JoomlaLock.com All4Share.net

Background Video

Super User

Super User

Email: இம்மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.

புலம் பெயர் தமிழர்களுக்கான விழா மீளவும் ஒத்தி வைக்கப்பட உள்ளது. இந்த ஆண்டின் இறுதியில் தமிழ் புலம்பெயர் மக்களுக்கான விசேட விழா ஒன்று அரசாங்கம் நடாத்தத் திட்டமிட்டிருந்தது.

எனினும் பின்னர் இந்த திட்டம் ஒத்தி வைக்கப்பட்டுள்ளது. கடந்த ஆண்டு இறுதியிலும் விழா நடத்துவதாக அறிவிக்கப்பட்ட போதிலும் பின்னர் அந்த திட்டம் ஒத்தி வைக்கப்பட்டது.

எதிர்வரும் 2018ஆம் ஆண்டில் புலம் பெயர்த தமிழர் விழா நடாத்த அரசாங்கம் தீர்மானித்துள்ளது.

எதிர்வரும் 2018ஆம் ஆண்டு இலங்கையின் 70ஆம் சுதந்திர தின நிகழ்வுகளுக்கு சமாந்திரமாக தமிழ் புலம்பெயர் விழாவினை வெளிவிவகார அமைச்சு ஏற்பாடு செய்துள்ளது.

இந்த நிகழ்வு பிரமாண்டமான முறையில் நடத்தப்பட உள்ளது. இதற்காக உலகின் பல பாகங்களிலும் வாழும் புலம்பெயர் தமிழர்களுக்கு அழைப்ப விடுக்கப்பட்டுள்ளது.

இலங்கையில் முதல் தடவையாக தமிழ் புலம்பெயர் விழா ஒன்று நடத்தப்பட உள்ளது என்பது குறிப்பிடத்தக்கது.

சென்னையின் புறநகர் பகுதிகளில் லேசான நில அதிர்வு நேற்று நள்ளிரவில் ஏற்பட்டதால் மக்கள் வீதிக்கு ஓடினர்.

சென்னையை அடுத்த பம்மல், பொழிச்சலூர், அனகாபுத்தூர் போன்ற பகுதிகளில் நேற்று நள்ளிரவு லேசான நில அதிர்வு ஏற்பட்டுள்ளது.

10 முதல் 15 நொடிகள் நீடித்த இந்த நில அதிர்வால், இந்தப் பகுதியில் இருந்த மக்கள் தங்கள் குடியிருப்புகளை விட்டு வெளியில் ஓடி வந்தனர். சிலருக்கு இந்த நிலநடுக்கம் பற்றி எதுவுமே தெரியவில்லை.

ஆனால் யாருக்கும் எந்த சேதமும் ஏற்படவில்லை. அதே நேரம் சென்னையின் பிற பகுதிகளில் இந்த நில நடுக்கம் உணரப்படவில்லை. இதுகுறித்து வானிலை ஆய்வு மையத்திடமிருந்து அதிகாரப்பூர்வமாக எதுவும் அறிவிக்கப்படவில்லை.

பீகார் மாநிலத்தின் கயா–அவுரங்காபாத் மாவட்ட எல்லையையொட்டிய துமரிநலா காட்டுப்பகுதிகளுக்கு மாவோயிஸ்டு தீவிரவாதிகள் சிலர் பதுங்கி இருப்பதாக மத்திய ரிசர்வ் படை போலீசாருக்கு தகவல் கிடைத்தது. இதைத்தொடர்ந்து அதன் 205–வது படைப்பிரிவின் கமாண்டோ வீரர்கள் நேற்று முன்தினம் காலை அங்கு விரைந்தனர்.

நேற்று மாலை அவர்கள் தேடுதல் வேட்டைக்காக துமரிநலா காட்டுப்பகுதிக்குள் நுழைந்தனர். அதேநேரம், தங்கள் மறைவிடத்துக்கு கமாண்டோ படை வீரர்கள் வருவதை அறிந்துகொண்ட மாவோயிஸ்டுகள் காட்டுக்குள் ஆங்காங்கே கண்ணிவெடிகளை புதைத்து வைத்தனர்.

தேடுதல் வேட்டையில் ஈடுபட்ட கமாண்டோ வீரர்கள் இதில் சிக்கிக் கொண்டனர். அப்போது அவர்கள் மீது மாவோயிஸ்டுகள் சக்தி வாய்ந்த வெடிகுண்டுகளை வீசியும், எந்திர துப்பாக்கிகளால் சுட்டும் தாக்குதல் நடத்தினர். இதில் கமாண்டோ வீரர்களில் 8 பேர் சம்பவ இடத்திலேயே உடல் சிதறி பலியாயினர். 7 வீரர்கள் படுகாயம் அடைந்தனர்.

