்காட்சியகங்கள், நினைவாலயங்கள், பூங்காக்கள், கட்டிடங்கள் என சுற்றுலாப் பயணிகளைக் கவர்ந்திழுக்கும், அற்புதங்கள் நிறைந்த லண்டன் நகரத்தை பற்றி பார்ப்போம்..!

பாரம்பரியமான நகரம்

இரண்டாயிரம் ஆண்டு பழமை வாய்ந்த லண்டன் நகரம் கி.பி. 43-ல் ரோமானியர்களால் கட்டப்பட்டது. ஆங்கிலேய பேரரசின் தலைநகரமான லண்டனில் கலை, இலக்கியம், பொருளாதாரம் மற்றும் பாரம்பரியத்தின் அடையாளங்கள் ஏராளமாக இருக்கின்றன. இரண்டாயிரம் ஆண்டுகால பழமையை பாதுகாத்து வரும் லண்டன் நகரத்தில், அதிகபட்சமாக 300 மொழிகள் பேசும் மக்கள் வசிக்கின்றனர்.

பாராளுமன்ற இல்லம்

ஐக்கிய அரசின் முக்கியமான அலுவலகங்கள் லண்டன் வெஸ்ட் மினிஸ்டர் பகுதியில் உள்ள பாராளுமன்றத்தை சுற்றிலும் உள்ளன. இது 'உலகப் பாராளுமன்றங்களின் தாய்' என அழைக்கப்படுகிறது. வெஸ்ட் மினிஸ்டர் மாளிகை என்றழைக்கப்படும் லண்டன் பாராளுமன்றத்தில் பிரபுக்கள் சபை, மக்கள் பிரதிநிதிகள் சபை என்ற இரண்டு சபைகள் உள்ளன. இத்துடன் மணிக்கூண்டு கோபுரம், விக்டோரியா கோபுரம் ஆகியவையும் இங்குள்ளன. 1834-ம் ஆண்டு லண்டனில் ஏற்பட்ட தீ விபத்தில் சேதமடைந்த இந்தக் கட்டிடம் 30 ஆண்டுகளுக்குப் பிறகு மீண்டும் பழமையான கட்டமைப்புடன் புதிய பொலிவுடன் கட்டப்பட்டது.

பிக்பென் கடிகாரம்

லண்டன் நகரின் அடையாளங்களில் ஒன்றாக புகழ்பெற்ற 'பிக்பென்' கடிகாரம் விளங்குகிறது. ஸ்டீபன் கோபுரம் என்று அழைக்கப்பட்ட இது, இதில் நிறுவப்பட்ட மிகப்பெரிய மணியின் அடையாளமாக பிக்பென் என்ற பெயர் பெற்றது. பிரிட்டிஷ் பாராளுமன்றம் இரவில் நடைபெற்றால், அதனை குறிக்கும் விதமாக இந்தக் கோபுரத்தின் உச்சி விளக்கு எரிய விடப்படுகிறது.

லண்டன் கோபுரம்

பகைவர்களிடமிருந்து நகரை பாதுகாப்பதற்காக 1070-ம் ஆண்டு இந்த லண்டன் கோபுரத்தை கட்டமைத்தனர். இதில் வெள்ளைக் கற்களால் கட்டப்பட்ட வெள்ளைக் கோபுரம் உட்பட, இருபது கோபுரங்கள் உள்ளன. இங்கு மன்னர்கள் பயன்படுத்திய ஆடை, ஆபரணங்கள், அரசர்கள் பயன்படுத்திய ஆயுதங்கள், போர்களில் கைப்பற்றிய அன்னிய நாட்டு ஆயுதங்கள் காட்சிக்கு வைக்கப்பட்டுள்ளன.

பக்கிங்ஹாம் அரண்மனை

லண்டன் சுற்றுலா வாசிகளை கவர்ந்திழுக்கும் இடங்களில் 'பக்கிங்ஹாம் அரண்மனை'யும் ஒன்று. இங்கிலாந்து அரச குடும்பத்திற்கு சொந்தமான அரண்மனைகளில் ஒன்றான இதன் ஒரு பகுதியில் பிரிட்டிஷ் அரச குடும்பத்தினர் வசித்து வருகின்றனர்.

