JoomlaLock.com All4Share.net

Background Video

Super User

Super User

Email: இம்மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.

இந்திய கம்யூனிஸ்டு கட்சியின் பொதுச்செயலாளராக இருந்த சுதாகர் ரெட்டி, உடல் நலக்குறைவு காரணமாக தனது பதவியை ராஜினாமா செய்தார். எனவே புதிய பொதுச்செயலாளரை தேர்வு செய்வதற்காக கட்சியின் தேசிய கவுன்சில் நேற்று முன்தினம் கூடியது.

இதில் மாநிலங்களவை எம்.பி.யான டி.ராஜாவை (வயது 70) புதிய பொதுச்செயலாளராக நியமிப்பது என முடிவு செய்யப்பட்டது. முன்னதாக அவரது பெயரை இந்திய கம்யூனிஸ்டு கட்சியின் தேசிய செயற்குழுவும் ஒருமனதாக பரிந்துரை செய்திருந்தது.

இதன் மூலம் பிரதான கம்யூனிஸ்டு கட்சிகளில் ஒன்றான இந்திய கம்யூனிஸ்டின் பொதுச்செயலாளர் பதவியை டி.ராஜா ஏற்க உள்ளார். தமிழகத்தின் வேலூர் மாவட்டத்தை சேர்ந்த டி.ராஜா தமிழகத்தில் இருந்து மாநிலங்களவைக்கு தேர்வு செய்யப்பட்டு இருந்தார்.

நாடாளுமன்ற தேர்தலில் படுதோல்வியை தழுவியதன் மூலம் இந்திய கம்யூனிஸ்டு கட்சி மோசமான நிலையில் இருக்கும் இந்த வேளையில் அதன் பொதுச்செயலாளராக பதவியேற்க இருக்கும் டி.ராஜாவுக்கு மிகப்பெரும் சவால் காத்திருப்பதாக கட்சி வட்டாரங்கள் தெரிவித்தன.

காங்., மூத்த தலைவரும், மூன்று முறை டில்லி முதல்வராக பதவி வகித்தவருமான, ஷீலா தீட்ஷித், 81, மாரடைப்பு காரணமாக, டில்லியில் இன்று(ஜூலை 20) காலமானார். அவரது இறுதிச் சடங்குகள், டில்லியில் நாளை மாலை நடக்கின்றன.

காங்கிரஸ் மூத்த தலைவர்களில் ஒருவர், ஷீலா தீட்ஷித். காங்கிரஸ் மேலிட தலைவரான, சோனியாவின் குடும்பத்துக்கு மிகவும் நெருக்கமானவர். அவர்களது குடும்ப நண்பராகவும் விளங்கியவர். எம்.பி., - எம்.எல்.ஏ.,வாகவும் பதவி வகித்தவர். ராஜிவ் பிரதமராக இருந்தபோது, பார்லிமென்ட் விவகார துறை இணை அமைச்சராக பதவி வகித்தார். தலைநகர் டில்லியில், காங்கிரசின் செல்வாக்கை வளர்த்தவர். 1998 லிருந்து, 2013 வரை, டில்லி முதல்வராக பதவி வகித்து, டில்லி முதல்வராக நீண்ட நாள் பதவி வகித்தவர் என்ற, சாதனையை படைத்தார்.

கேரள மாநில கவர்னராகவும் பதவி வகித்த இவர், உ.பி., யில், கடந்த முறை நடந்த சட்டசபை தேர்தலின் போது, காங்கிரசின் முதல்வர் வேட்பாளராகவும் அறிவிக்கப்பட்டார்.

சமீபத்தில் நடந்த லோக்சபா தேர்தலில், டில்லி வட கிழக்கு தொகுதியில் போட்டியிட்டு, தோல்வி அடைந்தார். அப்போது, இவருக்காக, காங்., பொதுச் செயலர் பிரியங்கா மற்றும் அவரது மகன், மகள் ஆகியோர் பிரசாரம் செய்தனர்.சமீபகாலமாகவே, இருதய கோளாறு உள்ளிட்ட சில நோய்களால், ஷீலா தீட்ஷித், அவதிப்பட்டு வந்தார். 

இந்நிலையில், இன்று(ஜூலை 20) அதிகாலை, அவருக்கு மாரடைப்பு ஏற்பட்டது. இதையடுத்து, டில்லி, போர்டிஸ் எஸ்கார்ட்ஸ் மருத்துவமனையில் அனுமதிக்கப்பட்டார். அங்கு, அவருக்கு தீவிர அளிக்கப்பட்டதை தொடர்ந்து, உடல்நிலையில், ஓரளவு முன்னேற்றம் ஏற்பட்டது. மாலை, மீண்டும் மாரடைப்பு ஏற்பட்டதை அடுத்து, சிகிச்சை பலனின்றி, அவர் காலமானார். அவரது இறுதிச் சடங்குகள், டில்லியில் நாளை மாலை நடக்கின்றன. மறைந்த ஷீலா தீட்ஷித்துக்கு, சந்தீப் என்ற மகனும், லடிகா என்ற மகளும் உள்ளனர். 