படுகாயம் அடைந்தவர்கள் ஹெலிகாப்டர் மூலம் மீட்கப்பட்டு கயாவில் உள்ள ஆஸ்பத்திரிக்கு கொண்டு செல்லப்பட்டனர். எனினும் வழியிலேயே 2 பேர் உயிர் இழந்தனர். இதனால் தாக்குதலில் பலியான கமாண்டோ வீரர்களின் எண்ணிக்கை 10 ஆக உயர்ந்தது. சிகிச்சை பெற்று வரும் 5 வீரர்களில் இருவரின் நிலைமை கவலைக்கிடமாக உள்ளது.

இதற்கிடையே, மாவோயிஸ்டுகளை வேட்டையாட 50–க்கும் அதிகமான கமாண்டோ வீரர்கள் துமரிநலா காட்டுப்பகுதிக்கு அனுப்பி வைக்கப்பட்டனர். அப்போது இரவு நேரம் ஆகிவிட்டாலும் கமாண்டோ படையினர் உயிரை துச்சமாக மதித்து மாவோயிஸ்டுகள் பதுங்கியிருந்த இடத்தை சுற்றிவளைத்து தாக்குதல் நடத்தினர். மாவோயிஸ்டுகளும் பதில் தாக்குதலில் ஈடுபட்டனர்.

இரு தரப்பினருக்கும் இடையே பல மணி நேரம் கடும் துப்பாக்கி சண்டை நடந்தது. கமாண்டோ வீரர்களின் தாக்குதலை சமாளிக்க முடியாத மாவோயிஸ்டுகளில் பலர் அங்கிருந்து தப்பி ஓடிவிட்டனர்.

மாவோயிஸ்டுகள் பதுங்கியிருந்து தாக்குதல் நடத்திய இடத்தில் கமாண்டோ வீரர்கள் ஆய்வு செய்தபோது, அங்கு 4 மாவோயிஸ்டு தீவிரவாதிகள் உடலில் குண்டுபாய்ந்து செத்துக்கிடந்தனர். அங்கிருந்து ஏராளமான ஏ.கே.47 எந்திர துப்பாக்கிகள், அதிநவீன கைத்துப்பாக்கிகள், கையெறி குண்டுகள், வெடிபொருட்கள் கைப்பற்றப்பட்டன.

தப்பியோடிய மாவோயிஸ்டுகளை தேடும் பணி முடுக்கிவிடப்பட்டு உள்ளது. தீவிரவாதிகள் சத்தீஷ்கார், ஜார்கண்ட் மாநிலங்களுக்கு தப்பிச் சென்று விடாமல் தடுக்க அங்கும் தேடுதல் வேட்டை நடத்தப்பட்டு வருகிறது.

இலங்கையும் சிங்கப்பூரும் வரலாற்று முக்கியத்துவம் மிக்க ஐந்து புரிந்துணர்வு உடன்படிக்கைகளில் நேற்று முன்தினம் சிங்கப்பூரில் கைச்சாத்திட்டுள்ளன.

சுதந்திர வர்த்தக உடன்படிக்கை, மேல் மாகாண பாரிய அபிவிருத்தி, கலாசார ஒத்துழைப்பு, அரசாங்க ஊழியர்களின் திறமைகளை மேம்படுத்துதல், தொழில்நுட்ப மற்றும் தொழிற்கல்வி ஆகிய ஐந்து துறைகள் தொடர்பில் இப்புரிந்துணர்வு உடன்படிக்கைகள் கைச்சாத்திடப்பட்டு இருக்கின்றன.

சிங்கப்பூர் ஜனாதிபதியின் உத்தியோகபூர்வ வாசஸ்தலமான 'இஸ்தானா' மாளிகையில் இலங்கைப் பிரதமர் ரணில் விக்கிரமசிங்க, சிங்கப்பூர் பிரதமர் லி சியோன் லுங்க் முன்னிலையில் இவ்வுடன்படிக்கைகள் கைச்சாத்திடப்பட்டன.

இலங்கையின் நட்பு நாடுகளில் ஒன்றாக விளங்கும் சிங்கப்பூருக்கு பிரதமர் ரணில் விக்கிரமசிங்க, அவரது பாரியார் மற்றும் இலங்கையின் உயர் மட்டக் குழுவினர் கடந்த ஞாயிறன்று மூன்று நாட்கள் உத்தியோகபூர்வ விஜயத்தை ஆரம்பித்தனர்.