லண்டன் விழிகள்

பழமைகள் நிறைந்த லண்டன் நகரில் புதுமைக்கு எடுத்துக்காட்டாக திகழ்வது பிரமாண்ட ராட்டினம். லண்டன் நகரின் அழகை வானில் இருந்து பார்க்க வழிவகை செய்யும் இதனை 'லண்டன் ஐ' என்று அழைக்கிறார்கள். 1,700 டன் இரும்பினால் உருவாக்கப்பட்டுள்ள இந்த பிரமாண்ட ராட்டினத்தை ஓராண்டாக கட்டி முடித்துள்ளனர். இந்த ராட்டினத்தில் சுற்றும்போது லண்டன் நகரை முழுமையாக பார்க்கலாம்.

பசும்புல் நகரம்

விண்ணை தொடுமளவுக்கு மிக உயரமான கட்டிடங்களுக்கு மத்தியில் லண்டன் நகரில் 'பச்சை நகரம்' என்று அழைக்கப்படும்

பூங்காக்களும் அமைந்துள்ளன. அவற்றுள் ஹைட் பூங்கா, கென்சிங்டன் பூங்கா, பச்சைப் பூங்கா, ஜேம்ஸ் பூங்கா போன்றவைமிகச் சிறப்பானவை. ஹைட் பூங்கா ஓடுபவர்கள், நடப்பவர்கள், நீந்துபவர்கள் மற்றும் குதிரைச் சவாரி செய்பவர்கள் ஆகியோருக்கு மிகவும் விருப்பமானது. 360 ஏக்கர் பரப்பளவில் அமைந்துள்ள இந்த பூங்காவை சுற்றிலும் ஏராளமான பூங்காக்கள் அமைந்துள்ளன.

கோபுர பாலம்

லண்டனில் அமைந்துள்ள கோபுர பாலம் நூறு ஆண்டுகளுக்கு முன்பு கட்டப்பட்டது. இதுவும் லண்டன் நகரின் முக்கிய அடையாளங்களில் ஒன்றாக கருதப்படுகிறது. பிரமாண்டமான இரண்டு கோபுரங்களை இணைக்கும் விதமாக அமைக்கப்பட்டிருப்பதால் இதனை 'கோபுர பாலம்' என்று அழைக்கிறார்கள். 200 அடி நீளமுள்ள இந்த பாலம் பெரிய கப்பல்கள் கடக்க வேண்டிய தருணத்தில் பிரிந்து இணையும் வகையில் கட்டப்பட்டுள்ளது.

நினைவுச் சிலை

இங்கிலாந்து அரசு 1876-ம் ஆண்டு விக்டோரியா ராணியின் கணவர் ஆல்பர்ட் நினைவாக 175 அடி உயரம் உள்ள கட்டிடத்தில் 14 அடி உயர ஆல்பர்ட் சிலையை அமைத்துள்ளது.

'டிராபல்கர்' சதுக்கம்

லண்டனின் மையப்பகுதியில் உள்ள மிகப்பெரிய சதுக்கம் இது. இதன் மையத்தில் நெல்சன் தூண் அமைக்கப்பட்டுள்ளது. டிராபல்கர் போரில் பிரெஞ்சுப் படையை வீழ்த்திய தளபதி நெல்சனின் நினைவாக இந்த தூணை அமைத்திருக்கிறார்கள். 178 அடி உயரத்துடன் அமைக்கப்பட்டிருக்கும் இத்தூணின் உச்சியில் 18 அடி உயரமுள்ள நெல்சன் சிலை இடம்பிடித்துள்ளது. தூணின் பீடத்தை நான்கு சிங்கங்கள் தாங்கி நிற்கின்றன. இந்த சதுக்கத்தின் அருகில் தேசிய ஓவிய அரங்கு ஒன்றும் உள்ளது. இதில் லியோனார்டோ டாவின்சி போன்ற புகழ்பெற்ற ஓவியர்கள் வரைந்த 2,000-க்கும் மேற்பட்ட ஓவியங்கள் காட்சிக்கு வைக்கப்பட்டுள்ளன.

Published in உலகம்
Top
We use cookies to improve our website. By continuing to use this website, you are giving consent to cookies being used. More details…