ஷீலா தீட்ஷித் மறைவுக்கு, ஜனாதிபதி ராம்நாத் கோவிந்த், துணை ஜனாதிபதி வெங்கையா நாயுடு, பிரதமர் நரேந்திர மோடி, காங்., மூத்த தலைவர் சோனியா, டில்லி முதல்வரும், ஆம் ஆத்மி தலைவருமான, அரவிந்த் கெஜ்ரிவால், காங்., பொதுச் செயலர் பிரியங்கா மற்றும் அரசியல் கட்சி தலைவர்கள் இரங்கல் தெரிவித்துள்ளனர்.

மேற்கிந்திய தீவுகளுக்கு எதிரான தொடரில் இருந்து விலகுவதாக முன்னாள் கேப்டன் மகேந்திர சிங் தோனி அறிவித்துள்ளார்.

ஆகஸ்ட் மாதம் இந்திய, மே.இ.தீவுகள் இடையே அமெரிக்கா மற்றும் மே.இ.தீவுகளில் தலா 3 ஒருநாள், 3 டி20 ஆட்டங்கள் நடக்கின்றன.

மேலும் உலக டெஸ்ட் சாம்பியன் போட்டியின் ஒரு பகுதியாக 2 டெஸ்ட் ஆட்டங்கள் கொண்ட தொடர் ஆக. 22-இல் தொடங்குகிறது. இதற்கான இந்திய அணி ஞாயிற்றுக்கிழமை தேர்வு செய்யப்பட உள்ளது.

இந்நிலையில், ராணுவ நடவடிக்கைகளில் அடுத்த 2 மாதங்களுக்கு ஈடுபட விரும்புவதால் மேற்கிந்திய தீவுகளுக்கு எதிரான தொடரில் இருந்து விலகுவதாக மகேந்திர சிங் தோனி சனிக்கிழமை அறிவித்துள்ளார்.

இதுதொடர்பாக பிசிசிஐ தரப்பில் கூறுகையில், இங்கு 3 விஷயங்களை தெளிவுபடுத்த விரும்புகிறோம். முதலாவது தோனி ஓய்வுபெறவில்லை, ராணுவ நடவடிக்கைகள் தொடர்பாக 2 மாதகாலம் விடுப்பு எடுத்துள்ளார் மற்றும் தோனி தொடர்பாக அடுத்தகட்ட முடிவு எடுக்கும் அதிகாரம் கேப்டன் விராட் கோலி மற்றும் தேர்வுக்குழுத் தலைவர் எம்.எஸ்.கே.பிரசாத் ஆகியோரிடம் ஒப்படைக்கப்பட்டுள்ளது என்று தெரிவிக்கப்பட்டது.

எனவே, ஒருநாள் மற்றும் டி20 அணிகளுக்கு ரிஷப் பண்ட் விக்கெட் கீப்பராக தேர்வு செய்யப்படுவது கிட்டத்தட்ட உறுதியாகியுள்ளது. மேலும் டெஸ்ட் போட்டிகளில் ரித்திமான் சாஹாவுக்கு மற்றொரு வாய்ப்பு வழங்கப்படலாம் என்று தகவல்கள் வெளியாகியுள்ளன.

 

தமிழ்த்திரை உலகில் 25 ஆண்டுகளாக முத்திரை பதித்த தியாகராஜ பாகவதருக்கு திருச்சியில் ரூ.50 லட்சம் செலவில் மணிமண்டபம் அமைக்கப்படும் என்று முதல்-அமைச்சர் எடப்பாடி பழனிசாமி அறிவித்துள்ளார்.  சட்டசபையில் 110-வது விதியின் கீழ் முதல்-அமைச்சர் எடப்பாடி பழனிசாமி ஒரு அறிக்கை வாசித்தார். அதில் அவர் கூறி இருப்பதாவது:-

தமிழ்த்திரை உலகில் மாபெரும் சகாப்தமாக விளங்கிய பழம்பெரும் கதாநாயகனும், சிறந்த பாடகரும், ரசிகர் பெருமக்களால் எம்.கே.டி. எனவும் அன்புடன் அழைக்கப்படுபவர் கிருஷ்ணசாமி தியாகராஜ பாகவதர்.

அன்பும், அடக்கமும், எளிமையும் மிகுந்த தியாகராஜ பாகவதரின் கலையுலக வாழ்வு 1934-ம் ஆண்டு பவளக்கொடி என்ற திரைப்படத்தின் மூலம் அரங்கேறியது. தியாகராஜ பாகவதர் பல்வேறு தமிழ்த் திரைப்படங்களில் நடித்த பெருமைக்குரியவர். இவர் நடித்த ஹரிதாஸ் என்னும் திரைப்படம் மக்களிடத்தில் பெரும் வரவேற்பை பெற்றது. இவர் சுமார் 25 ஆண்டுகளுக்கும் மேலாக தமிழ்த் திரைப்பட உலகில் கோலோச்சிக் கொண்டிருந்த பெருமைக்குரியவர்.