பிரதமர் ரணில் விக்கிரமசிங்க மற்றும் அவர் தலைமையிலான இக்குழுவினருக்கு சிங்கப்பூர் ஜனாதிபதி மாளிகையில் நேற்று முன்தினம் மகத்தான செங்கம்பள வரவேற்பு அளிக்கப்பட்டது.

இவ்வரவேற்பைத் தொடர்ந்து சிங்கப்பூர் ஜனாதிபதியையும், அந்நாட்டு பிரதமரையும் பிரதமர் ரணில் விக்கிரமசிங்க சந்தித்துப் பேச்சுவார்த்தை நடத்தினார்.

இப்பேச்சுவார்த்தையின் போது இரு நாடுகளதும் நட்புறவை மேலும் மேம்படுத்துவது குறித்து அதிக கவனம் செலுத்தப்பட்டது. அதனைத் தொடர்ந்து இவ்வரலாற்று முக்கியத்துவம் மிக்க உடன்படிக்கைகள் கைச்சாத்திடப்பட்டுள்ளன.

இந்நிகழ்வில் சிங்கப்பூர் பிரதமர் உரையாற்றும் போது, 'இலங்கைக்கும் சிங்கப்பூருக்குமிடையிலான சுதந்திர வர்த்தக உடன்படிக்கையைத் தயாரித்து நடைமுறைக்குக் கொண்டு வரும் போது இரு நாடுகளுமே சமூக, பொருளாதார ரீதியில் பாரிய நன்மைகளைப் பெற்றுக் கொள்ளும்' என்று குறிப்பிட்டதோடு, இலங்கையின் இணக்கப்பாட்டு அரசாங்கம் முன்னெடுக்கும் கொள்கையின் விளைவாக சிங்கப்பூர் மற்றும் சர்வதேச நிறுவனங்களும் இலங்கையில் முதலிட விருப்பம் கொண்டிருப்பதாகவும் சுட்டிக்காட்டியுள்ளார்.

சிங்கப்பூர் பிரதமரின் இந்த அறிவிப்பு இலங்கைக்கு கிடைக்கப்பெற்றுள்ள மற்றொரு சர்வதேச வெற்றி என்பதில் ஐயமில்லை. உண்மையில் தற்போதைய இணக்கப்பாட்டு அரசாங்கம் சர்வதேச நகர்வுகளுக்கு ஏற்ப கொள்கை வேலைத் திட்டங்களை முன்னெடுக்கின்றது.

அதன் பயனாக உலகின் பல நாடுகளும் இலங்கைக்கு உதவி ஒத்துழைப்புகளை நல்கி வருவதோடு முதலீடுகளை மேற்கொள்வதிலும் அதிக ஆர்வம் கொண்டுள்ளன. அதற்கு சிங்கப்பூர் பிரதமரின் அறிவிப்பும் நல்ல எடுத்துக்காட்டு.

இதேவேளை பிரதமர் ரணில் விக்கிரமசிங்க சிங்கப்பூரில் நடைபெற்ற தென்னாசியப் புலம்பெயர்ந்தோர் மாநாட்டில் கலந்து கொண்டு பேருரை நிகழ்த்திய போது,

சிங்கப்பூருடன் சுதந்திர வர்த்தக உடன்படிக்கை, இந்தியாவுடன் எட்கா உடன்படிக்கை மற்றும் சீபா உடன்படிக்கை என்பவற்றின் மூலம் அடுத்த வருட இறுதிக்குள் இலங்கை தென்னாசியாவின் மிகச் சிறந்த உப வலயமாக மாற்றப்படும். இதனூடாக முத்தரப்பு பொருளாதார வேலைத்திட்டம் முன்னெடுக்கப்படும்' என்று தெரிவித்திருக்கின்றார்.

இதன்படி பிரதமரின் சிங்கப்பூர் விஜயமும் அங்கு மேற்கொள்ளப்பட்டுள்ள புரிந்துணர்வு உடன்படிக்கைகளும் இலங்கைக்கு அபரிமித பொருளாதார நன்மைகளைக் கொண்டு வரும். அவை இந்நாட்டின் பொருளாதார சுபிட்சத்திற்கு பாரிய பங்களிப்பை நல்கும் என்பதில் ஐயமில்லை.

இலங்கைக்கும் சிங்கப்பூருக்கும் இடையில் நீண்ட காலமாக நட்புறவு நிலவி வருகின்றது. அதிலும் 14ஆம் நூற்றாண்டு காலப்பகுதியில் இரு நாடுகளுக்குமிடையில் வர்த்தக உறவு காணப்பட்டதாக வரலாற்றுப் பதிவுகள் உள்ளன.

இலங்கையை ஆண்ட புவனேகுபாகு மன்னர் காலத்து (கி.பி.1272 -- 1284)நாணயங்கள் அங்கு கண்டெடுக்கப்பட்டமை இதற்கு நல்ல எடுத்துக்காட்டாகும்.இருப்பினும் சிங்கப்பூரானாது இன்று இலங்கையை விடவும் பல மடங்கு அபிவிருத்தியடைந்துள்ளது. அதுவும் பொருளாதர ரீரியில் ஆசியப் பிராந்தியத்தில் அபரிமித வளர்ச்சி கண்ட நாடுகளில் ஒன்றாக சிங்கப்பூரை எழுந்து நிற்கச் செய்திருக்கின்றது.

ஆனால் இந்நாடு சில தசாப்தங்களுக்கு முன்னர் இலங்கையை முன்னுதாரணமாகக் கொண்டு தான் கட்டியெழுப்பப்பட்டது.இதனை அந்நாட்டின் அன்றைய தலைவராக விளங்கிய லீ ஹுவான் யூ பகிரங்கமாகவே தெரிவித்திருந்தார்.

இலங்கையை முன்னுதாரணமாகக் கொண்டு கட்டியெழுப்பப்பட்ட சிங்கப்பூரோ இன்று பல மடங்குகள் வளர்ச்சி அடைந்துள்ளது. ஆனால் இலங்கையோ சிங்கப்பூரை விடவும் பல மடங்கு கீழ் மட்டத்திலேயே இன்றும் உள்ளது.

இந்நிலைக்கு இந்நாட்டில் காணப்படும் இன ரீதியான சிந்தனையும் ,முரண்பாடுகளுமே முக்கிய காரணம். இந்த உண்மையைத் தற்போதைய அரசாங்கம் நன்றாகவே உணர்ந்துள்ளது.

அதன் காரணத்தினால் இந்நாட்டை இந்த நிலையிலிருந்து மீட்டெடுத்து வளர்ச்சி மிக்க நாடாகக் கட்டியெழுப்புவதற்காக ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க தலைமையிலான இணக்கப்பாட்டு அரசாங்கம் அர்ப்பணிப்புகளுடன் செயற்பட்டு வருகின்றது.

இதனை அடிப்படையாகக் கொண்டு பல வேலைத்திட்டங்களும் முன்னெடுக்கப்படுகின்றன.இவ்வாறான சூழலில் பிரதமர் ரணில் விக்கிரமசிங்கவின் சிஙகப்பூருக்கான விஜயம் இலங்கைக்கு சமூக பொருளாதார ரீதியில் நிச்சயம் பலவித நன்மைகளைப் பெற்றுக் கொடுக்கும்.

குறிப்பாகப் பிரதமர் சுட்டிக்காட்டியுள்ளபடி, தென்னாசியப் பிராந்தியத்தில் இலங்கை சிறந்த உப வலயமாகத் திகழ அவை அடித்தளமாக அமையும்.

அத்தோடு இரு நாடுகளுக்கிடையிலான நட்புறவும் மென்மேலும் வலுப்பெறவும் வழிவகுக்கும்.

தனது கேசம் கலைந்த நிலையில் தகரக் கொட்டகையின் கீழ் அமர்ந்தவாறு பகலுணவு சமைத்துக் கொண்டிருக்கிறார் அந்தப் பெண்.

தகரக் கொட்டகை சுட்டெரிக்கும் வெயிலை உள்வாங்கி அவளுடைய உடல் முழுவதும் பரவவிட, அவளது அடுப்பிலிருந்து வெளிவரும் சூடும் கலந்து வெப்பக் காற்றை உமிழ்கின்றது.

விடுதலைப் புலிகளுக்கும் இராணுவத்தினருக்கும் இடையிலான யுத்தத்தால் தமது சொந்த இருப்பிடங்களை விட்டு இடம்பெயர்ந்து கடந்த 20 வருடங்களாக பூந்தோட்டம் நலன்புரி முகாமில் வசித்து வரும் ஆயிரக்கணக்கானவர்களில் ஒருவர்தான் அபலைப் பெண்ணான விஸ்வலிங்கம் கலையம்மா.