தியாகராஜ பாகவதரின் இசைவளம் செறிந்த குரல், அனைத்து தரப்பு மக்களாலும் ரசிக்கப்பட்டது. இவருடைய கர்நாடக சங்கீத பாடல்கள் அன்றும், இன்றும் மக்கள் மனதில் ஒலித்துக்கொண்டே இருக்கும் என்றால் அது மிகையாகாது. இவர் பல வெற்றிப் படங்களை வழங்கி தனக்கென ஒரு தனி முத்திரை பதித்தவர்.

திரைப்படத் துறையிலும், பாரம்பரிய இசைத் துறையிலும் தியாகராஜ பாகவதரின் பன்முக பங்களிப்பினையும், சாதனையையும் அங்கீகரிக்கும் வகையிலும், அவரது நினைவினைப் போற்றும் வகையிலும், தமிழ்நாடு அரசு திருச்சிராப்பள்ளி மாவட்டத்தில் 50 லட்சம் ரூபாய் செலவில் தியாகராஜ பாகவதருக்கு திருவுருவச் சிலையுடன் கூடிய மணி மண்டபம் அமைக்கும்.

இவ்வாறு எடப்பாடி பழனிசாமி கூறினார்.
வெள்ளிக்கிழமை, 19 ஜூலை 2019 00:00

ரூ.27 ஆயிரத்தை நெருங்குகிறது தங்கம்

ஆபரணத் தங்கத்தின் விலை ரூ.27 ஆயிரத்தை நெருங்குகிறது. சென்னையில் வெள்ளிக்கிழமை பவுனுக்கு ரூ.248 உயர்ந்து, ரூ.26,904-க்கு விற்பனை செய்யப்பட்டது.

சர்வதேச பொருளாதாரச் சூழல், உலகச் சந்தையில் தங்கத்தின் மதிப்பு, அமெரிக்க டாலருக்கு நிகரான இந்திய ரூபாயின் மதிப்பு ஆகியவற்றின் அடிப்படையில் தங்கத்தின் விலை நிர்ணயிக்கப்படுகிறது. பல்வேறு காரணங்களால் கடந்த மாதம் முதலே தங்கம் விலை உயர்ந்து வந்தநிலையில், கடந்த 11-ஆம் தேதி பவுன் ரூ.26,640-க்கு விற்பனை செய்யப்பட்டது. அதன்பிறகு, ஏற்ற, இறக்கங்களை சந்தித்து வந்தது.

இதற்கிடையில், கடந்த வியாழக்கிழமை ஆபரணத் தங்கத்தின் விலை மீண்டும் புதிய உச்சத்தைத் தொட்டது. பவுனுக்கு ரூ.304 உயர்ந்து, ரூ.26,656-க்கு விற்பனை செய்யப்பட்டது. தங்கம் விலை உயர்வுக்கு அமெரிக்காவில் ஃபெடரல் வங்கி கூட்டமைப்பு வைப்பு நிதியின் வட்டியை உயர்த்தாததால், முதலீட்டாளர்கள் தங்கத்தில் அதிக அளவு முதலீடு செய்து வருவது முக்கிய காரணம் என்று தங்க நகை வியாபாரிகள் தெரிவித்தனர்.

இந்நிலையில், சென்னையில் ஆபரணத் தங்கத்தின் விலை ரூ.27 ஆயிரத்தை நெருங்குகிறது. வெள்ளிக்கிழமை பவுனுக்கு ரூ.248 உயர்ந்து, ரூ.26,904-க்கு விற்பனை செய்யப்பட்டது. ஒரு கிராம் தங்கம் ரூ.31 உயர்ந்து, ரூ.3,363-க்கு விற்பனை செய்யப்பட்டது. வெள்ளி கிராமுக்கு 80 பைசா உயர்ந்து, ரூ.44.60 ஆகவும், கட்டி வெள்ளி கிலோவுக்கு ரூ.800 அதிகரித்து, ரூ.44,600 ஆகவும் இருந்தது.
வெள்ளிக்கிழமை விலை

ரூபாயில் (ஜி.எஸ்.டி. தனி):

1 கிராம் தங்கம் ............. 3,363
1 பவுன் தங்கம் ............. 26,904
1 கிராம் வெள்ளி .......... 44.60
1 கிலோ வெள்ளி ......... 44,600

வியாழக்கிழமை விலை ரூபாயில் (ஜி.எஸ்.டி. தனி):

1 கிராம் தங்கம் ............. 3,332
1 பவுன் தங்கம் ............. 26,656
1 கிராம் வெள்ளி .......... 43.80
1 கிலோ வெள்ளி .......... 43,800

பக்கம் 6 / 2555
Top
We use cookies to improve our website. By continuing to use this website, you are giving consent to cookies being used. More details…