எனக்கு ஐந்து பிள்ளைகள். எல்லோரும் திருமணம் முடித்து இங்குதான் இருக்கிறார்கள். நாம் பதிவு செய்யப்பட்ட வாக்காளர்கள்.

நான் இந்த இடத்தை விட்டுப் போக விரும்பவில்லை. ஆனால் அரசாங்கம் எங்களை விரட்ட முயற்சிக்கின்றது என மண்பற்று நீங்காத உறுதியுடன் கூறுகிறார் 65 வயதான இந்தத் தாய்.

அதிகாரிகள் எமக்கான மின்சாரம் மற்றும் நீர் வழங்கல்களை நிறுத்தி விட்டார்கள். நாம் சுமார் ஒரு கிலோ மீட்டர் தூரம் வரை நடந்து சென்று நீர் எடுத்துவர வேண்டியிருக்கிறது.

குளிக்க, துணி துவைக்க என ஒரே ஒரு கிணறுதான் இருக்கிறது என கலையம்மாவின் கண்ணீர்க் கதை தொடர்கிறது. இந்த இடத்தைக் காலி செய்துவிட்டு நெடுங்கேணிக்குச் செல்லுமாறு அதிகாரிகள் கூறியிருக்கிறார்களாம்.

ஆனால், பூந்தோட்டம் நலன்புரி முகாம் அமைந்துள்ள பிரதேசம் அரசுக்குச் சொந்தமானதாக இருந்தாலும் அரசாங்கம் தங்களுக்கு அங்கேயே வசிப்பதற்கு இடம் ஒதுக்கித்தர வேண்டும் என்பதுதான் இவருடைய கோரிக்கை.

இங்கே தங்க வைக்கப்பட்டுள்ள 97 குடும்பங்களின் கோரிக்கையும் இதுவாகவே இருக்கிறது.இருப்பினும், காணி விலை இந்த இடத்தில் தற்போது கிடுகிடுவென எகிறிவிட்டது.

இதை அறிந்துள்ள கலையம்மாவும் ஏனைய சிலரும் இங்கு கிடைக்கும் காணித் துண்டை என்றாவது ஒருநாள் பெரிய விலைக்கு விற்கலாம் என்ற கனவில் இருக்கிறார்கள்.

அதற்காக எந்தக் கஷ்டத்தையும் தாங்கிக் கொள்ளவும் அவர்கள் தயார். இருபது வருடங்கள் பின்னோக்கிச் சென்றால் இந்தப் பூந்தோட்டம் நலன்புரி முகாம் உதயமான கதை தெரியும்.

வடக்கில் யுத்தம் தொடங்கிய காலத்தில் 1995 ம் ஆண்டு அமைக்கப்பட்ட இந்த முகாம் யுத்தம் உச்சக்கட்டத்தை நெருங்கிக் கொண்டிருந்த வேளை வடமாகாணத்தின் பல்வேறு இடங்களிலிருந்து உயிருக்குத் தப்பி இடம்பெயர்ந்து வந்த 500 பேரை தங்க வைக்க பயன்படுத்தப்பட்டது.

இந்த 500 பேரில் தற்போது இங்குள்ள 97 குடும்பங்கள் தவிர ஏனைய 403 குடும்பங்கள் தாரணிகுளம், சுந்தரபுரம், ஆசிக்குளம், கல்யாணி குளம், கற்குளம் போன்ற இடங்களில் மீள்குடியமர்த்தப்பட்டுள்ளன.

தேர்தல் வரும் போது அரசியல்வாதிகள் இங்கு காணி தருவதாக முகாமுக்கு எதிரே உள்ள கோவிலுக்கு முன்பாக நின்று வாக்குறுதி அளிக்கிறார்கள்.

வாக்குறுதிகளை நிறைவேற்ற தமக்கு வாக்களிக்குமாறும் அவர்கள் கூறுகிறார்கள். கோவிலுக்கு முன்பாக நின்று கொண்டு அவர்கள்​ பொய். சொல்ல மாட்டார்கள் என மக்கள் நம்பி அவர்களுக்கு வாக்களிக்கிறோம்.

ஆனால் அவர்கள் சொல்வதெல்லாம் பொய். எமக்கு அடிப்படை சுகாதார வசதிகள் கூட இங்கு இல்லை. அதுமட்டுமல்ல, அவர்கள் எம்மை அனுப்ப உத்தேசித்துள்ள நெடுங்கேணி காட்டு யானைகள் சூழ்ந்த ஒரு இடமாகும்.

இதனால் எமக்கு ஆபத்து வரும். இது 38 வயது நிரம்பிய ஜெகதீஸ்வரன் கல்பனாவின் புலம்பல்.இவர்களின் கண்ணீர்க் கதைகளுக்கு பொறுப்புள்ள அதிகாரிகள் என்ன கூறுகிறார்கள்?

வவுனியா மாவட்ட புனர்வாழ்வு புனரமைப்பு செயலகத்தின் திட்டப் பணிப்பாளர் வீ. கிருபசுதன் கூறுகிறார்.

பூந்தோட்டம் முகாமில் எஞ்சியுள்ள குடும்பங்களை மீள் குடியமர்த்த அனைத்தும் செய்யப்பட்டுள்ளன. 80 ஏக்கர் பயிரிடக் கூடிய நிலம் அரசாங்கத்தால் வழங்கப்பட்டிருக்கிறது.

அதே நேரம், அமெரிக்க ஐக்கிய இராச்சியத்திலுள்ள ஞானம் பவுண்டேஷன் ஒவ்வொரு குடும்பத்துக்கும் வீடு கட்டிக் கொள்ள ரூபா 1,000,000 வழங்கியுள்ளது. அவர்கள் ஜீவாதார மற்றும் குடிசைக் கைத் தொழில் திட்டங்களை ஆரம்பிக்கவும் இருக்கிறார்கள்.

பூந்தோட்டம் முகாம் அமைந்துள்ள 21 ஏக்கர் காணியில் ஆறு ஏக்கர் காணி அரசுக்கும் மீதமுள்ள காணி தனியாருக்கும் சொந்தமானது. உட்கட்டமைப்பு அபிவிருத்தி திட்டங்கள் ஏற்கனவே ஆரம்பிக்கப்பட்டுள்ளன.

மின்சார வழங்கலை நாம் நிறுத்த வேண்டிய கட்டாயம் ஏற்பட்டது. 2012 ம் ஆண்டு முதல் நிதிவசதி இன்மையால் உலர் உணவுகளையும் நிறுத்த வேண்டிய நிலைமை உருவானது.

97 குடும்பங்களில் 80 குடும்பங்கள் நெடுங்கேணி செல்லவும் 17 குடும்பங்கள் மாத்திரம் பூந்தோட்டம் முகாமில் தொடர்ந்தும் தங்கியிருக்கவும் விருப்பம் தெரிவித்துள்ளன.

இதை வன்னி மாவட்ட பாராளுமன்ற உறுப்பினரும் கைத்தொழில் வர்த்தக அமைச்சருமான ரிஷாத் பதியுதீன் உறுதிப்படுத்துகின்றார்.

நெடுங்கேணியில் ஒவ்வொரு குடும்பத்துக்கும் அரை ஏக்கர் காணி ஒதுக்கிக் கொடுக்கப்படும். மாவட்ட செயலாளரின் பரிந்துரைகளின் படி பூந்தோட்டம் முகாமில் உள்ளவர்கள் பற்றிய இறுதி முடிவு எடுக்கப்படும் எனவும் அவர் கூறுகிறார்.

நெடுங்கேணி இராசபுரத்தில் இந்த இடம்பெயர்ந்த குடும்பங்களுக்காக கட்டப்பட்டு வரும் வீடுகள் இந்த வருடம் அக்டோபர் மாதமளவில் பூர்த்தி செய்யப்படும். அவர்களுக்கு கொடுக்க போதுமான காணி பூந்தோட்டம் முகாம் உள்ள பகுதியிலோ, வவுனியாவிலோ இல்லை.

பூந்தோட்டம் முகாம் அமைந்துள்ள காணியை தம்மிடம் திரும்ப ஒப்படைக்குமாறு அதன் உரிமையாளர்கள் எமக்கு வேண்டுகோள் விடுத்துள்ளார்கள்.

20 வருடங்களாக வசித்து வந்தாலும் பூந்தோட்டம் முகாமிலுள்ள மக்கள் அந்தக் காணியை உரிமை கோர முடியாது.

இராசபுரத்தில் வீடுகள் தயாரானதும் இந்தப் பிரச்சினையைத் தீர்த்து வைப்பது என தனது தரப்பில் விளக்கம் தந்தார் வவுனியா மாவட்ட செயலாளர் ரோஹன புஷ்பகுமார.

Top
We use cookies to improve our website. By continuing to use this website, you are giving consent to cookies being used. More details…